ރައީސް އޮފީހުގައި ބާއްވާ ނޫސްވެރިންގެ ބައްދަލުވުންތަކަށް ފޯނު ވެއްދުން މަނާ ކުރުމާއި ގުޅިގެން، ހިތްހަމަނުޖެހުން ފާޅުކޮށް ޕީ.އެން.އެފްގެ ސެކްރަޓީ ޖެނެރަލް މުޙައްމަދު މަލީހް ޖަމާލް އެކްސް އެކައުންޓްގައި ޕޯސްޓް ކޮށްފިއެވެ.

މި ޕޯސްޓްގައި މަލީހް ވިދާޅުވެފައިވަނީ ނޫސްވެރިން ޕްރެސް ކޮންފަރެންސްތަކަށް ވަންނަ އިރު ފޯނު ވެއްދުން މަނާކުރުމަކީ ތަހުޒީބީ ދުނިޔޭގައި ދެކޮޅު ނުޖެހޭ ކަމެއް ކަމުގައެވެ.

އަދި ދިވެހިރާއްޖޭގެ ޤާނޫނު އަސާސީގައި ޚާއްސަކޮށް ބިންވަޅު ނަގާފައިވާ މި ޙައްޤަށް އުނިކަން އަންނަ ގޮތަށް ކުރާ ހުރިހާ ޢަމަލުތައް ޕީ.އެން.އެފްގެ ނަމުގައި ކުށްވެރިކުރާ ކަމަށް ބުނެފައިވެއެވެ.

މީގެއިތުރުން، ރައީސް އޮފީހަށް ވަންނަ ނޫސްވެރިންނަށް ފޯނު ފަދަ ވަޞީލަތްތައް ވެއްދޭ ގޮތަށް އަލުން ހުއްދަ ދެއްވާ ރައްޔިތުންނާއި ގުޅުން ހުރި ކަންކަމުގެ މަޢުލޫމާތު މިހާރަށްވުރެ ހާމަކަންބޮޑު ގޮތެއްގައި ގެނެސްދެވޭނެ ފުރުސަތު ފަހިކޮށްދެއްވުމަށްވެސް މަލީހް ގޮވާލައްވާފައިވެއެވެ.

މުޙައްމަދު މަލީހް ޖަމާލްގެ އިތުރުން ނޫސްވެރިންވެސް ދަނީ މިކަމާއި ނުރުހުން ފާޅުކުރަމުންނެވެ. މިގޮތުން މިފަދަ ޒަމާނެއްގައި ދިވެހިރާއްޖޭގެ ސަރުކާރުން މިއަދު ނެގި މި ފިޔަވަޅަކީ ސަރުކާރުން ފަހަތަށް ނެގުނު ފިޔަވަޅެއް ކަމަށް ގިނަ ފަރާތްތަކުން ބުނަމުން ދެއެވެ.