އިސްރާއީލުގެ އައިޑީއެފް އިން ބުދަ ދުވަހު ބުނީ، ވައިގެ ދިފާއީ ބާރު ވަރުގަދަކޮށް، ރިސާވިސްޓުން ނެރެން އާންގާފައިވަނީ، މި ހަފުތާގެ ކުރީކޮޅު ސީރިއާއަށް ދިން ހަމަލާއެއްގައި އީރާނުގެ އަސްކަރިއްޔާގެ އިސް އޮފިޝަލުންތަކެއް މަރުވުމާ ގުޅިގެން އީރާނުން އެކަމަށް ރައްދު ދޭނެ ކަމަށް ބެލެވޭތީ ކަމަށެވެ.
ދިމިޝްގުގައި ހުންނަ އީރާނުގެ އެމްބަސީ ކައިރީގައި ހުންނަ ކޮންސިއުލާ އިމާރާތަކަށް ހޯމަ ދުވަހު ދިން ހަމަލާގައި އިސްލާމިކް ރިވޮލިއުޝަނަރީ ގާޑް ކޯޕްސްގެ ސޫރިޔާގައި ހުރި އެންމެ އިސް އޮފިޝަލް މުހައްމަދު ރަޒާ ޒާހިދީ އާއި އޭނާގެ ނާއިބާއި އިތުރު އޮފިޝަލުން މަރާލުމުގެ ބަދަލު ހިފާނެ ކަމަށް އީރާނާއި ލުބްނާނުގައި ހަރަކާތްތެރިވާ ހިޒްބުﷲ އިން ވަނީ ބުނެފައެވެ.
ރިޕޯޓްތައް ބުނާ ގޮތުގައި ޒާހިދީ އަކީ ސީރިއާ އާއި ލުބުނާނުގައި އައިއާރުޖީސީގެ އޮޕަރޭޝަންތަކާއި، އެތަނުގައި ތިބި އީރާނުގެ މިލިޝިއާތަކާއި، ހިޒްބުالله އާއި ގުޅުން ބަދަހިކޮށް ހަރަކާތްތެރިވާ އީރާނުގެ އެންމެ އިސް ކޮމާންޑަރެވެ.
"އީރާނުން ސީދާ އިސްރާއީލަށް ހަމަލާދީފިނަމަ އަހަރެން ހައިރާން ނުވާނަން،" އަވަށްޓެރި ޕާކިސްތާނަށް ޖެނުއަރީ މަހު އީރާނުން ދިން މިސައިލް ހަމަލާއަކީ އެފަދަ ފިޔަވަޅެއްގެ ނަމޫނާއެއް ކަމަށް ވިދާޅުވެ، މިލިޓަރީ އިންޓެލިޖެންސްގެ ކުރީގެ ވެރިޔާ އަމޯސް ޔަޑްލިން ވިދާޅުވި އެވެ.
އިސްރާއީލުގެ މީޑިއާ ރިޕޯޓްތައް ބުނާ ގޮތުން ވައިގެ ދިފާއީ ބާރުތައް ވަރުގަދަކޮށް ރިޒާވް ސިފައިން ނެރެން ނިންމީ ތްރެޓް އެސެސްމަންޓަކަށް ފަހު އެވެ.
ހޯމަ ދުވަހުގެ ހަމަލާއަށް ފަހު ހިޒްބުالله އިން ލުބުނާނުން އިސްރާއީލަށް އެތައް ރޮކެޓްތަކެއް ފޮނުވާފައިވެއެވެ.
