ހޯމަ ދުވަހުގެ ހަވީރު އިސްރާއީލުގެ ގާނޫނު ހަދާ މަޖިލިސް ނެސެޓް އިން ވަނީ އަލްޖަޒީރާގެ ގާނޫނު ކަމަށް ބުނާ ގާނޫނު ފާސްކޮށް، ބޭރުގެ ނިއުސް ނެޓްވޯކްތައް ގައުމީ ސަލާމަތަށް ގެއްލުންވާ ކަމަށް ސަލާމަތީ ހިދުމަތްތަކުން ދެކޭނަމަ އިސްރާއީލުގައި ހިންގުމަށް ހުރަސްއެޅުމުގެ ވަގުތީ ބާރު ސަރުކާރަށް ދީފައެވެ.
އެ ގާނޫނު ފާސްކުރީ ނެސެޓް ޕްލެނަމްގައި ދެވަނަ އާއި ތިން ވަނަ ކިޔުމުގައި 71 އިން 10 އިންނެވެ.
ގާނޫނު ފާސްކުރުމުގެ މަސައްކަތުގައި އިސްކޮށް އުޅުއްވި ކޮމިއުނިކޭޝަން މިނިސްޓަރު ޝްލޮމޯ ކާރްހީ ވަނީ ވޯޓަށް ފަހު އަލް ޖަޒީރާ އެގައުމުގައި ކުރިޔަށް އޮތް ދުވަސްތަކުގައި މަނާ ކުރާނެކަމަށް ބުނެފައެވެ.
އާ ގާނޫނުގައި އިސްރާއީލުގައި ހިންގާ ބޭރުގެ ނެޓްވޯކްތައް ވަގުތީ ގޮތުން ބަންދުކޮށް، އެތަންތަނުގެ ސާމާނު އަތުލުމަށް އަމުރުކުރުމުގެ ބާރު ބޮޑުވަޒީރާއި ކޮމިއުނިކޭޝަން މިނިސްޓަރަށް ދީފައި ވަނީ އެ ނެޓްވޯކްތަކުން "ދައުލަތުގެ ސަލާމަތަށް ހަގީގީ ގެއްލުން" ދެމުންދާ ކަމަށް ބެލެވޭ ނަމަ އެވެ.
