ރަޝިޔާގެ މީރް ޕޭމަންޓް ސިސްޓަމް އަންނަ ހަފްތާއިން ފެށިގެން ސެމްސަންގްގެ މޯބައިލް ޕޭމަންޓް ހިދުމަތުގައި ދެން ބޭނުން ނުކުރެވޭނެ ކަމަށް ދެކުނު ކޮރެއާގެ ކުންފުނިން ބުދަ ދުވަހު ބުނެފި އެވެ.

"2024 ވަނަ އަހަރުގެ އޭޕްރީލް މަހުގެ ތިން ވަނަ ދުވަހުން ފެށިގެން ސެމްސަންގް ޕޭއަށް މީރު ކާޑު އިތުރުކޮށް ބޭނުން ނުކުރެވޭނެ،" ސެމްސަންގުގެ ވެބްސައިޓުގައި ޝާއިއުކުރި ބަޔާނެއްގައި ބުނެފައިވެ އެވެ.

“ސެމްސަންގް ޕޭ އެއްވެސް ބަދަލެއް ނުގެނެސް ބެލަރޫސްގައި މަސައްކަތް ކުރަމުން ގެންދާނެ. ސެމްސަންގް ޕޭގައި ރިޕަބްލިކް އޮފް ބެލަރޫސް އިން އަޅުގަނޑުމެންގެ ޕާޓްނަރ ބޭންކުތަކުގެ ވިސާ އަދި މާސްޓަކާޑް ކާޑު އިތުރުކޮށް ބޭނުން ކުރެވޭނެ،” އެ ކުންފުނިން އިތުރަށް ބުނެފައިވެ އެވެ.

މިދިޔަ މަހު އެމެރިކާއިން ވަނީ ޔޫކްރޭނަށް ރަޝިޔާއިން އަރައިގަތްތާ ދެވަނަ އަހަރީ ދުވަހާ ގުޅުވައިގެން މޮސްކޯއަށް ބޮޑު ދަތިކުރުމުގެ ފިޔަވަޅުތައް އެޅުމުގެ ގޮތުން މީރުގެ އޮޕަރޭޓަރު ނޭޝަނަލް ޕޭމަންޓް ކާޑު ސިސްޓަމަށް ދަތިކުރުމުގެ ފިޔަވަޅުތައް އަޅާފައެވެ.

ރަޝިޔާގެ އާބާދީގެ ދެބައިކުޅަ އެއްބައި މީހުން މީރު ކާޑު ބޭނުން ކުރެއެވެ.

ސެމްސަންގް ޕޭ އަކީ މޮސްކޯއިން ޔޫކްރޭނަށް އަރައިގަތްތާ މާގިނަ ދުވަހެއް ނުވެ އެޕަލް ޕޭ އާއި ގޫގުލް ޕޭ އަށްފަހު ރަޝިޔާގެ ޕޭމަންޓް ސިސްޓަމާ ގުޅުން ކަނޑާލި ތިން ވަނަ ޑިޖިޓަލް ވޮލެޓް ހިދުމަތެވެ.

މީގެ އިތުރުން އެންޑްރޮއިޑް އެޕް ސްޓޯރު ގޫގުލް ޕްލޭ އިން މީރު ޕޭ އެޕް ނަގާފައިވާ ކަމަށް ރިޕޯޓްތައް ބުނާއިރު، ބުދަ ދުވަހުގެ މެންދުރާ ހަމައަށް އެ ކުންފުނީގެ ރަސްމީ ބަޔާނެއް ނެރެފައެއް ނުވެ އެވެ.