އާރމްޑް ފޯސަސް އޮފް ޔޫކްރޭން (އޭއެފްޔޫ)ގެ ކޮމާންޑަރ އިން ޗީފް އޮލެކްސަންޑް ސިރްސްކީ ވިދާޅުވީ އެގައުމުގެ އިރުމަތީ ފްރަންޓްލައިންގެ ހާލަތު "ގޯސްވަމުން" އަންނަ ކަމަށެވެ.

އޭޕްރީލް 14 ވަނަ ދުވަހު ފޭސްބުކް ޕޯސްޓެއްގައި ޖެނެރަލް ވިދާޅުވީ ރަޝިޔާގެ ލަޝްކަރުތަކުގެ މިސްރާބު ހުރީ މިދިޔަ އަހަރު ފަތަހަކުރި ޑޮނެޓްސްކް ސަރަހައްދީ ރަށެއް ކަމަށްވާ ބަޚްމުތުގެ ހުޅަނގުން 9.3 މޭލު ދުރުގައި އޮންނަ ޗާސިވް ޔާރާ ދިމާއަށެވެ.

ކާނަލް ޖެނެރަލް ސިރްސްކީ އިންޒާރު ދީފައިވަނީ ޔޫކްރޭނަށް ގިނައިން ބަރޯސާވެފައިވާ ހުޅަނގުން ހަތިޔާރާއި ސާމާނު ލިބޭ މިންވަރު ދަށްވަމުންދާ ދަނޑިވަޅެއްގަ އެވެ.

ޗާސިވް ޔާރަކީ އެ ސަރަހައްދުގެ ސްލޮވިއަންސްކް، ކްރަމަޓޯސްކް، އަދި ކޮސްޓިއަންޓިނިވްކާ ފަދަ ސްޓްރެޓެޖިކް ގޮތުން މުހިންމު ރަށްތަކަށް ވަންނަ ދޮރެވެ. ގާތްގަނޑަކަށް 227 މީޓަރު (744 ފޫޓު) އުސްމިނުގައި އޮންނަ މި ސިޓީއަކީ ރަޝިޔާގެ އޭވިއޭޝަނުން މެދުނުކެނޑި ބޮން އަޅަމުންދާ ސިޓީއެއް ކަމަށާއި މިވަގުތު އެއީ "ހޮޓް ސްޕޮޓެއް" ކަމަށް ޔޫކްރޭންގެ ވައިގެ ސިފައިންގެ ކުރީގެ އޮފިސަރެއް ކަމަށްވާ އޮލެކްސީ މެލިންކް ބުންޏެވެ.

ރަޝިޔާއިން މަހަކު ގާތްގަނޑަކަށް 30،000 ސިފައިން ޖަމާކުރަން ފަށާފައިވާއިރު، މި މަހުގެ ކުރީކޮޅު ކިއެވް އިން ވަނީ ހަނގުރާމައަށް އިތުރު މީހުން ގެނައުމަށް އާ ބިލެއް ފާސްކޮށްފައެވެ.

ބިލުގެ އޮނިގަނޑު އެކުލަވާލާފައި ވަނީ ފިލައިގެން ދިއުން ހަނިކޮށް، ސިފައިންގެ ޚިދުމަތުގެ އުމުރު 27 އަހަރުން 25 އަހަރަށް ކުޑަކުރުމަށެވެ.

"އިރުމަތީ ފަރާތުގެ ހާލަތު ފާއިތުވި ދުވަސްތަކުގައި ވަރަށް ބޮޑަށް ގޯސްވެއްޖެ،" ސިރްސްކީ ވިދާޅުވި އެވެ. “ދުޝްމަނުން ދަނީ ލައިމަން އަދި ބަޚްމުތު [ޑޮނެޓްސްކް ސަރަހައްދުގައި] ސެކްޓަރުގައި އަޅުގަނޑުމެންގެ މަޤާމުތަކަށް ހީވާގިކަމާއެކު ހަމަލާދެމުން"