ޗައިނާގެ ގުއަންޑޮންގް ޕްރޮވިންސްގައި ބުދަ ދުވަހު ހައިވޭއެއް ވެއްޓި 19 މީހަކު މަރުވެފައިވާ ކަމަށް އެގައުމުގެ ސްޓޭޓް ބްރޯޑްކާސްޓަރު، ސީސީޓީވީން ބުނެފި އެވެ.

ގުއަންޑޮންގް ޕްރޮވިންސްގެ މެއިޒޯ ސިޓީ އާއި ޑަޕޫ ސިޓީ ގުޅުވާލާ އެކްސްޕްރެސް ހައިވޭގެ ބައެއް ބުދަ ދުވަހުގެ ހެނދުނު 2:10 ހާއިރު ވެއްޓި އަށާރަ ކާރު ތާށިވެފައިވާ ކަމަށް ސީސީޓީވީން ބުނެ އެވެ.

އަނދިރީގައި ނަގާފައިވާ ސޯޝަލް މީޑިއާގައި ފުޅާދާއިރާއެއްގައި ދައުރުވި ވީޑިއޯތަކުން ފެންނަ ގޮތުގައި މަގު އޮތް ތަނުގެ ދަށުގައި ގަދަ އަލިފާންގަނޑެއް ރޯވެ، އެ ހާދިސާ ހިނގި ތަނުގައި އެމަޖެންސީ ސާވިސްގެ މަސައްކަތްތެރިން ތިއްބެވެ.

ދުވާލު ފަތިހު ފަހުން ނަގާފައިވާ ތަސްވީރުތަކުން ފެންނަ ގޮތުގައި ވަޅުގަނޑެއްގެ ތިރީގައި ކާރުތައް ވެއްޓިފައި ހުއްޓެވެ.

ބުދަ ދުވަހުގެ ހެނދުނު 11:45 އާ ހަމައަށް ހޮސްޕިޓަލްތަކުގައި 30 މީހަކަށް ސިއްހީ ފަރުވާ ދެމުންދާއިރު، އެމީހުން ތިބީ "ހާލަތު ރަނގަޅު" ކަމަށް ސީސީޓީވީން ބުނެފައިވެއެވެ.

ގުއަންޑޮންގް ޕްރޮވިންސްގެ ސަރުކާރުން ގާތްގަނޑަކަށް 500 މީހުންގެ ސަލާމަތީ ބާރެއް ފޮނުވާފައިވާ ކަމަށް އެ ސްޓޭޓްގެ ބްރޯޑްކާސްޓާ ބުންޏެވެ.

ސަލާމަތީ މަސައްކަތްތައް އަދިވެސް ކުރިއަށްދާ ކަމަށް ލޯކަލް ޕޮލިސް ޑިޕާޓްމަންޓުން ނެރުނު އަޕްޑޭޓްގައިވެ އެވެ.

ދެކުނު ޗައިނާއަށް ފާއިތުވި ހަފްތާތަކުގައި ބޯކޮށް ވާރޭވެހި ފެންބޮޑުވެފައިވެއެވެ.

127 މިލިއަން މީހުން ދިރިއުޅޭ އިގްތިސާދީ ބާރުގަދަ ގުއަންޑޮންގް ޕްރޮވިންސްގައި ފުޅާދާއިރާއެއްގައި ފެންބޮޑުވެ، 110،000 އަށް ވުރެ ގިނަ މީހުން އެހެން ހިސާބުތަކަށް ބަދަލުވާން ޖެހިފައިވާ ކަމަށް ލޯކަލް ގަވަރމަންޓާ ހަވާލާދީ ދައުލަތުގެ މީޑިއާތަކުން ރިޕޯޓްކޮށްފައިވެއެވެ.

ދައުލަތުގެ ނޫސް އެޖެންސީ ޒިންހުއާ އިން ހޯމަ ދުވަހު ރިޕޯޓްކޮށްފައިވާ ގޮތުގައި ގުއަންޑޮންގްގައި ފެންބޮޑުވުމުގެ ސަބަބުން ހަތަރު މީހަކު މަރުވެފައިވާއިރު އޭގެ ތެރޭގައި ސަލާމަތީ މަސައްކަތްތެރިއަކު ވެސް ހިމެނެ އެވެ. އަދި މަދުވެގެން 10 މީހަކު ގެއްލިފައިވާ ކަމަށް ވެސް އެ ރިޕޯޓުގައި ބުނެފައިވެ އެވެ.