ރަޝިޔާއިން ރޭގަނޑު ފޮނުވާލި 28 ޑްރޯން ހަމަލާގެ ތެރެއިން 26 ޑްރޯން ޔޫކްރޭން ސިފައިން ވައްޓާލި ކަމަށް ކިއެވްގެ އަސްކަރިއްޔާއިން ބުރާސްފަތި ދުވަހު ބުނެފި އެވެ.
އީރާނުން އުފައްދާފައިވާ ޑްރޯންތައް ނައްތާލާފައިވަނީ ޔޫކްރޭންގެ އިރުމަތީ، ދެކުނާއި އިރުދެކުނު ބައެއް ސަރަހައްދުތަކުގެ މަތުން ކަމަށް ވައިގެ ސިފައިން އިތުރަށް ބުނެއެވެ.
ޒަޕޮރިޒްޒިއާ ސަރަހައްދުގެ ގަވަރުނަރު ޓެލެގްރާމްގައި ވިދާޅުވީ ސަރަހައްދީ ވެރިރަށުގެ މީހުން ދިރިއުޅޭ އަވަށްތަކެއްގައި ހަލާކުވި ޑްރޯންގެ ކުނޑިތައް ޖެހި ދެ އަންހެނުންނަށް ޒަޚަމްވެފައިވާ ކަމަށެވެ.
އިރުމަތީ ޚާރްކިވް ސަރަހައްދުގެ ޕްރޮސެކިއުޓަރުން ބުނީ ތިން ޑްރޯނެއްގެ ކުނޑިތަކެއްގެ ސަބަބުން ރެސްޓޯރެންޓަކާއި ފިހާރައަކާއި އޮފީސްތަކަށް ގެއްލުން ލިބިފައިވާ ކަމަށެވެ.
ވައިގެ ސިފައިން އިތުރަށް ބުނެފައިވަނީ ރަޝިޔާއިން ރޭގެ ހަމަލާގައި އެތައް ވައްތަރެއްގެ މިސައިލްތަކެއް ހިމެނޭ ކަމަށެވެ.
އަސްކަރިއްޔާގެ ދެކުނު ކޮމާންޑުން ޓެލެގްރާމްގައި ރިޕޯޓްކޮށްފައިވާ ގޮތުގައި ކަޅު ކަނޑުގެ މަތިން މަތިންދާބޯޓުތަކުން ފޮނުވާލި ޑްރޯން ތަކުގެ "ހަނގުރާމައިގެ ގާބިލްކަން ގެއްލިފައިވާ" ކަމަށެވެ.
އޮޑެސާ ސަރަހައްދުގެ ގަވަރުނަރު އޮލެހް ކިޕާ ވިދާޅުވީ ހެނދުނުގެ ވަގުތެއްގައި ރަޝިޔާއިން ވަކި މިސައިލް ހަމަލާއެއް ދިން ނަމަވެސް އެއްވެސް މީހަކަށް އަނިޔާއެއް ލިބިފައި ނުވާ ކަމަށެވެ.
