އެމެރިކާގެ ޑިޕްލޮމެޓުންނާއި ޖާސޫސުންނަށް ކުރިމަތިވެފައިވާ "ހަވާނާ ސިންޑްރޯމް" ބައްޔަކީ ރަޝިޔާގެ އަސްކަރީ ޖާސޫސީ ސެބޮޓޭޖް ޔުނިޓެއްގެ މެމްބަރުން ގެންގުޅޭ 'ހަކަތަ' ހަތިޔާރާ ގުޅުން ހުރި ބައްޔަކަށް ވެދާނެ ކަމަށް އިންސައިޑާ މީޑިއާ ގްރޫޕުން ބުނެއެވެ.

މިދިޔަ އަހަރު އެމެރިކާގެ ޖާސޫސީ ތަހުގީގެއްގެ ހޯދުންތަކުން ދައްކާ ގޮތުގައި މި ބަލީގެ ޒިންމާ ބޭރުގެ ފަރާތެއް އުފުލަން ޖެހުން "ވަރަށް ނާދިރު" ކަމަށް ކިއުބާގެ ވެރިރަށް ހަވާނާގައި ހުންނަ އެމެރިކާ އެމްބަސީގެ އޮފިޝަލުން އެންމެ ފުރަތަމަ ރިޕޯޓްކުރި އެވެ.

އެކަމަކު ރީގާގައި ހުންނަ ރަޝިޔާއަށް ފޯކަސްކުރާ އިންވެސްޓިގޭޓިވް މީޑިއާ ގްރޫޕެއް ކަމަށްވާ އިންސައިޑާ އިން ބުނަނީ 29155 ގެ ނަމުން މަޝްހޫރު ރަޝިޔާގެ އަސްކަރީ އިންޓެލިޖެންސް (ޖީއާރުޔޫ) ޔުނިޓެއްގެ މެމްބަރުން އެމެރިކާގެ މުވައްޒަފުންނާ ގުޅިގެން ރިޕޯޓްކޮށްފައިވާ ސިއްހީ ހާދިސާތައް ހިނގި ސަރަހައްދުގައި ބަހައްޓާފައިވާ ކަމަށެވެ.

60 މިނިޓްސް އާއި ޖަރުމަނުގެ ޑަރ ސްޕީގަލް ގުޅިގެން އަހަރެއްހާ ދުވަހު ކުރިއަށް ގެންދިޔަ އިންސައިޑާ އިންވެސްޓިގޭޝަންގައި ވެސް ރިޕޯޓްކޮށްފައިވާ ގޮތުގައި ޔުނިޓް 29155 ގެ އިސް މެމްބަރުންނަށް "ނޮން ލީތަލް އެކޮސްޓިކް ހަތިޔާރު" އުފެއްދުމާ ގުޅުން ހުރި މަސައްކަތްތަކަށް އެވޯޑްތަކާއި ޕްރޮމޯޝަންތައް ލިބިފައިވެއެވެ.

މީގެ ކުރިން ވެސް ރަޝިޔާއިން ވަނީ އެކަން ދޮގުކޮށްފައެވެ.

މި ބަލީގެ އަލާމާތްތަކުގެ ތެރޭގައި މައިގްރެއިން، މޭނުބައިކުރުން، ހަނދާން ނެތުން އަދި ބޯއެނބުރުން ހިމެނެއެވެ.

އިންސައިޑާ ރިޕޯޓުގައި ބުނެފައި ވަނީ "ހަވާނާ ސިންޑްރޯމް" ގެ އަލާމާތްތައް ފެނުމުގެ ފުރަތަމަ ހާދިސާ 2016 ވަނަ އަހަރަށް ވުރެ ކުރީކޮޅު ހިނގި ކަމަށް ވެދާނެ ކަމަށެވެ.

އެގޮތުން "މީގެ ދެ އަހަރު ކުރިން ޖަރުމަނުގެ ފްރެންކްފަރޓްގައި އެތަނުގެ ކޮންސިއުލޭޓުގައި މަޑުކޮށްގެން ހުރި އެމެރިކާ ސަރުކާރުގެ މުވައްޒަފަކު ވަރުގަދަ 'ހަކަތަ ބީމެއް' ފަދަ އެއްޗެއްގެ ސަބަބުން ހޭނެތިގެން ވެއްޓުން އެއީ މިކަމާ ގުޅުން ހުރި" ކަމެއް ކަމަށް ބުނެފައިވެ އެވެ.

އެމެރިކާގެ ކޮންގްރެސް އިން 2021 ވަނަ އަހަރު ފާސްކުރި ހަވާނާ ގާނޫނުގައި ސްޓޭޓް ޑިޕާޓްމަންޓާއި ސީއައިއޭ އަދި އެމެރިކާ ސަރުކާރުގެ އެހެން އިދާރާތަކަށް އެސައިން ކުރާއިރު ބަލީގެ އަސަރުކޮށްފައިވާ މުވައްޒަފުންނާއި އެމީހުންގެ އާއިލާތަކަށް ފައިސާ ދެއްކުމުގެ ހުއްދަ ދީފައިވެ އެވެ.