ރައީސް ޑރ. މުހައްމަދު މުއިއްޒު މަގާމަށް ހޮވިވަޑައިގެންނެވީ އެމަނިކުފާނަށް އޮތް ތާއީދަކުން ނޫން ކަމަށް ރައީސް އަބްދުﷲ ޔާމީންގެ ދޮށީ ދަރިކަލުން އަދި ޕީއެންއެފްގެ ވަގުތީ ރައީސް ޒޭން އަބްދުﷲ ޔާމީން ވިދާޅުވެއްޖެއެވެ.

ޒޭން މިފަދައިން ވިދާޅުވީ، ޕީއެންއެފް އުފައްދަން ޖަލްސާ ބޭއްވުމަށް ފުލުހުން މެދުވެރިކޮށް ހުރަސް އެޅުމުންނެވެ. އެގޮތުން ނިމިދިޔަ ހަފްތާގެ އަންގާރަ ދުވަހުގެރޭ ޕީއެންއެފް އުފައްދާ ޖަލްސާއަށް ފުލުހުން މެދުވެރިކޮށް ހުރަސް އެޅީ ޣައިރު ގާނޫނީ ގޮތުން ކަމަށާ އަދި އެ އޯޑަރަށް ފުލުހުން ތަބާވީވެސް ޣައިރު ގާނޫނީ ގޮތުން ކަމަށް ވެސް ޒޭން ފާހަގަކުރެއްވިއެވެ.

ޒޭން ވަނީ ރައީސް މުއިއްޒަށް އަމާޒުކޮށް ބަހުގެ ހޫނު ހަމަލާތަކެއްވެސް ފޮނުއްވާފައެވެ. އެގޮތުން ޕީއެންއެސް ޖަލްސާ ނުވަތަ އެހެން އެއްވެސް ސިޔާސީ ހަރަކާތަކަށްވެސް ފުލުހުން ފޮނުވާނީ ފޮނުވަން ޖެހިގެން ކަމަށް ރައީސް މުއިއްޒު ވިދާޅުވެފައިވުމަށް ރައްދު ދެއްވާ ޒޭން ވިދާޅުވީ، ކޮން އަދަދެއް ހަމަނުވާނެ ކަމަށް ރައީސް މުއިއްޒު ބަސްފުޅެއްތޯ ކަމަށާ ރައީސް މުއިއްޒު ހޮވިވަޑައިގެންނެވީ އެމަނިކުފާނަށް އޮތް ޓާއީދެއްގެ ސަބަބުން ނޫން ކަމަށެވެ.

ޒޭން ވިދާޅުވީ، އަންގާރަ ދުވަހުގެ ރޭގެ ހާދިސާއިން ފެނިގެން ދިޔައީ ޚުދުމުހުތާރު ވެރިކަމެއްްގެ ފެށުން ކަމަށާ އެއީ އެ ޖަލްސާއަކީ މި ސަރުކާރު އައި ފަހުން ސިޔާސީ ހަރަކާތެއް ބާއްވަން ބަޔަކު ނުކުތް ފުރަތަމަ ފަހަރުކަމަށްވެފައި އެކަން ހަޖަމްކުރަން ސަރުކާރަށް އުނދަގޫވުމުން އަމަލުކުރި އަނިޔާވެރިގޮތުން އެކަން ހާމަވާ ކަމަށެވެ.

ޒޭން އިތުރަށް ވިދާޅުވީ ރައީސް ޔާމީންގެ ސިޔާސީ ހަޔާތް ކަތިލަން ބަޔަކު ކިތަންމެ މަސައްކަތެއް ކުރިޔަސް އެކަން ނުވާނެކަމަށެވެ.

ޒޭން މީގެ ކުރިން ވިދާޅުވި ގޮތުގައި ޕީއެންއެފް އުފެއްދީ ބައްޕާފުޅަށް ދެމުން ގެންދާ އަނިޔާތަކާ ދެކޮޅަށް މައިންބަފައިންގެ ހައްގުގައި ކަމަށެވެ.

ޕީއެންއެފް އުފައްދާ ޖަލްސާ ބާއްވަން އިލެކްޝަންސް ކޮމިޝަނުން ހުއްދަ ދިނުމުން އެ ޕާޓީއިން ޣިޔާޘުއްދީން ސްކޫލުގެ ހޯލު ކުއްޔަށް ނަގާ ހުރިހާ ތައްޔާރީތަކެއްވީ ފަހުން ސަރުކާރުން ވަނީ ފުލުހުން ފޮނުވާ އެކަމަށް ހުރަސް އަޅާފައެވެ. އަދި އެތަނަށް ޖަލްސާގައި ބައިވެރިވާން ދިޔަ މެމްބަރުންނަށް ހަލަތާ ނުބައްދަލު ބާރުގެ ބޭނުންކޮށް އަނިޔާކޮށްފައިވެއެވެ.