ކޮލަމްބިއާގެ އައްސޭރީގައި އޮންނަ ކެރިބިއަން ކަނޑުގައި މި އަހަރުގެ އެންމެ ބޮޑު ކޮކެއިން ޝިޕްމަންޓް އަތުލައިގަތްކަން ކަމާބެހޭ ފަރާތްތަކުން އިއުލާންކޮށްފިއެވެ. އަސްކަރީ ބޯޓުތަކުން ފަހާ ދުވެ، ސްޕީޑް ބޯޓެއް ހިފަހައްޓައި ގާތްގަނޑަކަށް ހަތަރު ޓަނުގެ މަސްތުވާތަކެތި ހިފަހައްޓާފައިވެއެވެ.

ކޮލަމްބިއާގެ ނޭވީއާއި ކޮލަމްބިއާގެ އެއާފޯސް އަދި އެމެރިކާގެ ދެކުނު ކޮމާންޑްގެ ޖޮއިންޓް އިންޓައޭޖެންސީ ޓާސްކް ފޯސް ގުޅިގެން ހިންގި އޮޕަރޭޝަނެއްގައި ކަމާބެހޭ ފަރާތްތަކުން ވަނީ ސެން އަންޑްރެސް އިސްލާ ކައިރީގައި ހުރި އުޅަނދުން ކޮކެއިން އަތުލައިގަނެފަ އެވެ. މި ބޯޓު ފަހާ ދުވި ވީޑިއޯއެއް އާންމުކުރިއިރު، އެ ވީޑިއޯގައި ބުނެފައި ވަނީ ޝައްކު ކުރެވޭ އުޅަނދުގެ ފަޅުވެރިން "ފެނަށް ޕެކޭޖުތައް އުކާލި" ކަމަށެވެ.

އެތައް މޭލެއް ވަންދެން ފަހާ ދުވުމަށް ފަހު، އެންމެ ފަހުން އެ ބޯޓު ހުއްޓުވި ކަމަށް އޮފިޝަލުން ބުންޏެވެ. ސްޕީޑްބޯޓުގައި ތިބި ކޮލަމްބިއާގެ ތިން މީހުންނާއި ހޮންޑޫރަސްގެ މީހަކާއި ވެނެޒުއެލާގެ މީހަކު ހިފަހައްޓާފައިވާއިރު، އޭގެ ފަހުން ކުރި ޓެސްޓްތަކުން ވަނީ އެ ދޯނީގައި 3،355 ކިލޯގެ ކޮކެއިން ނުވަތަ ގާތްގަނޑަކަށް 3.7 ޓަނުގެ މަސްތުވާތަކެތި ހުރިކަން ކަށަވަރުވެފަ އެވެ.

ނޭވީގެ ވީޑިއޯއިން ފެންނަ ގޮތުގައި އޮފިސަރުން އަތުލައިގަތް ކޮކެއިންގެ އެތައް ސަތޭކަ ޕެކޭޖެއް އޮފްލޯޑްކޮށް ހަމަޖައްސަމުންދާއިރު، އޮފިޝަލުން ބުނާ ގޮތުގައި އެއީ އަށް މިލިއަނަށް ވުރެ ގިނަ ޑޯޒް ކަމަށާއި، އެއީ "އެކި ގައުމުތަކުގެ މަގުތަކަށް ދެން ނުފޯރާނެ ތަކެތި" ކަމަށާ "މިހެންވުމުން އާންމު ސިއްހަތަށް ކުރާ އަސަރުތަކުން ސަލާމަތްވެވޭނެ" ކަމަށެވެ.

މަސްތުވާތަކެއްޗާއި އެކު ފަސް މީހަކު އެޓާނީ ޖެނެރަލްގެ އޮފީހާ ހަވާލުކޮށްފައިވާ ކަމަށް ނޭވީން ބުންޏެވެ.

ކޮލަމްބިއާ-ޔޫ.އެސް. ކެރިބިއަން ކަނޑުގައި ހިންގި އޮޕަރޭޝަން ކުރިއަށް ދިޔައީ އިނގިރޭސި ހަނގުރާމަ މަނަވަރަކާއި އެމެރިކާގެ ޕެޓްރޯލް މަތިންދާބޯޓެއް ސްޕީޑްބޯޓެއް ފަހަތުން ދުއްވައިގަތް ކަމަށް އޮފިޝަލުން އިއުލާން ކުރިތާ ދުވަސްކޮޅެއް ފަހުންނެވެ. ގާތްގަނޑަކަށް ތިން ޓަނުގެ ކޮކެއިން އާއި އެހެނިހެން މަސްތުވާތަކެތި އަތުލައިގެންފައިވާ ކަމަށް އިނގިރޭސިވިލާތުގެ ޑިފެންސް މިނިސްޓްރީން ބުނެފި އެވެ.

ކޮލަމްބިއާގެ އައްސޭރީގައި މަސްތުވާތަކެތި ހޯދުމަކީ ވެސް އާންމު ކަމެކެވެ.

މިދިޔަ މަހު ކޮލަމްބިއާގެ ޕެސިފިކް އައްސޭރީގައި ގެއްލިފައިވާ ދެ މަސްވެރިން ހޯދުމުގެ މިޝަނެއްގައި ތިބި ކަމާބެހޭ ފަރާތްތަކަށް އޭގެ ބަދަލުގައި ފެނުނީ ހަތަރު ޓަނަށް ވުރެ ގިނަ ކޮކެއިން ފުރިފައިވާ ސެމީ ސަބްމަރސިބަލް އުޅަނދެއް ކަމަށް އޮފިޝަލުން ބުނެ އެވެ. "ނާކޯ ސަބް" ކަމަށް ބުނާ މި އުޅަނދު ހުއްޓުވާފައި ވަނީ ކޮލަމްބިއާ އާއި އިކުއެޑޯގެ ކަނޑުގެ ސިފައިންނާއި ކޮލަމްބިއާގެ ވައިގެ ސިފައިން ގުޅިގެން ހިންގި އޮޕަރޭޝަނެއްގައި ކަމަށް ކޮލަމްބިއާގެ ކަނޑުގެ ސިފައިން ބުނެ އެވެ.