ހައްދުފަހަނައަޅާފައިވާ އިސްރާއީލް ސިފައިން ފޭބުމުން ހޯމަ ދުވަހު ޣައްޒާގެ ދެކުނުގެ ސިޓީއެއް ކަމަށްވާ ޚާން ޔޫނިސްއަށް އެ ސިޓީގެ ވަޒަންވެރިން އެނބުރި އަންނަން ފަށައިފިއެވެ.

އެނބުރި އައި މީހުންނަށް ފެނުނީ އެމީހުންގެ އުފަން ރަށް، ޣައްޒާގެ ދެވަނައަށް އެންމެ ބޮޑު ސިޓީ، ދެނެގަނެވޭ ގޮތް ނުވެ އެތައް ހާސް އިމާރާތްތަކެއް ހަލާކުވެފައިވާތަނެވެ.

ޚާން ޔޫނިސްގައި ފެނުނު ފަނާކުރަނިވި މަންޒަރުތަކުން ފާހަގަކުރެވުނީ އެއީ ފާއިތުވި ދިހަވަރަކަށް އަހަރު ދުނިޔޭގެ އެންމެ ފަނާކުރަނިވި އަސްކަރީ ހަމަލާ ކަމަށެވެ.

ޚާން ޔޫނިސް ސަރަހައްދުގެ %55 އިމާރާތްތައް – ގާތްގަނޑަކަށް 45،000 އިމާރާތް ހަލާކުވެފައިވާ ކަމަށް ލަފާކުރެވޭ ކަމަށް ސެޓެލައިޓް އިމޭޖަރީ ބޭނުން ކުރަމުން އައި ދެ ދިރާސާވެރިންގެ އެންމެ ފަހުގެ ހިސާބުތަކުން ދައްކައެވެ.

ޑިސެމްބަރު މަހު ރަފާއަށް ފިލައިގެން ދިޔަ މަހްމޫދު އަބްދުލްޣަނީއަށް ފެނުނީ އޭނާ އާއި އޭނާގެ އަވަށްޓެރިންގެ ގެތައް ސުންނާފަތި ކޮށްފައި ހުރިތަނެވެ. "ގިނަ ސަރަހައްދުތަކެއް، ހާއްސަކޮށް ސިޓީ ސެންޓަރު ވަނީ ދިރިއުޅުމަށް ނުފެތޭ ސަރަހައްދުތަކަކަށް ވެފައި،" އޭނާ ވިދާޅުވި އެވެ.

ޚާން ޔޫނިސްގެ މައި ނާސިރު ހޮސްޕިޓަލް އެތެރެ.ސުންނާފަތި ކޮށްފައިވާއިރު، ސީލިންގް ޕެނަލްތައް ވަނީ ވެއްޓިފަ އެވެ. ބޭރުން މާބޮޑު ގެއްލުމެއް ނުފެނުނު ނަމަވެސް ގެއްލުމުގެ މިންވަރު ވަގުތުން ސާފެއް ނުވެ އެވެ. އިސްރާއީލުގެ ސިފައިން އެތަނަށް ވަދެފައިވަނީ ހަމަލާގެ ތެރޭގައި ރަހީނުކޮށްފައިވާ މީހުންގެ ހަށިގަނޑު އެތެރޭގައި ހުރި ކަމަށް ގަބޫލުކުރާ ކަމަށް ބުނެއެވެ. ނަމަވެސް އެއްވެސް މީހަކު ފެނުނު ކަމަށް ރިޕޯޓް ކޮށްފައެއް ނުވެއެވެ.