އީރާނާއެކު ގާއިމުކޮށްފައިވާ ހަމަލާބަދަލުކުރުން ހުއްޓާލުމުގެ އެއްބަސްވުން ދެމިއޮތުމަށް އެ ގައުމުން އުންމީދުކުރަންޖެހޭނެ ކަމަށް ބުނެ، އެމެރިކާގެ ރައީސް ޑޮނަލްޑް ޓްރަމްޕް އިންޒާރު ދެއްވައިފިއެވެ.
ސްޓްރެއިޓް އޮފް ހޯމޫޒް ކައިރިން ދަތުރުކުރަމުންދިޔަ ވިޔަފާރި އުޅަނދުތަކަކަށް އީރާނުން ހަމަލާދީފައިވާ ކަމަށް ރިޕޯޓްތައް ބުނަމުންދަނިކޮށް، އެމެރިކާގެ މީޑިއާތަކަށް ދެއްވި ބަސްދީގަތުމެއްގައި ޓްރަމްޕް ވިދާޅުވީ ހަމަލާބަދަލުކުރުން ހުއްޓާލުމުގެ އެއްބަސްވުމާ އީރާނުން ހިލާފުވެފައިވޭތޯ ބަލަމުންދާ ކަމަށާއި އެކަމުގެ ތަފްސީލު ފަހުން ހާމަކުރައްވާނެ ކަމަށެވެ.
މީގެ އިތުރުން ޓްރަމްޕް ފާހަގަކުރެއްވި ގޮތުގައި، ރޭގެ ވަގުތެއްގައި އެ ސަރަހައްދުގައި އެމެރިކާގެ ބޮޑެތި މަނަވަރުތަކެއް ހަރަކާތްތެރިވެފައިވާ ކަމަށާއި، އީރާނަށް އޮތް އެންމެ ރަނގަޅު ގޮތަކީ މި އެއްބަސްވުން ދެމިއޮތުން ކަމަށް ވިދާޅުވެ އޭނާ ވަނީ ވަރުގަދަ އިންޒާރެއް ދެއްވާފައެވެ.
