ޣައްޒާގެ ހަމާސް މީޑިއާ އޮފީހުން ނެރުނު ބަޔާނެއްގައި ބުނީ ޣައްޒާގެ އުތުރުގެ މައްޗަށް ވައިގެ މަގުން ވައިކުޑައިގައި ވައްޓާލި އެހީ ހޯދަން މަސައްކަތް ކުރަމުން ދަނިކޮށް ފަލަސްތީނުގެ 18 މީހަކު މަރުވެފައިވާ ކަމަށެވެ.

ކާބޯތަކެތީގެ ޕެކޭޖުތައް ނަގަން މޫދަށް ދިޔައިރު 12 މީހަކު ގެނބިގެން މަރުވެފައިވާއިރު، އަނެއް ހަ މީހުން ފިތި ބާރުވެގެން މަރުވެފައިވާކަމަށެވެ.

އެބަޔާނުގައި އެއާޑްރޮޕްތައް "ވަގުތުން ނިމުމަކަށް ގެނައުމަށް" ގޮވާލާއިރު، އެއީ "ގޯސް، އެކަށީގެން ނުވާ އަދި ބޭކާރު" ގޮތެއް ކަމަށް ބުނެފައިވެއެވެ.

ރޮއިޓާސްއަށް ލިބިފައިވާ ވީޑިއޯއެއްގައި ފެންނަ ގޮތުގައި ހޯމަ ދުވަހު އުތުރުގެ ރަށެއް ކަމަށްވާ ބައިތު ލާހިއާ ކައިރީގައި އޮންނަ ގޮނޑުދޮށަކަށް އެހީތައް ވައްޓާލުމުން ފަލަސްތީނުގެ ރައްޔިތުން ދުއްވައިގަތެވެ. އަދި ޕެރަޝޫޓްތަކުގައި ހަރުކޮށްފައިވާ ދިހަވަރަކަށް އެހީގެ ޕެކޭޖުތައް އައްސޭރިފަށާ ކައިރިން ތިރިއަށް އޮޔާދާ މަންޒަރު ފެނެއެވެ.

ބިމުން ޣައްޒާއަށް އިތުރު އެހީ ދިނުމަށް ހުއްދަ ދިނުމަށް އެކު ފަރާތްތަކުން ޕްރެޝަރު ކުރަމުންދާ އިސްރާއީލުން ބުނީ ހޯމަ ދުވަހު ޣައްޒާގެ އުތުރުގެ މައްޗަށް އެއް ޓަނުގެ 159 ޕެކޭޖުގެ އެހީ ވައިގެ މަގުން ފޮނުވާލުމަށް މަގުފަހިކޮށްދިން ކަމަށެވެ.

އެމެރިކާއިން ބުނާ ގޮތުގައި ސީ-17 ގެ ދެ މަތިންދާބޯޓަކުން ހޯމަ ދުވަހު އުތުރުގެ މައްޗަށް 46،000 "މީލްސް ރެޑީ ޓު އީޓް" (އެމްއާރުއީ) ވައްޓާލިކަމަށެވެ. އިނގިރޭސިވިލާތުން ބުނާ ގޮތުގައި އެގައުމުގެ އޭ400އެމް މަތިންދާބޯޓުން 10 ޓަނުގެ ފެނާއި ބިހާއި ކެއްކުމަށް ބޭނުންކުރާ ތެލާއި ފުށާއި ދާޅުކާނާ އަދި ބޭބީ ފޯމިއުލާ އެއާ ޑްރޮޕް ކުރިކަމަށެވެ.

އިންސާނީ އެހީތެރިކަން ފޯރުކޮށްދޭ ޖަމިއްޔާތަކުން އިންޒާރު ދީފައި ވަނީ އެއާޑްރޮޕްސް އިން ކާބޯތަކެތީގެ ބޭނުން ބޮޑުވަމުންދާ މިންވަރު ފުއްދައި ނުދެވޭނެ ކަމަށާއި އެ ސްޓްރެޓެޖީއާ މެދު ގިނަ މަޝްވަރާތަކެއް އުފެދިފައިވާ ކަމަށެވެ.