ވިކިލީކްސްގެ ބާނީ ޖޫލިއަން އަސާންޖަށް ކުރާ ޖާސޫސް ކުރުމުގެ ދައުވާއެއްގައި އެމެރިކާއަށް ހަވާލުކުރުމާ ދެކޮޅަށް އިސްތިއުނާފު ކުރެވޭނެ ކަމަށް ލަންޑަންގެ ކޯޓަކުން ހޯމަ ދުވަހު ހުކުމްކޮށްފިއެވެ.

ހައިކޯޓުގެ ފަނޑިޔާރުން ކަމަށްވާ ވިކްޓޯރިއާ ޝާޕް އާއި ޖެރެމީ ޖޯންސަން ވިދާޅުވީ އިނގިރޭސިވިލާތުގެ ސަރުކާރުން ހަވާލުކުރުމުގެ އަމުރަށް ގޮންޖަހާނެ ސަބަބުތަކެއް އަސާންޖަށް އެބަހުރި ކަމަށެވެ.

އުމުރުން 52 އަހަރުގެ އަސާންޖްގެ މައްޗަށް ގާތްގަނޑަކަށް 15 އަހަރު ކުރިން އޭނާގެ ވެބްސައިޓުގައި އެމެރިކާގެ ސިއްރު ލިޔެކިޔުންތަކެއް ޝާއިއުކުރި މައްސަލައިގައި ޖާސޫސް ކުރި ކަމުގެ 17 ދައުވާއަކާއި ކޮމްޕިއުޓަރު ނަހަމަ ގޮތުގައި ބޭނުންކުރުމުގެ އެއް ދައުވާ އުފުލާފައިވެއެވެ.

އޭނާގެ ސަޕޯޓަރުން ވަނީ ކޯޓުގެ ބޭރުގައި އުފާފާޅުކޮށް އަތްތިލަބަޑި ޖަހާފައެވެ.

އަސާންޖްގެ އަންހެނުން ސްޓެލާ ކޯޓުގެ ބޭރުގައި ވިދާޅުވީ އެމެރިކާގެ ވަކީލުން "ބިހެއްގެ މައްޗަށް ލިޕްސްޓިކް ޖަހަން މަސައްކަތް ކުރި — އެކަމަކު ފަނޑިޔާރުން އެ ލިޕްސްޓިކް ނުގަނޭ" ކަމަށެވެ. އޭނާ ވިދާޅުވީ އެމެރިކާއިން "ހާލަތު ކިޔައި" މައްސަލަ ދޫކޮށްލަން ޖެހޭ ކަމަށެވެ.

"އާއިލާއެއްގެ ގޮތުގައި އަހަރެމެންނަށް ލުއި ލިބިއްޖެ އެކަމަކު މިކަން ކިހާ ދުވަހަކު ކުރިއަށް ދާނީ؟" އޭނަ ބުންޏެވެ. "މި މައްސަލައަކީ ލަދުވެތި މައްސަލައެއް ކަމަށާއި މިކަމުގެ ސަބަބުން ޖޫލިއަންއަށް ވަރަށް ބޮޑު ގެއްލުމެއް ލިބެމުންދާ ކަމަށެވެ."

އޮސްޓްރޭލިއާގެ ކޮމްޕިއުޓަރު މާހިރު ވަނީ ލަންޑަނުގައި ހުންނަ އިކުއެޑޯގެ އެމްބަސީގައި ހަތް އަހަރު ވަންދެން ހިމާޔަތް ހޯދުމަށް ފަހު މިދިޔަ ފަސް އަހަރު އިނގިރޭސިވިލާތުގެ ހައި ސެކިއުރިޓީ ޖަލެއްގައި ހޭދަކޮށްފަ އެވެ. ވިކިލީކްސްގެ ބާނީ ކޯޓަށް ހާޒިރުވެވަޑައިގެންފައެއް ނުވެއެވެ. އޭނާ ހާޒިރުވެވަޑައިނުގެންނެވީ ސިއްހީ ސަބަބަކާ ހުރެ ކަމަށް އޭނާގެ ވަކީލު ވިދާޅުވިއެވެ.

އަސާންޖްގެ ވަކީލުން ހޯމަ ދުވަހު ވިދާޅުވީ ވިކިލީކްސްގެ ބާނީ އެމެރިކާއަށް ފޮނުވާލައިފިނަމަ ނޫސްވެރިކަމުގެ މިނިވަން ރައްކާތެރިކަން ލިބޭނެ ކަމުގެ ޔަގީންކަން އެމެރިކާއިން ދީފައިނުވާ ކަމަށެވެ.

ވަކީލު އެޑްވާޑް ފިޓްޒްޖެރަލްޑް ވިދާޅުވީ އަސާންޖަކީ އޮސްޓްރޭލިއާގެ ރައްޔިތެއް ކަމަށާއި އެމެރިކާގެ ސިއްރު މައުލޫމާތު ޝާއިއުކުރުމަށް ނޫސްވެރިއެއްގެ ގޮތުގައި ރައްކާތެރިކަން ލިބޭ އަސާންޖަށް އެމެރިކާގެ ގާނޫނު އަސާސީގެ ފުރަތަމަ އިސްލާހުގެ ޕްރެސް ޕްރޮޓެކްޝަންތަކަށް ބަރޯސާވެވޭނެ ކަމުގެ ޔަގީންކަން ޕްރޮސެކިއުޓަރުންނަށް ނުދެވުނު ކަމަށެވެ.

"ހަގީގީ މައްސަލައަކީ ކޯޓުން ފާހަގަކުރި ހަގީގީ ނުރައްކާ ނައްތާލުމަށް އެކަށީގެންވާ ޔަގީންކަމެއް ދީފައިވޭތޯ،" ފިޓްޒެރަލްޑް ވިދާޅުވި އެވެ. އަދި އެކަށީގެންވާ ޔަގީންކަމެއް ދީފައި ނުވާ ކަމަށް ވެސް ވަނީ ހުށަހަޅައިފަ އެވެ.

އެމެރިކާގެ ޕްރޮސެކިއުޓަރުން ތުހުމަތު ކުރާ ގޮތުގައި ވިކިލީކްސް އިން ޝާއިއުކުރި ޑިޕްލޮމެޓިކް ކޭބަލްތަކާއި އަސްކަރީ ފައިލްތައް ވަގަށް ނެގުމަށް އެމެރިކާގެ އަސްކަރިއްޔާގެ އިންޓެލިޖެންސް އެނަލިސްޓް ޗެލްސީ މެނިންއަށް އަސާންޖް ހިތްވަރުދީ އެހީތެރިވެދިނެވެ.

އަސާންޖްގެ ވަކީލުން ބުނަމުން ދަނީ އަސާންޖަކީ އިރާގާއި އަފްޣާނިސްތާނުގައި އެމެރިކާގެ އަސްކަރީ ގޯސްތައް ހާމަކުރި ނޫސްވެރިއެއް ކަމަށެވެ. އަދި އޭނާ އެމެރިކާއަށް ފޮނުވުމުން ސިޔާސީ މަގްސަދެއްގައި ދައުވާއުފުލައި އިންސާފު ނުލިބުމުގެ ނުރައްކާ އޮންނާނެ ކަމަށް އެ މީހުން ބުނެއެވެ.

އެމެރިކާ ސަރުކާރުން ބުނަނީ އަސާންޖްގެ އަމަލުތައް ހިންގާފައިވަނީ ނޫސްވެރިޔަކު މައުލޫމާތު އެއްކުރާ މިންވަރަށްވުރެ މާ ބޮޑަށް ކަމަށާއި އެއީ ސަރުކާރުގެ ސިއްރު ލިޔުންތައް ހޯދުމާއި ވަގަށް ނެގުމާއި ނުހައްގުން ޝާއިއުކުރަން ކުރި މަސައްކަތެއް ކަމަށެވެ.