އަންގާރަ ދުވަހު އދ.ގެ މައި މަރުކަޒުގައި، ފްރަންޓްލައިންގައި ދިގު ޒަމާންތަކެއް ވަންދެން މަސައްކަތް ކޮށްފައިވާ އެމެރިކާ، އިނގިރޭސިވިލާތް އަދި ފްރާންސްގެ ހަތަރު ޑޮކްޓަރުން ވަނީ ޣައްޒާގެ އިންސާނީ ހާލަތު "ޓިޕިން ޕޮއިންޓަކަށް" އަރާފައިވާ ކަމަށާއި ރަފާހަށް އިސްރާއީލުން އަރައިގަތުމަކީ "ގިޔާމަތްވުން ކަހަލަ ކަމެއް ކަމަށް" ބުނެފައެވެ.

ޖެނުއަރީ މަހުގެ ފަހުކޮޅު ޣައްޒާގައި ހިންގި މިޝަނަކުން އެނބުރި އައި ކްރިޓިކަލް ކެއާ ސްޕެޝަލިސްޓެއް އަދި މެޑްގްލޯބަލްގެ ކޯ ފައުންޑަރ ޑރ.ޒާހިރު ސަހްލޫލް އަންގާރަ ދުވަހުގެ ނޫސްވެރިންގެ ބައްދަލުވުމުގައި ވިދާޅުވީ އެމީހުންގެ ހެކިބަސް މެދުވެރިކޮށް ޣައްޒާގެ "ހާލަތާ މެދު ސީރިޔަސް ކަން" އުފެއްދުމަށް އުންމީދުކުރާ ކަމަށެވެ. އޭނާ ބުނީ އާންމުންނަށް ބަނޑުހައިހޫނުކަމާއި އަނިޔާތަކާއި ސިއްހީ ސާމާނާއި ވަސީލަތްތައް މަދުވެފައިވާތަން ފެނިފައިވާ ކަމަށެވެ.

މިސްރުގެ ބޯޑަރުގައި އޮންނަ ދެކުނުގެ ސިޓީއެއް ކަމަށްވާ ރަފާހަށް އިސްރާއީލުން އަރައިފިނަމަ "ލޭއޮހޮރުވުން" އިންތިހާއަށް ކުރިމަތިވެދާނެ ކަމުގެ އިންޒާރު ޑޮކްޓަރުން ދީފައިވެ އެވެ.

"މި ހަނގުރާމައިގެ ތެރޭގައި ދިމާވެދާނެ އެންމެ ނުބައި ކްރައިސިސް މިއީ ކަންނޭނގެ،" ސަހްލޫލް ވިދާޅުވި އެވެ.

އޭނާ ބުނީ ގެދޮރު ގެއްލިފައިވާ މީހުންގެ ޓެންޓުތަކުގެ 'ކަނޑެއް' ބޯޑަރާއި ކައިރީގައި ހިނގާ ހަނގުރާމަތަކުގެ ތެރޭގައި ވަށާލެވިފައިވާތަން ފެނުނު ކަމަށެވެ.

"އެއްވެސް އުދުވާނެއް ހިނގާނަމަ، އެމީހުން ހިންގާނީ ލޭ އޮހޮރުވުމެއް، ޤަތުލުއާންމަކަށް ފަހު ޤަތުލުއާންމުތަކެއް،" އޭނާ ވިދާޅުވި އެވެ.

ސަހްލޫލް ވިދާޅުވީ ޣައްޒާގައި ތިބި އެކުވެރިންގެ ފަރާތުން މި މަންޒަރު އަންދާޒާކުރާ އިރު ގާތްގަނޑަކަށް 250،000 މީހުން މަރުވާ ކަމަށް ލަފާކުރެވޭ ކަމަށެވެ.

ޑޮކްޓަރސް ވިތައުޓް ބޯޑަރސް (މެޑެސިންސް ސަންސް ފްރޮންޓިއަރސް، އެމްއެސްއެފް)، މެޑްގްލޯބަލް އަދި އެހެން ޖަމިއްޔާތަކުގެ ޕްރެކްޓިޝަނަރުން ދަނީ ބުދަ ދުވަހުން ފެށިގެން ހުކުރު ދުވަހުގެ ނިޔަލަށް އެމެރިކާގެ ވޮޝިންޓަން ޑީސީގައި އެމެރިކާ ސަރުކާރުގެ ފަރާތްތަކާ ބައްދަލު ކުރަމުންނެވެ.

އެމީހުންގެ ޕްލޭންގައި "އިންސާނީ ޖަޒީރާތަކަށް" މީހުން ހުސްކުރުން ހިމެނޭ ކަމަށް އިސްރާއީލުގެ ޑިފެންސް ފޯސްގެ ތަރުޖަމާނު ރިއާ އެޑްމިރަލް ޑޭނިއަލް ހަގާރީ ބުނި ނަމަވެސް އެ ރައްކާތެރި ސަރަހައްދުތަކަށް ވާނީ ކިހިނެއް ކަމެއް ސާފެއް ނުވެ އެވެ. އެމްއެސްއެފް ހިމެނޭ ގޮތަށް ޖަމިއްޔާތަކުން ވަނީ ޣައްޒާގައި ރައްކާތެރި ތަނެއް ނެތް ކަމަށް ތަކުރާރުކޮށް ބުނެފަ އެވެ.

އެމެރިކާގެ ސެކްރެޓަރީ އޮފް ސްޓޭޓް އެންޓޯނީ ބްލިންކެން ހިމެނޭ ގޮތަށް ބައިނަލްއަގްވާމީ ލީޑަރުން އެމީހުންގެ ކަންބޮޑުވުންތައް އާންމުކޮށް ހިއްސާކުރި ނަމަވެސް، އިސްރާއީލުގެ އިސް އޮފިޝަލަކު ބުދަ ދުވަހު އޭބީސީ ނިއުސްއަށް ބުނީ އިސްރާއީލުން ރަފާހުގެ ހަމަލާ ކުރިއަށް ނުދާނެ އެއްވެސް ގޮތެއް ނެތް ކަމަށެވެ.

މިހާރުވެސް ހާލަތު ގޯސްވެފައިވާކަން ޑޮކްޓަރުން ކަށަވަރުކޮށްދީ ހަނގުރާމަ ހުއްޓާލުމަށް ގޮވާލާފައިވެއެވެ.