ރަޝިޔާއިން ޔޫކްރޭންގެ ރައީސް ވޮލޮޑިމިއާ ޒެލެންސްކީއާ ދެކޮޅަށް ޖިނާއީ މައްސަލައެއް ހުޅުވާލައި އޭނާ ހޯދަން ބޭނުންވާ ލިސްޓުގައި ހިމަނާފައިވާ ކަމަށް ދައުލަތުގެ ނޫސް އެޖެންސީ ޓާސް އިން ހޮނިހިރު ދުވަހު ރިޕޯޓްކޮށްފައިވާއިރު، މިއީ މޮސްކޯގެ "މާޔޫސްކަމުގެ" ހެއްކެއްގެ ގޮތުގައި ޔޫކްރޭނުން ބުނެއެވެ.

ޓާސް އިން ރިޕޯޓްކޮށްފައިވާ ގޮތުގައި ރަޝިޔާގެ އިންޓީރިއާ މިނިސްޓްރީގެ ޑޭޓާބޭސްއިން ދައްކާ ގޮތުގައި ޒެލެންސްކީ ހުރީ ވޯންޓެޑް ލިސްޓެއްގައި، ނަމަވެސް އިތުރު ތަފްސީލެއް ދީފައެއް ނުވެއެވެ.

ޔޫކްރޭންގެ ފޮރިން މިނިސްޓްރީން ރަޝިޔާގެ ރައީސް ވްލަޑިމިއާ ޕޫޓިން ހައްޔަރުކުރަން ބައިނަލްއަގްވާމީ ކްރިމިނަލް ކޯޓުގެ އަމުރެއް ނެރެފައިވާކަން ފާހަގަކުރިއެވެ.

"އަޅުގަނޑުމެން ހަނދާންކޮށްދޭން ބޭނުންވަނީ ރަޝިޔާގެ އަގު ނެތް އިއުލާންތަކާ ހިލާފަށް، ހަނގުރާމައިގެ ޖަރީމާތަކުގެ ތުހުމަތުގައި ރަޝިޔާގެ ހުދުމުހުތާރު ވެރިޔާ ވްލަޑިމިއާ ޕޫޓިން ހައްޔަރުކުރުމަށް އިންޓަނޭޝަނަލް ކްރިމިނަލް ކޯޓުން ނެރުނު އަމުރަކީ މުޅިން ހަގީގީ އަމުރެއް، އަދި 123 ގައުމެއްގައި ތަންފީޒު ކުރެވޭނެ ކަމެއް،" ފޮރިން މިނިސްޓްރީން ބުނެފައިވެއެވެ.

އެގޮތުން ރަޝިޔާގެ އިއުލާނަކީ "ރަޝިޔާގެ ދައުލަތުގެ މެޝިނާއި ޕްރޮޕެގެންޑާގެ މާޔޫސްކަމުގެ ހެއްކެއް ކަމަށާއި އެއީ ސަމާލުކަން ހޯދުމަށް ކުރި ކަމެއް" ކަމަށް ބުނެފައިވެ އެވެ.

2022 ވަނަ އަހަރުގެ ފެބްރުއަރީ މަހު ޔޫކްރޭނާ އެކު ކުރިމަތިލުން ފެށި ފަހުން ރަޝިޔާއިން ވަނީ ޔޫކްރޭނާއި ޔޫރަޕްގެ އެހެން ސިޔާސީ ބޭފުޅުން ހައްޔަރު ކުރުމުގެ އަމުރު ނެރެފައެވެ.

ރަޝިޔާގެ ފުލުހުން ވަނީ ފެބްރުއަރީ މަހު އެސްޓޯނިއާގެ ބޮޑުވަޒީރު ކާޖާ ކަލާސް އާއި ލިތުއޭނިއާގެ ސަގާފަތުގެ މިނިސްޓަރު އަދި ކުރީގެ ލެޓްވިއާ ޕާލަމެންޓްގެ މެމްބަރުން ސޯވިއެޓް ޒަމާނުގެ އާސާރީ ބިނާތައް ނައްތާލުމުގެ ކުށުގެ ލިސްޓުގައި ހިމަނާފަ އެވެ.

އަދި މިދިޔަ އަހަރު ޕޫޓިންގެ ހަނގުރާމައިގެ ޖަރީމާތަކުގެ އަމުރު ތައްޔާރުކުރި ބައިނަލްއަގްވާމީ ކްރިމިނަލް ކޯޓުގެ ޕްރޮސެކިއުޓާ ހައްޔަރުކުރުމުގެ އަމުރެއް ވެސް ރަޝިޔާއިން ނެރެފައިވެއެވެ.