ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި ވޯޓުލާ މަރުކަޒުތަކުގައި ހަރަކާތްތެރިވާނެ އޮފިޝަލުން ހޯދަން އިއުލާންކޮށްފައިވީނަމަވެސް، މާލެ އޭރިއާއަށް އެކަށީގެންވާ ވަރަށް އަދިވެސް އޮފިޝަލުން ނުލިބޭ ކަމަށް އިލެކްޝަންސް ކޮމިޝަނުން ބުނެފިއެވެ.

އެޕްރީލް 21 ވާ އާދީއްތަ ދުވަހު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ އިންތިޚާބު ގެ އޮފިޝަލުންގެ ގޮތުގައި ޙަރަކާތްތެރިވުމަށް ޝައުޤުވެރިވާ ފަރާތްތަކަށް އެ ފުރުސަތު ވަނީ ހުޅުވާލާފައެވެ.

ކުރިމަތިލުމުގެ ސުންގަނޑައަކީ މި މަހުގެ 27 ވަނަ ދުވަހެވެ.

އޮފިޝަލުންގެ ކަންތަކާއި ގުޅޭގޮތުން މައުލޫމާތުދެއްވަމުން އިލެކްޝަންސް ކޮމިޝަންގެ ސެކްރެޓަރީ ޖެނެރަލް ހަސަން ޒަކަރިއްޒާ ވިދާޅުވީ މާލެ އޭރިއާއަށް 400 އޮފިޝަލުން މަދުވާ ކަމަށެވެ.

ނަމަވެސް ރަށްރަށަށް ބޭނުންވާ ވަރަށް އޮފިޝަލުން ލިބިފައިވާ ކަމަށެވެ. އަދި މާލެ ސަރަހައްދަށް ބޭނުންވާ ވަރަށް އޮފިޝަލުން ނުލިބޭނަމަ އަނެއްކާވެސް އިއުލާން ކުރާނެ ކަމަށް ހަސަން ވިދާޅުވިއެވެ.

މީގެ އިތުރުން އޮފިޝަލް ޓްރެއިނިންގ ފަށައިގެން ކުރިއަށްދާ ކަމަށާއި، ރޯދަމަސް ނިންމާފައި ރިފްރެޝާ ޕްރޮގްރާމް ކުރިއަށްގެންދާނެ ކަމަށްވެސް އޭނާ ވަނީ ވިދާޅުވެފައެވެ.