ހަނގުރާމަ ކުރަން މަޖުބޫރުވާ ކޮންމެ ފަހަރަކު އެކަން ކުރާނެ ކަމަށް އީރާނުން ބުނެފިއެވެ.
އެމެރިކާއާއި އިސްރާއީލް ގުޅިގެން އީރާނަށް ދޭން ފެށި ހަމަލާތަކާއި ގުޅިގެން ހަނގުރާމައެއް ފެށުނު ނަމަވެސް މިހާރު ހަނގުރާމަ ވަނީ ވަގުތީ ގޮތުން މެދުކަނޑާލާފައެވެ. އަދި ހަނގުރާމަ އެއްކޮށް ހުއްޓާލުމުގެ މަޝްވަރާތައް ކުރަމުން އަންނައިރު، އީރާނުން ތުހުމަތު ކުރާ ގޮތުގައި އެމެރިކާއިން ދަނީ ހައްގު ނޫން ޑިމާންޑްތައް ކުރަމުންނެވެ.
އީރާނުގެ ފޮރިން މިނިސްޓްރީގެ ތަރުޖަމާނު، އިސްމާއީލް ބަޣާއީ ވިދާޅުވީ، އީރާނުން އޮތީ ހަނގުރާމަ ކުރަން މަޖުބޫރުވާ ކޮންމެ ފަހަރަކު ހަނގުރާމަ ކުރުމަށް ތައްޔާރަށް ކަމަށާއި އެކަން ކުރާނެ ކަމަށެވެ. އަދި ޑިޕްލޮމަސީއަށް ޖާގަ ލިބޭ ކޮންމެ ފަހަރަކު އެ ފުރުސަތުގެ ބޭނުން ވެސް އީރާނުން ހިފާނެ ކަމަށެވެ.
ޑިޕްލޮމަސީއަށް ވެސް އުސޫލުތަކެއް ހުންނާނެ ކަމަށާއި އީރާނުން މަސައްކަތް ކުރާނީ ގައުމީ މަސްލަހަތު ހިމާޔަތް ކުރަން ކަމަށް ވެސް އޭނާ ވިދާޅުވިއެވެ.
