އެމެރިކާގެ އޮފިޝަލުންނަށް އަމާޒުކޮށްގެން ޗައިނާގެ ހެކިން ކެމްޕޭނެއްގައި އެމެރިކާގެ އެތައް މިލިއަން ބައެއްގެ އޮންލައިން އެކައުންޓްތައް ޖެހިފައިވާ ކަމަށް ޖަސްޓިސް ޑިޕާޓްމަންޓާއި އެފްބީއައި އިން ހޯމަ ދުވަހު ބުނެފި އެވެ.
ޗައިނާގެ ހަތް ރައްޔިތެއްގެ މައްޗަށް ވަނީ ފުޅާދާއިރާއެއްގައި ސައިބަރ އެޓޭކް ކެމްޕޭނެއް ހިންގުމުގެ ދައުވާ އުފުލާފައެވެ.
އެމީހުންގެ މައްޗަށް ތުހުމަތު ކުރެވެނީ 14 އަހަރު ވަންދެން ހިންގި ހެކިން އޮޕަރޭޝަނަކާ ގުޅުން ހުރި ކަންކަމުގައެވެ.
އެމެރިކާގެ ސްޓޭޓް ޑިޕާޓްމަންޓުން ވަނީ އެ ހަތް މީހުންނާ ބެހޭ މައުލޫމާތު ހޯދަން 10 މިލިއަން ޑޮލަރާ ހަމައަށް އިނާމެއް ދޭނެ ކަމަށް އިއުލާންކޮށްފަ އެވެ.
ޖަސްޓިސް ޑިޕާޓްމަންޓުން ބުނީ ހެކަރުން އަމާޒުކޮށްފައި ވަނީ އެމެރިކާ އާއި ބޭރުގެ ޗައިނާއަށް ފާޑުކިޔާ މީހުންނާއި ވިޔަފާރިވެރިންނާއި ސިޔާސީ ބޭފުޅުންނަށް ކަމަށެވެ.
ޗައިނާ ސަރުކާރުން ތާއީދުކޮށްގެން ހިންގި "ޕްރޮލިފިކް ގްލޯބަލް ހެކިން އޮޕަރޭޝަނެއް" ގައި އެ ހަތް މީހުން 10،000 އަށް ވުރެ ގިނަ ވައިރަސް އެކުލެވޭ އީމެއިލް ފޮނުވައި، އެތައް ހާސް ބަޔަކު ޝިކާރައަކަށް ހަދާފައިވެއެވެ.
"މިއަދުގެ އިއުލާނުން ހާމަވެގެންދަނީ އަހަރެމެންގެ ގައުމުގެ ސައިބަރ ސެކިއުރިޓީއާ ދެކޮޅަށް، އެމެރިކާ މީހުންނާއި އަހަރެމެންގެ އިނޮވޭޝަނަށް އަމާޒުކޮށްގެން ޗައިނާއިން މެދުނުކެނޑި ކުރަމުންދާ ބުރަ މަސައްކަތެއް،" އެފްބީއައިގެ ޑިރެކްޓަރު ކްރިސްޓޮފަރ ވްރޭ ވިދާޅުވި އެވެ.
ވޮޝިންޓަން ޑީސީގައި ހުންނަ ޗައިނާ އެމްބަސީގެ ތަރުޖަމާނަކު ވިދާޅުވީ މިއީ "ސައްހަ ހެކި ނެތި އަސާސެއް ނެތް ތުހުމަތުތަކެއް" ކަމަށެވެ.
