އެމެރިކާގެ އާ އެހީގެ ޕެކޭޖަށް ޔޫކްރޭނުން މަރުހަބާ ކިޔައިފި އެވެ.
އެމެރިކާގެ ހައުސް އޮފް ރެޕްރެޒެންޓޭޓިވްސް އިން ފާސްކުރި އެހީ ޕެކޭޖަށް ޔޫކްރޭނާއި ހުޅަނގުގެ ލީޑަރުން އާދީއްތަ ދުވަހު މަރުހަބާ ކިޔާފައިވާއިރު، އެ ބިލް ފާސްވުމުން ޔޫކްރޭން "އިތުރަށް ހަލާކުވެ އިތުރު މީހުން މަރުވާނެ" ކަމަށް ރަޝިޔާއިން އިން އިންޒާރު ދީފައިވެ އެވެ.
ޔޫކްރޭންގެ ކޮމާންޑަރުންނާއި ތަހުލީލު ކުރާ ފަރާތްތަކުން ބުނާ ގޮތުގައި ގިނަ ދުވަސްތަކެއް ވަންދެން އިންތިޒާރު ކުރަމުން އައި 61 ބިލިއަން ޑޮލަރުގެ އަސްކަރީ އެހީގެ ޕެކޭޖު - އޭގެ ތެރޭގައި ޔޫކްރޭނުން ހަތިޔާރު ގަތުމަށް 13.8 ބިލިއަން ޑޮލަރު ހިމެނޭ - ހަނގުރާމައިގެ ތިން ވަނަ އަހަރު ރަޝިޔާގެ ކުރިއެރުންތައް ލަސްކުރުމަށް އެހީތެރިވެދޭނެ އެވެ.
ރަޝިޔާއިން ޔޫކްރޭނަށް އަރައިގަތުން ފަހަތަށް ޖެއްސުމަށް އެމެރިކާގެ ތާއީދު އަލުން ދިނުމާ ގުޅިގެން ޑިމޮކްރެޓުންނާއި ރިޕަބްލިކަން ޕާޓީން މަސްތަކެއް ވަންދެން ދެކޮޅު ހެދުމަށްފަހު ހޮނިހިރު ދުވަހުގެ މަދުން ނޫނީ ނުފެންނަ ސެޝަނެއްގައި ޔޫކްރޭނާއި އިސްރާއީލާއި އެމެރިކާގެ އެހެން އެކުވެރި ގައުމުތަކަށް 95 ބިލިއަން ޑޮލަރުގެ އެހީ ދިނުމަށް ހައުސްއިން ވަރަށް އަވަހަށް ފާސްކުރިއެވެ.
އެމެރިކާގެ ފައިސާ ނުލިބި ހަނގުރާމައިން ބަލިވާނެ ކަމުގެ އިންޒާރު ދެއްވި ޔޫކްރޭންގެ ރައީސް ވޮލޮޑިމިއާ ޒެލެންސްކީ ވިދާޅުވީ އެމެރިކާގެ ގާނޫނު ހަދާ މަޖިލީހުގެ މެމްބަރުގެ ނިންމުމަށް ޝުކުރުވެރިވާ ކަމަށެވެ.
އެންބީސީގެ "މީޓް ދަ ޕްރެސް" ގައި ވާހަކަ ދައްކަވަމުން ޒެލެންސްކީ ވިދާޅުވީ އެ އެހީގެ ޕެކޭޖުގެ ސަބަބުން "(ޔޫކްރޭން) އަފްޣާނިސްތާނަށް ނުވެވޭނެ ކަމުގެ ވަރުގަދަ ސިގްނަލެއް ކްރެމްލިންއަށް ފޮނުވާނެ ކަމަށެވެ.
ޒެލެންސްކީ ވިދާޅުވީ ޔޫކްރޭންގެ ސިފައިން ތައްޔާރުވަމުން އަންނަ ކަމަށް ބެލެވޭ "ފުލް ސްކޭލް އޮފެންސިވް"އެއްގައި "ރަޝިޔާގެ ޕްލޭންތައް މުގުރާލުމަށް" ދުރުރާސްތާ ހަތިޔާރާއި ވައިގެ ދިފާއީ ނިޒާމަށް އިސްކަންދޭނެ ކަމަށެވެ.
އެހީގެ ޕެކޭޖު އެމެރިކާގެ ސެނެޓަށް ދާއިރު، އެ ޕެކޭޖު އަންގާރަ ދުވަހުގެ ތެރޭގައި ފާސްވެދާނެ އެވެ. އެމެރިކާގެ ރައީސް ޖޯ ބައިޑަން ވަނީ ވަގުތުން ސޮއި ކުރައްވާނެ ކަމަށް ވައުދުވެވަޑައިގެންފައެވެ.
ނަމަވެސް ހަތިޔާރު ފްރަންޓް ލައިނަށް ވާސިލްވާން ހަފްތާތަކެއް ނަގާފާނެ އެވެ.
"މިއާއެކު އަޅުގަނޑުމެންނަށް (ރަޝިޔާގެ ސިފައިން) ހުއްޓުވައި، ގެއްލުން ކުޑަކުރެވޭނެ،" އިންފެންޓްރީ ސިފައިންގެ ވެރިޔާ އޮލެކްސަންޑް ވިދާޅުވި އެވެ. އޭނާ އަންނަނީ މަސްތަކެއް ވަންދެން ވަރުގަދަ ހަނގުރާމައަކަށް ފަހު ފެބްރުއަރީ މަހު ރަޝިޔާ އަތުން ޔޫކްރޭން ބަލިވި ޑޮނެޓްސްކް ސަރަހައްދުގެ ސިޓީ އަވްޑިވްކާ ވަށައިގެން ހަނގުރާމަ ކުރަމުންނެވެ.
