އެ ބޮޑު ބިލްބޯޑް ވެއްޓުނީ މުމްބާއީގެ އަވަށެއް ކަމަށްވާ ގަޓްކޯޕާރުގެ ޕެޓްރޯލް ޝެޑަކާއި ބައެއް ގެތަކުގެ މައްޗަށެވެ.

މި ހާދިސާގައި 14 މީހަކު މަރުވެ އިތުރު ދިހަވަރަކަށް މީހުން ޒަހަމްވިއެވެ.

ފުލުހުން ބުނާ ގޮތުގައި 70 މީޓަރު 50 މީޓަރުގެ ބިލްބޯޑު ވެއްޓިފައިވަނީ ގެތަކާއި ޕެޓްރޯލް ޝެޑެއްގެ މައްޗަށް ހޯމަ ދުވަހު ކަމަށެވެ.

އެމަޖެންސީ ސާވިސަސް އިން ބުނާ ގޮތުގައި އަދިވެސް މަދު ބަޔަކު އޭގެ ދަށުގައި ތާށިވެފައި ތިބި ކަމަށާއި ސަލާމަތީ އޮޕަރޭޝަނެއް ކުރިއަށްދާ ކަމަށެވެ.

މުމްބާއީ ހުންނަ މަހާރާޝްތުރާ ސްޓޭޓްގެ ސަރުކާރުން ވަނީ މި މައްސަލަ ތަހުގީގު ކުރުމަށް އަންގާފައެވެ.

ލޯކަލް ނިއުސް ޗެނަލްތަކުން ދައްކާ ފޫޓޭޖުތަކުން ފެންނަ ގޮތުގައި ބޮޑު ބިލްބޯޑު ވެއްޓުމުގެ ކުރިން ވައިގެ ތެރޭގައި ހެލުވި، ސިޓީގެ އިރުމަތީ ސަބަރބް ގަޓްކޯޕާރުގެ ބިޒީ މަގެއް ކައިރީގައި ހުރި އިމާރާތްތަކަށް ވެއްޓިފައިވެއެވެ. އެ ހާދިސާގައި އެތައް އުޅަނދެއް ފުނޑުފުނޑުވެގެން ގޮސްފައިވެއެވެ.

އެ މަންޒަރު ފެންނަ ފޮޓޯތަކުން ފެންނަނީ އެމަޖެންސީ ޓީމުތައް ފުނޑުފުނޑު ވެފައިވާ އިމާރާތުގައި މީހުން ސަލާމަތް ކުރަން މަސައްކަތް ކުރަމުންދާތަނެވެ. ފޫޓޭޖުން ފެންނަ ގޮތުގައި ރެސްކިއު ވޯކަރުން ވެއްޓިފައިވާ ބިލްބޯޑުގެ ދަށުން މީހަކު ދަމައިގަނެ ޕަވަރ ޓޫލްސް ބޭނުންކޮށްގެން ދަގަނޑު ކަނޑާލަ އެވެ.

"އަޅުގަނޑުމެން މިވަނީ 80 ވަރަކަށް މީހުން ސަލާމަތްކޮށްދީފައި،" ނޫސް އެޖެންސީ އޭއެންއައި އަށް މައުލޫމާތު ދެއްވަމުން އޮފިޝަލަކު ވިދާޅުވި އެވެ. "ރަތްކުލައިގެ އެއް ކާރު އެބަހުރި ވަރަށް ބޮޑަށް ހަލާކުވެފައި، އަޅުގަނޑުމެންނަށް ޝައްކު ކުރެވެނީ އެތެރޭގައި ބައެއް މީހުން ތާށިވެފައި ތިބި ކަމަށް."