އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ހަރނިއާ ހުރުމުން ފުލް އެނެސްތީޝިއާގެ ދަށުން އޮޕަރޭޝަނެއް ކުރާނެ ކަމަށް އޭނާގެ އޮފީހުން ނެރުނު ބަޔާނެއްގައި ބުނެފައިވެ އެވެ.

އުމުރުން 74 އަހަރުގެ ނަތަންޔާހޫއަށް ހަރނިއާ ޖެހިފައިވާކަން އެނގުނީ ހޮނިހިރު ދުވަހު ރޫޓިން ޗެކަޕެއް ތެރެއިން ކަމަށާއި އޭނާގެ ސާޖަރީ ހަމަޖެހިފައިވަނީ އާދީއްތަ ދުވަހު ކަމަށް ބަޔާނުގައިވެ އެވެ.

މި ސާޖަރީގެ މާނައަކީ އޮކްޓޯބަރު ހަތް ވަނަ ދުވަހު ދިން ހަމަލާތަކާ ގުޅިގެން ޣައްޒާގައި ހަމާސްއާ ހަނގުރާމަ ކުރަމުންދާ އިސްރާއީލުގެ ލީޑަރު ވަގުތީ ގޮތުން ކޮމާންޑް ކުރުން ހުއްޓާލާނެ ކަމެވެ.

ނަތަންޔާހޫ ހޭނައްތާފައި އޮންނަ އިރު އޭނާގެ މަސްއޫލިއްޔަތާ ވަގުތީގޮން ހަވާލުވާނީ އިސްރާއީލުގެ ބޮޑުވަޒީރުގެ ނައިބު އަދި ޖަސްޓިސް މިނިސްޓަރު ޔާރިވް ލެވިން އެވެ.