ރައީސް އޮފީހަށް އޮންނަ ޕްރޮޓޮކޯލުގެ ތެރެއިން ނޫސްވެރިންނަށް ފޯނު ނުވެއްދޭ ކަމަށް ބުނެ ރައީސް އޮފީހުން ދޮގު ހަދައިފިއެވެ.

ދިވެހި ތާރީހުގައި ފުރަތަމަ ފަހަރަށް ނޫސްވެރިންނަށް ރައީސް އޮފީހަށް ފޯނު ވެއްދުން މަނާކުރުމާ ގުޅިގެން "ތޭރަ އޮންލައިން"ގައި ހަބަރު ޝާއިއުކުރުމާ ގުޅިގެން ރައީސް އޮފީހުގެ ކޮމިއުނިކޭޝަން މިނިސްޓަރު އިބްރާހިމް ހަލީލު ވަނީ ޚަބަރު ލިޔުނު ނޫސްވެރިޔާއަށް ގުޅާ އެ ޚަބަރުގައި އޮތީ ގޯސް މައުލޫމާތެއް ކަމަށް ވިދާޅުވެފައެވެ.

އެގޮތުން ޚަލީލު ވިދާޅުވި ގޮތުގައި މީގެ ކުރިންވެސް އޮންނަނީ ނޫސްވެރިންނަށް ފޯނު ނުވެއްދޭ ގޮތަށް ކަމަށާ އެގޮތުން ރައީސް އޮފީހަށް ފޯނަށް ވެއްދެނީ އެ އޮފީހުގެ މުވައްޒަފުންނަށާ އަދި ވަޒީރުންނަށް އެކަނި ކަމަށް ޚަލީލު ވިދާޅުވިއެވެ.

މީގެ އިތުރުން ޚަލީލު ވިދާޅުވީ ކުރިން އޮތް ގޮތް ބަދަލުކޮށް މި ސަރުކާރުން ނޫސްވެރިންނަށް ފޯނު ވެއްދުމަށް ޖާގަ ތަނަވަސްކޮށްދިނީ ކަމަށެވެ. ނަމަވެސް ޚަލީލު އެ ހެއްދެވީ އިތުރުފުޅެއްކަން މީގެ ކުރިން އެކި ސަރުކާރުތަކުގައި ބޭއްވި ނޫސްވެރިންގެ ބައްދަލުވުން ތަކުން ފެންނަން އެބަ ހުއްޓެވެ.

އެގޮތުން ނިމި ދިޔަ ސަރުކާރުގައިވެސް އަދި މި ސަރުކާރުގައިވެސް މީގެ ކުރިން ބޭއްވި ހުރިހާ ނޫސްވެރިންގެ ބައްދަލުވުމަކަށް ނޫސްވެރިންނަށް ފޯނު ވެއްދުނެވެ.

ނަމަވެސް މިއަދު އެ އޮފީހުގައި ބޭއްވި ބައްދަލުވުމަށް ފޯނު ނުވެއްދޭނެ ކަމަށް ކުއްލިއަކަށް އެންގި ނަމަވެސް ނޫސްވެރިން އެކަމާ ދެކޮޅު ހެދުމުން މިއަދު އެކަނި ފޯނު ވެއްދުމަށް ހުއްދަ ދިނެވެ.

ތޭރަ އޮންލައިނަށް މައުލޫމާތު ލިބިފައިވާ ގޮތުގައި ނޫސްވެރިންގެ ފޯނުތައް ޕްރެސް ރޫމަށް ވެއްދުނަ ނުދީ ފިޒިކަލީ ހިފަހައްޓަން މަސައްކަތްކުރީ އެ ފޯނުތައް ޓެޕުކުރުމުގެ ބޭނުމުގައެވެ.