މެދުއިރުމަތީގެ ބައެއް ޤައުމުތަކުގެ ވައިގެ ސަރަޙައްދު ބަންދުކުރުމުގެ ސަބަބުން ފަސިންޖަރުންނަށް ދިމާވެފައިވާ ދަތިތަކަށް ހައްލު ހޯދައިދިނުމުގެ ގޮތުން މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ގިނަ މަސައްކަތްތަކެއް ކުރަމުން އަންނަކަމަށް އެކުންފުނިން ބުނެފިއެވެ.
އިރާނަށް އިސްރާއީލާއި އެމެރިކާ އިން ދިން ހަމަލާތަކުގެ ބަދަލެއްގެ ގޮތުން އިރާނުން މެދުއިރުމަތީގައި އެމެރިކާގެ ބޭސްތައް ހުންނަ ގައުމުތަކަށް ދެމުންދާ ހަމަލާތަކާއެކު މެދުއިރުމަތީގެ ބައެއް ގައުމުތަކުގެ ވައިގެ ސަރަހައްދު ވަނީ ބަންދުކޮށްފައެވެ. މިއާއެކު ގިނަ ފްލައިޓްތަކެއް ވަނީ ކެންސަލްވެފައެވެ.
އެމްއޭސީއެލުން ބުނީ ތަފާސް ހިސާބުތަކަށް ބަލާއިރު 28 ފެބްރުއަރީ 2026 ގައި ޖުމްލަ 9 ފްލައިޓެއް ކެންސަލްވެ، ގާތްގަނޑަކަށް 1,716 ފަސިންޖަރުންނަށް އެކަމުގެ ދަތިތަކާއި ކުރިމަތިވެފައިވާކަމަށެވެ. 1 މާރިޗު 2026 ގައި 19 ފްލައިޓެއް ކެންސަލްވެ، ގާތްގަނޑަކަށް 3,530 ފަސިންޖަރުންނަށް އެކަމުގެ ދަތިތަކާއި ކުރިމަތިވެފައިވާކަމަށް އެމްއޭސީއެލުން ބުނެއެވެ.
އެމްއޭސީއެލުން ބުނީ ފްލައިޓްތައް ކެންސަލްވުމާއި ގުޅިގެން 28 ފެބްރުއަރީ ގައި ވެލާނާ އިންޓަރނޭޝަނަލް އެއަރޕޯޓުގައި ޑިސްރަޕްޝަން މެނޭޖްމެންޓް ސެންޓަރެއް ޤާއިމްކުރެވި ޚިދުމަތް ފޯރުކޮށްދިނުމުގެ މަސައްކަތް ފެށިފައިވާކަމަށެވެ. މި މަސައްކަތުގެ ތެރެއިން ފަސިންޖަރުންނަށް ލުއިފަސޭހަ އިންތިޒާމުތައް ހަމަޖައްސައިދިނުމަށްޓަކައި ޑޮމެސްޓިކް ޓަރމިނަލް މިހާރު އަންނަނީ ބޭނުންކުރެވެމުންކަމަށް އެކުންފުނިން ބުނެއެވެ. މި މަސައްކަތުގައި ކަމާގުޅުންހުރި ފަރާތްތަކުގެ އެހީތެރިކަމާއެކު، ރޭގެ ނިޔަލަށް 130 ފަސިންޖަރުންނަށް ޒަރޫރީ އެހީތެރިކަން ފޯރުކޮށްދެވިފައިވާކަމަށްވެސް އެމްއޭސީއެލުން ބުނެއެވެ.
