އިންޑިއާގެ އޮޑިޝާ ސްޓޭޓުގައި ހިނގި ހާދިސާއެއްގައި، މަރުވެފައިވާ މީހެއްގެ މަރު ސާބިތުކޮށްދިނުމަށްޓަކައި އޭނާގެ ބޭބެ، ކޮއްކޮގެ ހަށިގަނޑު ކޮނެގެން ބޭންކަށް ގެންގޮސްފިއެވެ.
ޓީއާރުޓީ ވޯލްޑުން ރިޕޯޓްކޮށްފައިވާ ގޮތުގައި، މި މީހާ ވަނީ އޭނާގެ ކޮއްކޮގެ ހަށިގަނޑު ވަޅުލާފައި އޮއްވާ ކޮނެގެން ނެގުމަށްފަހު، ގާތްގަނޑަކަށް ތިން ކިލޯމީޓަރުގެ ދުރަށް ހިނގާފައި ގޮސް ލޯކަލް ބޭންކަކަށް ވަދެފައެވެ. މި ނިކަމެތި އަމަލު އޭނާ ކުރަން މަޖުބޫރުވީ، މަރުވެފައިވާ ކޮއްކޮގެ ނަމުގައި ހުރި މާލީ އެކައުންޓްތަކާއި ރަސްމީ ރެކޯޑްތައް ހޯދުމަށް ބޭނުންވާ ލިޔެކިޔުންތައް ނުލިބި، އިދާރީ ގޮތުން ކުރިމަތިވި ބޮޑެތި ގޮންޖެހުންތަކާ ގުޅިގެންނެވެ.
އާންމުން ބުނި ގޮތުގައި، ފޮތިގަނޑެއްގައި އޮޅާފައިވާ ހަށިގަނޑު ހިފައިގެން އެމީހާ ބޭންކަށް ވަނުމުން، އެތަނުގައި ތިބި ކަސްޓަމަރުންނާއި މުވައްޒަފުންނަށް ވަނީ ބޮޑު ސިހުމެއް ލިބިފައެވެ. ހާދިސާ ހިނގިތާ މާގިނައިރުތަކެއް ނުވެ ފުލުހުން ވަނީ އެ ސަރަހައްދަށް ގޮސް ހާލަތު ކޮންޓްރޯލްކޮށްފައެވެ. އަދި ކަނޑައެޅިފައިވާ އުސޫލުތަކުގެ މަތިން ހަށިގަނޑު އަލުން ވަޅުލުމުގެ އިންތިޒާމު ފުލުހުން ވަނީ ހަމަޖައްސާފައެވެ.
ކަމާބެހޭ ފަރާތްތަކުން މިހާރު ދަނީ މި މައްސަލަ ތަހުގީގު ކުރަމުންނެވެ. މީގެ ތެރޭގައި އެމީހާ އެފަދަ ހަރުކަށި ފިޔަވަޅެއް އަޅަން މެދުވެރިވި ހާލަތްތައް ބަލަމުންދާ ކަމަށް އޮފިޝަލުން ވިދާޅުވިއެވެ. މައުލޫމާތު ލިބިފައިވާ ގޮތުގައި ކޮއްކޮގެ އެކައުންޓްގައި ހުރި ފައިސާތައް ދޫކުރެވޭނީ ވެރި ފަރާތް ހާޒިރުވުމުން ކަމަށް ބޭންކުން ބުނުމުން އެމީހާ ވަނީ ކޮއްކޮ މަރުވެފައިވާ ކަމަށް ތަކުރާރުކޮށް ބުނެފައެވެ. ނަމަވެސް މަރުވިކަން އަންގައިދިނުމަށް ބޭންކުން އެދެމުން އެމީހާ ވަނީ ކޮއްކޮގެ ހަށިގަނޑު ކޮނެގެން ބޭންކަށް ގެންގޮސްފައެވެ.
މި ހާދިސާއާ ގުޅިގެން، އިންޑިއާގެ އަވަށް ސަރަހައްދުތަކުގައި މަރުގެ ސެޓްފިކެޓް ފަދަ މުހިންމު ލިޔެކިޔުންތައް ދޫކުރުމުގައި ހުރި ބިއުރޯކްރެޓިކް ދަތިތަކާ މެދު ގިނަ ބަޔަކު ދަނީ ކަންބޮޑުވުން ފާޅުކުރަމުންނެވެ. އަދި މިފަދަ ކަންކަމުގައި އާންމުންނަށް ލުއިފަސޭހަ ނިޒާމެއް ގާއިމްކުރުމުގެ މުހިންމުކަން މި ހާދިސާއިން ވަނީ ހާމަވެފައެވެ. މި މައްސަލައިގައި އެމީހާއަށް ގާނޫނީ ފިޔަވަޅެއް އަޅާނެކަން ކަމާބެހޭ ފަރާތްތަކުން އަދި ކަށަވަރުކޮށްދީފައެއް ނުވެއެވެ.
