އީރާނުން ތެޔޮ އެތެރެކުރުން ހުއްޓާނުލައިފިނަމަ، ޗައިނާއަށް ދަތިކުރުމުގެ ހަރުކަށި ފިޔަވަޅުތަކެއް އަޅާނެކަމަށް އެމެރިކާގެ ރައީސް ޑޮނަލްޑް ޓްރަމްޕް ދެއްވި އިންޒާރަށް ޗައިނާއިން ވަރުގަދަ ރައްދެއް ދީފިއެވެ.
މިދިޔަ ހަފުތާގައި ޓްރަމްޕް ވިދާޅުވީ، ޗައިނާއިން އީރާނުގެ ތެޔޮ ގަންނަމުންދާނަމަ، އެމެރިކާއިން ބެއިޖިންއާ ދެކޮޅަށް %100 ޓެރިފް ނުވަތަ ދަތިކުރުމުގެ ފިޔަވަޅުތައް އަޅާނެ ކަމަށެވެ. މިއީ އީރާނުގެ އިގްތިސާދީ ވަސީލަތްތައް ހަނިކުރުމަށް އެމެރިކާއިން ކުރަމުންދާ މަސައްކަތުގެ ބައެއް ކަމަށް އޭނާ ފާހަގަކުރެއްވިއެވެ.
ނަމަވެސް، އެމެރިކާގެ މި ބިރުދެއްކުންތަކަށް ޗައިނާއިން ވަނީ ފާޅުގައި ގޮންޖަހާފައެވެ. ޗައިނާ ސަރުކާރުން ހާމަކުރި ގޮތުގައި، އެމެރިކާއިން %100 ނުވަތަ %200 ގެ ދަތިކުރުމުގެ ފިޔަވަޅުތައް އެޅިކަމުގައިވިޔަސް، އީރާނާއެކު އޮންނަ ވިޔަފާރީގެ ގުޅުންތައް ކަނޑައެއް ނުލާނެއެވެ. އަދި އަމިއްލަ ގައުމުގެ ހަކަތައިގެ ރައްކާތެރިކަމާއި އިގްތިސާދީ މަސްލަހަތު ހިމާޔަތްކުރުމުގައި ޗައިނާ ދެމިއޮންނާނެ ކަމަށް ބެއިޖިންއިން ބުނެފައިވެއެވެ.
ޗައިނާއިން ގަބޫލުކުރާ ގޮތުގައި އެހެން ގައުމުތަކުގެ ދާޚިލީ ކަންކަމާއި ވިޔަފާރީގެ މިނިވަންކަމަށް ހުރަސްއެޅުމަކީ ބައިނަލްއަގުވާމީ އުސޫލުތަކާ ޚިލާފު ކަމެކެވެ. އެހެންކަމުން، އެމެރިކާގެ އެއްފަރާތް ފެންނަ ނިންމުންތަކަށް ބޯލެނބުމުގެ ބަދަލުގައި، އީރާނާއެކު އޮތް ބަދަހި ގުޅުން އިތުރަށް ވަރުގަދަކުރާނެ ކަމުގެ އިޝާރާތެއް ޗައިނާއިން މިވަނީ ދީފައެވެ.
