އެމެރިކާއާއި އީރާނާ ދެމެދު މީޑިއޭޓަރުން މެދުވެރިކޮށް މުހިންމު މަޝްވަރާތަކެއް ކުރިއަށްދާ ނަމަވެސް، މިހާތަނަށް އެއްވެސް ކަމެއްގައި އެންމެ ފަހުގެ އެއްބަސްވުމަކަށް އާދެވިފައި ނުވާ ކަމަށް އީރާނުން ހާމަކޮށްފިއެވެ.
އަލްޖަޒީރާގެ ރިޕޯޓަރު ރެސުލް ސެރްދާރު ތެހެރާނުން މައުލޫމާތު ދޭ ގޮތުގައި، އީރާނުން ބާރުއަޅަމުންދަނީ އެ ގައުމުގެ ފްރީޒްކޮށްފައިވާ ނުވަތަ ހިފަހައްޓާފައިވާ މާލީ އެސެޓްތައް ދޫކޮށްލުމަށާއި، އަޅާފައިވާ އިގްތިސާދީ ދަތިކުރުމުގެ ފިޔަވަޅުތަކަށް ލުއިދިނުމަށެވެ. މީގެ އިތުރުން، މުސްތަގުބަލުގައި އެއްބަސްވުމާ އެމެރިކާއިން ޚިލާފު ނުވާނެ ކަމުގެ ފުރިހަމަ ގެރެންޓީއެއް ދިނުމަކީ ވެސް އީރާނުގެ މައިގަނޑު އެއް ޝަރުތެވެ.
އީރާނުގެ ސަރުކާރުން މިހާރު ވަނީ އެމެރިކާއަށް ވަރުގަދަ އިންޒާރެއް ވެސް ދީފައެވެ. އެ ގައުމުން ބުނާ ގޮތުގައި މަޝްވަރާގެ މޭޒުން އެދެވޭ ނަތީޖާއެއް ނުނިކުމެ، މަސްލަހަތު ގެއްލޭ ހާލަތަކަށް ކަންކަން ގޮސްފިނަމަ، އަލުން ހަނގުރާމައަކަށް ނުވަތަ ކުރިމަތިލުމަކަށް ދިއުމަށް އީރާނު އޮތީ ފުރިހަމައަށް ތައްޔާރަށެވެ.
މި މަޝްވަރާތަކަކީ މައިގަނޑު ގޮތެއްގައި އީރާނުގެ ނިއުކްލިއާ ޕްރޮގްރާމާއި، ދެ ގައުމުގެ ދެމެދުގައި އޮތް ނުތަނަވަސްކަން ކުޑަކުރުމަށް ކުރިއަށްދާ މަޝްވަރާތަކެކެވެ. ނަމަވެސް ދެ ގައުމުގެ ދެމެދުގައި އޮތް އިތުބާރު ކުޑަވުމާއި، ސަރަހައްދީ ސިޔާސީ މަސްލަހަތުތައް ހުރި ގޮތުން އެއްބަސްވުމަކަށް އައުމަށް ވަނީ ބޮޑެތި ހުރަސްތަކެއް ކުރިމަތިވެފައެވެ.
އީރާނުން މިފަދަ ރޫހެއްގައި ވާހަކަދައްކާފައި މިވަނީ، މެދުއިރުމަތީގެ މަސްލަހަތު ގޯސްވެ، ސަރަހައްދީ ބާރުތަކުގެ މެދުގައި ނުތަނަވަސްކަން އިންތިހާއަށް ބޮޑުވެފައިވާ ދަނޑިވަޅެއްގައެވެ.
