ސޫރިޔާގެ ދިމިޝްގުގައި ހުންނަ އީރާނުގެ އެމްބަސީ ކޮމްޕްލެކްސްއަކަށް ހޯމަ ދުވަހު އިސްރާއީލުން ދިން ވައިގެ ހަމަލާއެއްގައި ދެ އެލީޓް އަސްކަރީ ކޮމާންޑަރުން ހިމެނޭ ގޮތަށް އީރާނުގެ ހަތް އޮފިޝަލަކު މަރުވެއްޖެ އެވެ.

ތަޖުރިބާކާރުން ބުނާ ގޮތުގައި މިއީ އެމެރިކާގެ އޭރުގެ ރައީސް ޑޮނަލްޑް ޓްރަމްޕް 2020 ވަނަ އަހަރު ބަޣްދާދުގައި އީރާނުގެ އެންމެ އިސް ކޮމާންޑަރެއް ކަމަށްވާ ޤާސިމް ސުލައިމާނީ އަވަހާރަކޮށްލުމަށް އަމުރު ކުރެއްވި ފަހުން އީރާނުގެ އަމާޒުތަކަށް ދިން އެންމެ ބޮޑު ހަމަލާ އެވެ.

އިސްރާއީލުން ސޫރިއާގައި ހުރި އީރާނާއި އީރާނާ ގުޅިފައިވާ މަސްލަހަތުތަކަށް ހަމަލާދެމުން އަންނަތާ އަހަރުތަކެއް ވެއްޖެ އެވެ.  އަދި އޮކްޓޯބަރު މަހުގެ ހަތް ވަނަ ދުވަހު އީރާނުގެ ތާއީދު އޮންނަ ހަމާސްއިން އިސްރާއީލަށް ހަމަލާދިނުމާ އެކު ޣައްޒާގައި އިސްރާއީލުގެ ފަނާކުރަނިވި ހަނގުރާމައެއް ފެށި ފަހުން މިފަދަ ހަމަލާތައް އިތުރުވެފައިވެ އެވެ.

އެކަމަކު ހޯމަ ދުވަހުގެ ހަމަލާއަކީ އެމްބަސީގެ ކޮމްޕައުންޑަކަށް އަމާޒުކޮށް އީރާނުގެ އެލީޓް ރިވޮލިއުޝަނަރީ ގާޑްސް (އައިއާރުޖީސީ) ގެ އެންމެ އިސް ކޮމާންޑަރަކު މަރުވެފައިވާތީ މަޝްރަހު ހޫނު ވާނެ ކަމަށް ތަޖުރިބާކާރުން ބުނެ އެވެ.

  އީރާނުން ދެކެނީ އެއީ ބައިނަލްއަގްވާމީ ގާނޫނުތަކުގައިވާ ގޮތުން އެގައުމުގެ އިސްތިގުލާލީ ސަރަހައްދަށް ދިން ހަމަލާއެއް ކަމަށެވެ.

އިސްރާއީލުން މި ހަމަލާގެ ޒިންމާ ނަގާފައި ނުވި ނަމަވެސް އެ ހަމަލާގެ އަމާޒަކީ "ޤުދުސް ބާރުތަކުގެ އަސްކަރީ އިމާރާތެއް" ކަމަށް ބުނެފައިވެ އެވެ.  "މިއީ ކޮންސިއުލޭޓެއް ނޫން، އަދި މިއީ އެމްބަސީއެއް ނޫން،" އިސްރާއީލް ޑިފެންސް ފޯސަސް (އައިޑީއެފް)ގެ ތަރުޖަމާނު ރިއާ އެޑްމިރަލް ޑޭނިއަލް ހަގާރީ ސީއެންއެން އަށް ވިދާޅުވި އެވެ.