ސަރުކާރަށް 6 މަސް ވެގެންދިޔައިރު ވެސް މިނިސްޓްރީތަކުގެ މެންޑޭޓްތައް އަދިވެސް ފުރިހަމަ ނުކުރެވޭތީ ޕީއެންއެފްގެ ސެކެރެޓަރީ ޖެނެރަލް މުހައްމަދު މަލީހު ޖަމާލުގެ ފާޑުކިޔުން އަމާޒުކުރައްވައިފިއެވެ.

މަލީހުގެ ފާޑުކިޔުން ސަރުކާރަށް އަމާޒުކުރެއްވީ އެކްސްގައި ކުރެއްވި ޕޯސްޓެއްގައެވެ.

މި ސަރުކާރަކީ ހާމަކަން ބޮޑުގޮތެއްގައި ހިންގާނެ ސަރުކާރެއްކަމުގެ ވައުދާ އެކު އައި ސަރުކާރެއް ނަމަވެސް ސަރުކާރު ގާއިމުވެ ކަންކަން ހިންގަން ފެށި ދޯހަޅި ގޮތުން ފާދުކިޔުން އަމާޒުވާން ފެށުމުން ސަރުކާރުން ވަނީ މައުލޫމާތު ފޯރުކޮށްނުދީ ބައެއް މައުލޫމާތުތައް ހިފަަހައްޓަން ފަށާފައެވެ. އެކަމުގެ ކަންބޮޑުވުން އިންފޯމޭޝަން ކޮމިޝަނަރ ވެސް ފާޅުކޮށްފައިވާއިރު، ގިނަ ބަޔަކު ގެންދަނީ އެއީ ސަރުކާރުން ކަންކަން ވަންހަނާ ކޮށް މަކަރު ހެދުމަށް ގެންގުޅޭ އުކުޅެއް ކަމަށް ބުނެފައެވެ.

މިކަންކަން މިހެން ހުރުމާ އެކު މަލީހުގެ ފާޑުކިޔުން އަމާޒުކުރައްވާ ވިދާޅުވީ، ސަރުކާރަށް 6 މަސް ވެގެންދިޔައިރު ވެސް މިނިސްޓްރީތަކުގެ މެންޑޭޓްތައް އަދިވެސް ފުރިހަމަ ނުކުރެވޭކަމަށާ އޮފީސްތަކުގެ އިންފޮމޭޝަން އޮފިސަރުން ހާމަނުކުރެވޭ ކަމަށެވެ.

މީގެ އިތުރުން ވައުދުތައް ފުއްދާނެ އެކްޝަން ޕްލޭން އަދިވެސް ތައްޔާރު ނުކުރެވޭކަން ފާހަގަކުރައްވާ މަލީހު ވިދާޅުވީ މަސައްކަތްކުރިއަށް ދާގޮތް ހާާމަކުރަން މިޑީއާ ބްރީފިންގތައް ވެސް ނުބާއްވާ ކަމަށެވެ.

މަލީހުގެ ފާޑުކިޔުން އަމާޒުކުރެއްވިއިރު މި ސަރުކާރުން ގިނަ މައުލޫމާތުތައް ހޯދުމުގައި ނޫސްވެރިންނަށްވެސް ދަތިވެފައިވާކަން ވަނީ ފާހަގަވެފައެވެ. އެގޮތުން ސަރުކާރުގެ އިސް ތަރުޖަމާނު ހީނާ ވަލީދާ ސުވާލުކޮށް އެއް މަސް ވެގެން ދާއިރުވެސް ސުވާލުތަކުގެ ޖަވާބު ނުލިބޭކަން ފާހަގަވެފައިވެއެވެ.