ނާސާގެ އެސްޓްރޮނޯޓް ޓްރޭސީ ސީ ޑައިސަން އާއި ރޮސްކޮސްމޯސްގެ ކޮސްމޮނޯޓް އޮލެގް ނޮވިޓްސްކީ އާއި ބެލަރޫސްގެ ސްޕޭސްފްލައިޓް ބައިވެރިޔާ މެރީނާ ވަސިލެވްސްކާޔާ ކަޒަކިސްތާނުން އައިއެސްއެސް އަށް ކާމިޔާބުކަމާއެކު ފޮނުވާލައިފިއެވެ.

ނާސާގެ އެސްޓްރޮނޯޓް ޓްރޭސީ ސީ ޑައިސަން ހިމެނޭ ގޮތަށް ތިން ކްރޫ މެމްބަރަކު ހޮނިހިރު ދުވަހުގެ ހެނދުނު 8:36 ގައި ކަޒަކިސްތާނުގެ ބައިކޮނޫރު ކޮސްމޮޑްރޯމް އިން އިންޓަނޭޝަނަލް ސްޕޭސް ސްޓޭޝަން (އައިއެސްއެސް) އަށް ކާމިޔާބުކަމާއެކު ފޮނުވާލި މި މިޝަން އުދުހެން ހަމަޖެހިފައި އޮތީ މާޗް މަހުގެ 21 ވަނަ ދުވަހު ނަމަވެސް ކަރަންޓުގެ މައްސަލައެއް ދިމާވެގެން އެ ލޯންޗު ސްކްރަބް ކޮށްފައިވެ އެވެ.

ޑައިސަން އާއި އެކު އޭނާގެ ކްރޫ މޭޓުން ކަމަށްވާ ރޮސްކޮސްމޯސްގެ ކޮސްމޮނޮޓް އޮލެގް ނޮވިޓްސްކީ އާއި ބެލަރޫސްގެ ފްލައިޓް އެޓެންޑެންޓެއް ކަމަށްވާ ސްޕޭސްފްލައިޓް ބައިވެރިޔާ މެރީނާ ވަސިލެވްސްކާޔާ މާޗް 25 ވާ ހޯމަ ދުވަހުގެ ހެނދުނު ގާތްގަނޑަކަށް 11:09 ގައި ސޮޔޫޒް އެމްއެސް-25 ޖައްވީ އުޅަނދުގައި ސްޕޭސް ސްޓޭޝަންގެ ޕްރިޗަލް މޮޑިއުލަށް ބަނދަރު ކުރާނެ އެވެ.

ޑޮކިން ކަވަރޭޖް ފަށާނީ ހެނދުނު 10:15 ގައި ނާސާ+، ނާސާ ޓެލެވިޜަން، ނާސާ އެޕް، ޔޫޓިއުބް، އަދި އެޖެންސީގެ ވެބްސައިޓުންނެވެ.  އަދި ނާސާއިން އޯބިޓަލް އައުޓްޕޯސްޓުގައި އެރުމާއެކު ކްރޫއަށް މަރުހަބާ ކިޔުމުގެ ހަފްލާ މެންދުރު 1:15 އިން ފެށިގެން ނާސާ+ އިން އެއާ ކަވަރޭޖް ބްރޯޑްކާސްޓު ކުރާނެއެވެ.

ސްޓޭޝަނާއި ސޮޔޫޒް އާއި ދެމެދުގެ ހެޗްތައް ގާތްގަނޑަކަށް މެންދުރު 1:40 ގައި ހުޅުވާއިރު، އާ ކްރޫ މެމްބަރުންނާ ގުޅޭނީ ނާސާގެ އެސްޓްރޮނޯޓުން ކަމަށްވާ ލޯރަލް އޮހަރާ، މެތިއު ޑޮމިނިކް، މައިކް ބާރަޓް، އަދި ޖެނެޓް އެޕްސްގެ އިތުރުން ރޮސްކޯސްމޯސްގެ ކޮސްމޮނޯޓުން ކަމަށްވާ އޮލެގް ކޮނޮނެންކޯ، ނިކޮލައި ޗުބް،  އަދި މިހާރުވެސް ސްޕޭސް ސްޓޭޝަންގައި ދިރިއުޅެމުންދާ އަދި މަސައްކަތްކުރާ އެލެގްޒެންޑަރ ގްރެބެންކިން އެވެ.

ނޮވިޓްސްކީ އާއި ވަސިލެވްސްކާޔާ 12 ދުވަސް ވަންދެން ސްޓޭޝަންގައި ތިބޭއިރު، އޭގެ ފަހުން އޭޕްރީލް މަހުގެ ހަ ވަނަ ދުވަހު ހޮނިހިރު ދުވަހު ސޯޔޫޒް ކެޕްސޫލެއްގައި އެނބުރި ބިމަށް އަންނާނެއެވެ.

އެކްސްޕެޑިޝަން 70 އަދި 71 ގެ ފްލައިޓް އިންޖިނިއަރެއްގެ ގޮތުގައި ޑައިސަން ހަ މަސް ދުވަހު ސްޓޭޝަންގައި ހޭދަކުރާއިރު، ސެޕްޓެމްބަރު މަހު ދުނިޔެއަށް އެނބުރި އަންނާނީ އޮލެގް ކޮނޮނެންކޯ އާއި ރޮސްކޮސްމޯސްގެ ނިކޮލައި ޗުބް އާއި އެކު އެވެ.

މިއީ ޑައިސަންގެ ތިން ވަނަ ސްޕޭސްފްލައިޓާއި ނޮވިޓްސްކީގެ ހަތަރު ވަނަ އަދި ވަސިލެވްސްކާޔާގެ ފުރަތަމަ ސްޕޭސްފްލައިޓަށް ވާނެ އެވެ.