ރަޝިޔާއިން ވައިގެ ހަމަލާތަކުގެ 'ރާޅެއް' ފެށުމާއެކު ވެރިރަށް ކިއެވްގައި އެތައް ގޮވުންތަކެއް ހިނގައި މުޅި ޔޫކްރޭން ވަނީ އެލާޓަށް ގެނެސްފައެވެ.

ޕޮލެންޑާ ބޯޑަރު އޮންނަ ލްވިވް ސަރަހައްދަށް ވެސް އަމާޒުކޮށް ފޮނުވި ކްރޫޒް މިސައިލްތަކުގެ ތެރެއިން އެއް މިސައިލް ޕޮލެންޑްގެ ވައިގެ ސަރަހައްދަށް ވަދެފައިވާ ކަމަށް އެގައުމުގެ ސިފައިން ބުނެ އެވެ.

ވެރިރަށް ކިޔެވްގައި މިހަމަލާތައް ފެށީ 05:00 (03:00 ޖީއެމްޓީ) ގައެވެ.

ޔޫކްރޭންގެ އަސްކަރިއްޔާއިން ބުނީ އެ ހަމަލާތަކުން ދިފާއުވުމަށް އެގައުމުގެ ވައިގެ ދިފާއީ ނިޒާމުތައް ހަރަކާތްތެރިވަމުން އަންނަ ކަމަށެވެ.

ކިއެވްގެ އަސްކަރީ އެޑްމިނިސްޓްރޭޝަންގެ އިސްވެރިޔާ ސެރްހީ ޕޮޕްކޯ ވިދާޅުވީ ވެރިރަށް ކިއެވް އާއި އެ ސަރަހައްދުގެ ވަށައިގެން ގާތްގަނޑަކަށް ޑަޒަނެއްހާ ރަޝިޔާގެ މިސައިލް ނައްތާލާފައިވާ ކަމަށެވެ.

ޓެލެގްރާމްގައި ނެރުނު ބަޔާނެއްގައި އޭނާ އިތުރަށް ވިދާޅުވެފައި ވަނީ އެ ހަމަލާތަކުގެ ސަބަބުން އެއްވެސް މީހަކަށް ގެއްލުމެއް ނުވަތަ ބޮޑެތި ގެއްލުންތަކެއް ލިބިފައިވާ ކަމުގެ ރިޕޯޓެއް ލިބިފައި ނުވާ ކަމަށެވެ.

ލްވިވްގެ މޭޔަރު އަންޑްރީ ސަޑޯވިއީ ޓެލެގްރާމްގައި ވިދާޅުވީ ޚުދު އެ ސިޓީއަށް ވެސް އެއްވެސް ގެއްލުމެއް ނުލިބޭ ކަމަށެވެ. ނަމަވެސް "ކްރިޓިކަލް އިންފްރާސްޓްރަކްޗާ" އަށް އަމާޒުކޮށްގެން ލްވިވް ސަރަހައްދަށް ގާތްގަނޑަކަށް 20 މިސައިލާއި ހަތް ހަމަލާ ޑްރޯން ފޮނުވާލާފައިވާ ކަމަށެވެ.

ޔޫކްރޭން ކުރިން ވަނީ ރަޝިޔާގެ ސްޓްރެޓެޖިކް ހަމަލާދޭ ބޯޓުތަކުން ކްރޫޒް މިސައިލް ފޮނުވާލާނެ ކަމުގެ އިންޒާރު ދީ މުޅި ގައުމުގެ އެލާޓެއްގެ ހާލަތަށް ގެނެސްފަ އެވެ.

މީގެ އިތުރުން ޕޮލެންޑުން ބުނެފައިވަނީ ރަޝިޔާއިން ފޮނުވާލި ކްރޫޒް މިސައިލްތަކުގެ ތެރެއިން އެއް މިސައިލްގެ އެގައުމުގެ ވައިގެ ސަރަހައްދަށް ހުއްދަނެތި އަރައިގަނެފައިވާ ކަމަށެވެ.

"އޮސެރްޑޯ ޓައުން ކައިރީގައި އޮންނަ ޕޮލިޝް ސްޕޭސްއަށް ވަދެ 39 ސިކުންތު ވަންދެން އެތަނުގައި އުދުހުނު" ސިފައިންގެ ބަޔާނުގައިވެއެވެ.

އާދީއްތަ ދުވަހުގެ ހަމަލާތަކާ ގުޅޭ ގޮތުން މޮސްކޯއިން އަދި އެއްޗެއް ބުނެފައެއް ނުވެއެވެ.

ރަޝިޔާއިން އިންސްޓޯލް ކޮށްފައިވާ ކްރައިމިއާގައި އޮންނަ ސެވަސްޓޮޕޯލް ބަނދަރުގެ ގަވަރުނަރު ވިދާޅުވީ ހޮނިހިރު ދުވަހުގެ ރޭ ދަންވަރު ރަޝިޔާގެ ސިފައިން އެ ސިޓީގެ މަތިން ޔޫކްރޭންގެ 10 މިސައިލް ވައްޓާލާފައިވާ ކަމަށެވެ.

އޮފީސް އިމާރާތަކާއި ގޭސް ލައިނެއް ހަލާކުވެ އަންހެނަކަށް އަނިޔާވެފައިވާ ކަމަށް ޓެލެގްރާމްގައި މިޚައިލް ރަޒްވޮޒާޔޭވް ބުންޏެވެ.