ދެކުނު ކޮރެއާގެ ހަޅުތާލުގައި ސީނިއާ ޑޮކްޓަރުން އިސްތިއުފާދީފިއެވެ.
ދެކުނު ކޮރެއާގެ ބޮޑެތި ހޮސްޕިޓަލްތަކުގެ ސީނިއާ ޑޮކްޓަރުން އިސްތިއުފާ ހުށަހަޅަން ފެށީ މެޑިކަލް ސްކޫލްތަކަށް އާ ދަރިވަރުން ވަރަށް ބޮޑަށް އިތުރުކުރުމަށް ސަރުކާރުން ކުރަމުންދާ މަސައްކަތާ ގުޅިގެން ފަސް ހަފުތާވަންދެން ހަޅުތާލު ކުރަމުން އަންނަ މެޑިކަލް އިންޓާންތަކަށް ތާއީދުކުރުމުގެ ގޮތުންނެވެ.
އިސް ޑޮކްޓަރުންގެ މި ފިޔަވަޅުގެ ސަބަބުން ދެކުނު ކޮރެއާގެ ހޮސްޕިޓަލްތަކުގެ އޮޕަރޭޝަންތައް ވަގުތުން ގޯސްވާނެ ކަމަކަށް ނުބެލެވެއެވެ. އެއީ އިސްތިއުފާ ހުށަހެޅި ފަހުން ވެސް މަސައްކަތް ކުރަމުން ގެންދާނެ ކަމަށް ބުނެފައިވާތީ އެވެ. ޑޮކްޓަރުންގެ އިސްތިއުފާ ހުށަހެޅުންތައް ހުށަހެޅީ ހަޅުތާލުކުރާ ޖޫނިއާ ޑޮކްޓަރުންނާ ދެކޮޅަށް އަޅާ ފިޔަވަޅުތައް ލުއި ކުރާނެ ކަމަށް ރައީސް ޔޫން ސުކް ޔެއޯލް ބުނެ ޑޮކްޓަރުންނާ މަޝްވަރާ ކުރުމަށް ގޮވާލެއްވުމުންނެވެ.
ގާތްގަނޑަކަށް 12،000 އިންޓަރންސް އަދި މެޑިކަލް ރެޒިޑެންޓުންގެ ހަޅުތާލު ނިންމާލަން ދެކޮޅު ހެދުމުން މެޑިކަލް ލައިސަންސް ސަސްޕެންޑް ކުރާނެކަމުގެ އިންޒާރު ވަނީ ދީފައެވެ.
ހަޅުތާލު ކުރާ އިންޓާނުން ބުނަނީ އެގައުމުގެ މެޑިކަލް ސްކޫލްތަކަށް ވަނުމުގެ ކެޕް ތިންބައިކުޅަ ދެބައި އިތުރުކުރުމަށް ސަރުކާރުން ރާވާފައިވާ ޕްލޭނާ ދެކޮޅު ހަދައި، ދަރިވަރުންގެ އަދަދު މިހާ ބޮޑުތަނުން އިތުރުވުމަކީ ސްކޫލްތަކަށް ހައްލު ނުކުރެވޭނެ ކަމެއް ކަމަށާއި އެންމެ ފަހުން ދެކުނު ކޮރެއާގެ މެޑިކަލް ހިދުމަތްތަކަށް ގެއްލުންވާނެ ކަމަށެވެ. އެކަމަކު އޮފިޝަލުން ބުނާ ގޮތުގައި އިތުރު ޑޮކްޓަރުން ބޭނުންވަނީ ދެކުނު ކޮރެއާގެ އާބާދީއަކީ ހަލުވިކަމާއެކު މުސްކުޅި ވަމުން އަންނަ އާބާދީއެއް ކަމަށާއި އެގައުމުގެ ޑޮކްޓަރުންނާ އާބާދީގެ ނިސްބަތަކީ ތަރައްގީވެފައިވާ ދުނިޔޭގައި އެންމެ ދަށް އެއް ގައުމު ކަމަށް ވާތީ ކަމަށެވެ.
ގަވަނިން ޕާޓީގެ ލީޑަރު ހާން ޑޮންގް ހޫންއާ އެކު ހުކުރު ދުވަހު ބޭއްވި ބައްދަލުވުމެއްގައި ޔުނިވާސިޓީ ހޮސްޕިޓަލްގެ ގާތްގަނޑަކަށް 40 މެޑިކަލް ޕްރޮފެސަރުންނާއި ޑޮކްޓަރުންގެ މަންދޫބުން ވަނީ ހަޅުތާލުކުރާ ޑޮކްޓަރުންނަށް ތާއީދު ފާޅުކޮށް، ސަރުކާރުގެ ރިކްރޫޓްމަންޓް ޕްލޭންގެ ސަބަބުން "މި ގައުމުގެ މެޑިކަލް ސިސްޓަމް ސުންނާފަތިވާނެ" ކަމަށް ބުނެފައެވެ.
