އިސްރާއީލުގެ މެޑިކަލް ވޯކަރުން ބީބީސީއަށް މައުލޫމާތު ދެމުން ބުނެފައިވަނީ ޣައްޒާއިން ހައްޔަރުކޮށްފައިވާ ފަލަސްތީނުގެ ބަންދުގައި ތިބޭ މީހުން އާންމުކޮށް ހޮސްޕިޓަލުގައި އެނދާއެކު ކަސްތޮޅުއަޅުވައި، ކަނު ބަނދެ، ބައެއް ފަހަރު ބަރަހަނާކޮށް، ނެޕީ ޖެހުމަށް މަޖުބޫރުކުރާ ކަމަށެވެ.

ވިސްލް ބްލޯވަރަކު ތަފްސީލުކޮށް ބީބީސީއަށް ވަނީ އަސްކަރީ ހޮސްޕިޓަލެއްގައި ތަދުކެނޑޭ ބޭސް ނުލައި ޕްރޮސީޖަރތައް "ރޫޓިންކޮށް" ކުރިއަށް ގެންދާ ގޮތާއި، ބަންދު މީހުންނަށް "ގަބޫލު ނުކުރެވޭ މިންވަރަށް ތަދު" ލިބޭ ގޮތް ކިޔާދީފައެވެ.

އަނެއް ވިސްލް ބްލޯވަރަކު ބުނީ ޕަބްލިކް ހޮސްޕިޓަލެއްގައި ޣައްޒާގެ ބަންދު މީހެއްގެ މައްޗަށް އިންވޭސިވް މެޑިކަލް ޕްރޮސީޖަރެއް ކުރިއަށް ގެންދިޔައިރު ތަދުކެނޑޭ ބޭސް ބޭނުންކޮށްފައިވަނީ "ޚިޔާރުކޮށްގެން" އަދި "ވަރަށް ލިމިޓެޑް ގޮތެއްގައި" ކަމަށެވެ.

އަދި ވަގުތީ އަސްކަރީ ފެސިލިޓީތަކުގައި ބަހައްޓާފައިވާ ހާލު ސީރިއަސް ބަލިމީހުންނަށް އެކަށީގެންވާ ފަރުވާއެއް ނުދެވޭ ކަމަށް ވެސް އޭނާ ބުންޏެވެ.

އިސްރާއީލު ސިފައިން ސުވާލު ކުރުމަށް ޣައްޒާއިން ގެންގޮސް ފަހުން ދޫކޮށްލި ބަންދު މީހަކު ބީބީސީއަށް ބުނީ އޭނާގެ ފައި ކަނޑާލަން ޖެހުނީ ބަލިޖެހިފައިވާ ޒަހަމަކަށް ފަރުވާ ނުދިނުމުންނެވެ.

އެ ތުހުމަތުތައް ނިސްބަތްވާ އަސްކަރީ ހޮސްޕިޓަލުގައި މަސައްކަތްކުރާ އިސް ޑޮކްޓަރަކު ބުނެފައިވަނީ ގާޑުން ބޭނުންކުރާ ކަސްތޮޅުތަކާއި އެހެނިހެން ހިފެހެއްޓުންތަކަކީ ލާއިންސާނީ ގޮތްތައް ކަމަށް ބުނެފައެވެ.

އިސްރާއީލު ސިފައިން ބުނީ އެ ފެސިލިޓީގައި ބަންދުކޮށްފައި ތިބި މީހުންނާ މެދު އަމަލުކުރަމުން އަންނަނީ "އެކަށީގެންވާ އަދި ފަރުވާތެރިކަމާއެކު" ކަމަށެވެ.

ބީބީސީން ވާހަކަ ދެއްކި ދެ ވިސްލް ބްލޯވަރުން ވެސް ތިބީ ބަންދުގައި ތިބި މީހުންގެ ބޭސްފަރުވާ ކުރުމުގެ ކަންކަން އެނގޭ މަގާމުތަކުގައެވެ.

އެމީހުންގެ ވާހަކަތަކަށް ބާރު ލިބެނީ އިސްރާއީލުގެ ފިޒިޝަންސް ފޯ ހިއުމަން ރައިޓްސް އިން ފެބްރުއަރީ މަހު ޝާއިއުކުރި ރިޕޯޓަކުންނެވެ. އެ ރިޕޯޓުގައި ބުނެފައި ވަނީ އިސްރާއީލުގެ މަދަނީ އަދި އަސްކަރީ ޖަލުތައް ވެފައިވަނީ "ބަދަލު ހިފުމާއި ބަދަލު ހިފުމުގެ ވަސީލަތަކަށް" ކަމަށާއި ބަންދުގައި ތިބި މީހުންގެ އިންސާނީ ހައްގުތަކަށް އަރައިގަންނަމުންދާ ކަމަށެވެ.

ބަލިވެ ޒަޚަމްވެފައިވާ ބަންދު މީހުންނަށް ފަރުވާ ދިނުމާ ގުޅޭ ކަންބޮޑުވުންތައް އަމާޒުވެފައި ވަނީ އިސްރާއީލުގެ ދެކުނުގެ ސްޑޭ ޓެއިމަން އަސްކަރީ މަރުކަޒުގައި ހުންނަ އަސްކަރީ ފީލްޑް ހޮސްޕިޓަލަކަށެވެ.

ހަމާސްއިން ދިން ހަމަލާތަކަށް ފަހު އިސްރާއީލުގެ ހެލްތު މިނިސްޓްރީން މި ފީލްޑް ހޮސްޕިޓަލް ގާއިމްކުރި މަގްސަދު ކަމަށް ބުނެފައިވަނީ، ހަމާސްގެ ހަމަލާތައް ދިން ދުވަހު އަތުލައިގަތް ހަނގުރާމަވެރިންނަށް ފަރުވާ ދިނުމަށް ބައެއް ޕަބްލިކް ހޮސްޕިޓަލްތަކާއި މުވައްޒަފުން ފަސްޖެހުމުންނެވެ.

އޭގެ ފަހުން އިސްރާއީލުގެ ސިފައިން ވަނީ ޣައްޒާގެ ގިނަ އަދަދެއްގެ މީހުން ހައްޔަރުކޮށް ސްޑޭ ޓައިމަން ފަދަ މަރުކަޒުތަކަށް ސުވާލު ކުރުމަށް ގެންގޮސްފަ އެވެ.  ހަމާސް އަށް ހަނގުރާމަކުރާ ކަމަށް ޝައްކު ކުރެވޭ މީހުން އިސްރާއީލުގެ ޑިޓެންޝަން ސެންޓަރުތަކަށް ފޮނުވަ އެވެ؛  އިތުރު އެތައް ބަޔަކު ދައުވާއެއް ނެތި އަނބުރާ ޣައްޒާއަށް ދޫކޮށްލައެވެ.

އިސްރާއީލުން ހިފަހައްޓާފައި ތިބި މީހުންގެ ތަފްސީލެއް  ހާމައެއް ނުކުރެއެވެ.

ސްޑޭ ޓެއިމަން ހޮސްޕިޓަލުގެ ބަލިމީހުން ކަނު ބަނދެ ދާއިމީ ގޮތެއްގައި އެނދުގައި ހަތަރެސްފައިގަ އެނދާއެކު ކަސްތޮޅު އަޅުވައި ބަހައްޓާ ކަމަށް އެތަނުގެ ބަލިމީހުންނަށް ފަރުވާ ދިނުމުގެ ޒިންމާ އުފުލާ ބައެއް މެޑިކްސް ބުނެއެވެ.

އަދި ފާޚާނާ ބޭނުން ކުރުމަށް ނެޕީ ޖައްސާފައި ބަހައްޓައެވެ.

އިސްރާއީލުގެ ސިފައިން ރައްދުގައި ބުނީ ސްޑޭ ޓެއިމަން ހޮސްޕިޓަލުގައި ބަންދުކޮށްފައި ތިބި މީހުންގެ އަތް ކަނޑާލުމަކީ "ވަކިވަކިން އަދި ކޮންމެ ދުވަހަކު ވެސް ބަލާ، އަދި ސަލާމަތީ ނުރައްކަލުގެ ސަބަބުން އެކަން ކުރަން ޖެހޭ ހާލަތްތަކުގައި ކުރިއަށް ގެންދާ" ކަމެއް ކަމަށެވެ.

އަދި ނެޕީ [ޑައިޕަރސް] ބޭނުންކޮށްފައިވަނީ "ހަމައެކަނި މެޑިކަލް ޕްރޮސީޖަރތައް ހަދާފައިވާ ބަންދުގައި ތިބޭ މީހުންނަށް ކަމަށް" ކަމަށް އެ ބަޔާނުގައި ބުނެފައިވެއެވެ.

އެކަމަކު އެ ފެސިލިޓީގެ ސީނިއާ އެނެސްތިއޮލޮޖިސްޓް ޔޯއެލް ޑޮންޗިން ހިމެނޭ ގޮތަށް މަންޒަރު ދުށް މީހުން ބުނާ ގޮތުގައި ހޮސްޕިޓަލް ވޯޑުގައި ނެޕީ އާއި ކަސްތޮޅު ބޭނުން ކުރުމަކީ ވެސް އާންމު ކަމެކެވެ.

"ސިފައިން ބަލިމީހާ 100% ޑިޕެންޑެންޓް މީހަކަށް ހަދާ، ތުއްތު ކުއްޖެއް ފަދައިން،" އޭނާ ވިދާޅުވި އެވެ.  “ބިޑި އަޅުވާފައި، ނެޕީ ޖައްސުވާފައި ތިބުމުން، ކެއިން ބުއިމާއި ހުރިހާ ކަމެއް ކުރެވެނީ އެހެން މީހެއް ކޮށްދިނުމުން – އެއީ އިންސާނީ ކަރާމާތް ގެއްލުވާލުން".

ޑރ ޑޮންޗިން ވިދާޅުވީ ހިފެހެއްޓުމުގެ ބޭނުންތެރިކަން ވަކިވަކިން ވަޒަންކޮށްފައި ނުވާ ކަމަށާއި، ހިނގަން ނުކުޅެދޭ ބަލިމީހުންނަށް ވެސް - މިސާލަކަށް ފައި ކަނޑާފައިވާ ބަލިމީހުންނަށް ވެސް އެނދުގައި އަތް ކަނޑާލާފައިވާ ކަމަށެވެ.  އޭނާ ސިފަކުރެއްވީ އެ ޢަމަލަކީ "މޮޔަ" އަމަލެއްގެ ގޮތުގައެވެ.

ޣައްޒާ ހަނގުރާމައިގެ ކުރީކޮޅު އެ ފެސިލިޓީގައި ތިބި ދެ ހެކިވެރިން ކިޔައިދިން ގޮތުގައި އެތަނުގައި ތިބި ބަލިމީހުން ބަރަހަނާކޮށް ބްލެންކެޓް ދަށުގައި ބަހައްޓާފައި ތިއްބެވެ.

އެތަނުގެ ހާލަތު އެނގޭ ޑޮކްޓަރަކު ބުނީ އެނދުތަކުގައި ގިނަ އިރު ވަންދެން ބިޑި އެޅުވުމަކީ "ބޮޑު ތަކުލީފެއް، ބިރުވެރި ތަކުލީފެއް" ކުރިމަތިވާނެ ކަމެއް ކަމަށާއި އެއީ "އަނިޔާއެއް" ގެ ގޮތުގައި ސިފަކޮށް، މަދު ގަޑިއިރަކަށް ފަހު ބަލި މީހުންނަށް ވޭން އިހުސާސް ކުރަން ފަށާނެ ކަމަށެވެ.

އަނެއް ބަޔަކު ވަނީ ދިގު މުއްދަތަކަށް ނާރުތަކަށް ގެއްލުން ލިބުމުގެ ނުރައްކާ އޮތް ވާހަކަ ދައްކާފައެވެ.

ޣައްޒާގެ ބަންދު މީހުންނާ ސުވާލުކުރުމަށްފަހު ދޫކޮށްލި މީހުންގެ ހަށިގަނޑުން ފެންނަނީ އަނިޔާތަކާއި އަތްތިލައާއި ފައިގެ ވަށައިގެން ޒަހަމްތަކެއް ހުރިތަނެވެ.

މިދިޔަ މަހު އިސްރާއީލުގެ ދުވަހު ނޫސް ހާރެޓްޒްގައި ސްޑޭ ޓެއިމަން ސައިޓުގައި ޑޮކްޓަރަކާ ހަވާލާދީ ދެ ގައިދީންގެ ފައި ކަނޑާލާފައިވަނީ، ބިޑި އެޅުވައި ލިބުނު އަނިޔާތަކުގެ ސަބަބުން ބުރިކޮށްފައިވާ ކަމަށް ރިޕޯޓްކޮށްފައިވެއެވެ.

މި ތުހުމަތުތައް ކޮށްފައިވަނީ، ޑޮކްޓަރު ސަރުކާރުގެ ވަޒީރުންނާއި ބަންޑާރަ ނައިބަށް ފޮނުއްވި ސިޓީއެއްގައެވެ.

ޑޮންޗިން ވިދާޅުވީ ގުނަވަން ކަނޑާލުމަކީ ސީދާ ކަސްތޮޅު އެޅުވުމުގެ ނަތީޖާއެއް ނޫން ކަމަށާއި އޭގެ ތެރޭގައި އިންފެކްޝަން، ހަކުރު ބަލި ނުވަތަ ލޭހޮޅިތަކަށް ދިމާވާ މައްސަލަތައް ފަދަ އެހެނިހެން ސަބަބުތައް ހިމެނޭ ކަމަށެވެ.

އިސްރާއީލުގެ މެޑިކަލް ގައިޑްލައިންގައި ބުނެފައި ވަނީ ވަކި ސަލާމަތީ ސަބަބެއް އޮވެގެން ނޫނީ އެއްވެސް ބަލިމީހަކު ހިފެހެއްޓުމަށް ނުޖެހޭނެ ކަމަށާއި، ހިފެހެއްޓުމުގެ އެންމެ ކުޑަ މިންވަރު ބޭނުން ކުރަން ޖެހޭނެ ކަމަށެވެ.

އެގައުމުގެ މެޑިކަލް އެތިކްސް ބޯޑުގެ ވެރިޔާ ޔޯސީ ވަލްފިޝް އެތަނަށް ޒިޔާރަތް ކުރެއްވުމަށް ފަހު ވިދާޅުވީ ހުރިހާ ބަލިމީހުންނަށް ވެސް އަތް ކަނޑާނުލައި ފަރުވާ ދިނުމުގެ ހައްގު ލިބިގެންވާ ކަމަށާއި ނަމަވެސް އެތިކަލް އެހެން ކަންކަމަށް ވުރެ މުވައްޒަފުންގެ ރައްކާތެރިކަން ކުރިއަރާ ކަމަށެވެ.

"ޓެރަރިސްޓުންނަށް ރަނގަޅު ބޭސްފަރުވާއެއް ދެނީ،" ޝާއިއުކޮށްފައިވާ ސިޓީއެއްގައި އޭނާ ބުންޏެވެ، "ހިފެހެއްޓުން އެންމެ ކުޑަމިނުގައި ބެހެއްޓުމުގެ މަގުސަދުގައި އަދި ފަރުވާދޭ މުވައްޒަފުންގެ ރައްކާތެރިކަން ދެމެހެއްޓުމުގެ މަގުސަދުގައި."

އިސްރާއީލުގެ ސިފައިން ހިފަހައްޓާފައިވާ ޣައްޒާގެ ގިނަ ބަޔަކު ސުވާލުކުރުމަށް ފަހު ދައުވާއެއް ނެތި ދޫކޮށްލައެވެ.

ޑރ ޑޮންޗިން ވިދާޅުވީ ސްޑޭ ޓެއިމަން އަސްކަރީ ހޮސްޕިޓަލުގެ މެޑިކަލް ސްޓާފުންގެ ޝަކުވާތަކުގެ ސަބަބުން ބަދަލުތަކެއް އައިސްފައިވާ ކަމަށާއި އޭގެ ތެރޭގައި ދޫ ކަސްތޮޅަށް ބަދަލުކުރުން ހިމެނޭ ކަމަށެވެ. އޭނާ ބުނީ އެއްވެސް ސާޖިކަލް ޕްރޮސީޖަރެއްގެ ކުރިން ގާޑުން ކިބައިން ކަސްތޮޅު ނައްޓާލަން ބާރުއަޅާ ކަމަށެވެ.

"އެތަނުގައި މަސައްކަތް ކުރުމަކީ ހިތްގައިމު ކަމެއް ނޫން،" އޭނާ ވިދާޅުވި އެވެ. “އަހަންނަށް އެނގޭ އެނދުގައި ބިޑި އަޅުވާފައި މީހަކަށް ފަރުވާ ދިނުމަކީ އެތިކަލް ކޯޑާ ހިލާފު ކަމެއްކަން. އެކަމަކު އޭގެ ބަދަލަކީ ކޮބައި ހެއްޔެވެ؟ އެމީހުން މަރުވާން ދޫކޮށްލުން ރަނގަޅު ހެއްޔެވެ؟ އަޅުގަނޑަކަށް ހިއެއް ނުވޭ."

އެކަމަކު ރިޕޯޓްތަކުން ދައްކާ ގޮތުގައި ބަންދު މީހުންނާ މެދު މެޑިކަލް ސްޓާފުންގެ ވިސްނުން ވަރަށް ތަފާތު ކަމަށާއި، އަސްކަރީ ހޮސްޕިޓަލްތަކާއި ސިވިލް ހޮސްޕިޓަލްތަކުގައި ވެސް ތަފާތު ކަމަށެވެ.

މިދިޔަ އޮކްޓޯބަރު މަހު ސްޑޭ ޓެއިމަން ފީލްޑް ހޮސްޕިޓަލުގައި މަސައްކަތްކުރި ވިސްލް ބްލޯވަރަކު ވަނީ ބަލިމީހުންނަށް އެނެސްތެޓިކް ހިމެނޭ ގޮތަށް އެކަށީގެންވާ މިންވަރަކަށް ތަދުކެނޑޭ ބޭސް ނުދިން މައްސަލަތައް ފާހަގަ ކޮށްފައެވެ.

އޭނާ ބުނީ އެއްފަހަރަކު އުމުރުން ދުވަސްވީ ބަލިމީހެއްގެ ޒަޚަމަކަށް ފަރުވާ ދޭން އުޅުމުން ތަދުކެނޑޭ ބޭސް ދިނުމަށް އޭނާ އެދުމުން ޑޮކްޓަރަކު ދެކޮޅު ހަދާފައިވާ ކަމަށެވެ.

"[ބަލިމީހާ] ތަދުން ތުރުތުރު އަޅަން ފެށީ، އަދި އެހެންވެ އަހަރެން ބުނިން 'އަހަރެމެންނަށް ކުރިއަށް ނުދެވޭނެ، ޔޫ ނީޑް ޓު ގިވް ހިމް އެނަލްޖީޝިއާ'،" އޭނާ ބުންޏެވެ.

ޑޮކްޓަރު ބުނީ ދިނުމަށް މާ ލަސްވެއްޖެ ކަމަށެވެ.

ހެކިވެރިޔާ ބުނީ މިފަދަ ޕްރޮސީޖަރުތަކަކީ "ތަދުކެނޑުމެއް ނެތި އާންމުކޮށް ކުރާ ކަންތައްތަކެއް" ކަމަށާއި އޭގެ ނަތީޖާއެއްގެ ގޮތުން "ގަބޫލު ނުކުރެވޭ މިންވަރަށް ތަދު" ލިބޭ ކަމަށެވެ.

އެހެން ފަހަރަކު ހަމާސްގެ ހަނގުރާމަވެރިއެއް ކަމަށް ޝައްކު ކުރެވޭ މީހަކު އޭނާގާތު އެދުނީ ތަކުރާރުކޮށް ސާޖަރީ ކުރާއިރު މޯފިން އާއި އެނެސްތެޓިކްގެ މިންވަރު އިތުރު ކުރުމަށް ސާޖިކަލް ޓީމަށް އެހުމަށް.

އެ މެސެޖު ފޯރުކޮށްދިން ނަމަވެސް ދެން ކުރި އޮޕަރޭޝަންގައި ޝައްކު ކުރެވޭ މީހާއަށް އަނެއްކާވެސް ހޭވެރިކަން ލިބި ވަރަށް ބޮޑަށް ތަދުވަމުން ދިޔައެވެ. ހެކިވެރިޔާ ބުނީ އޭނާ އާއި އެހެން އެކުވެރިންނަށް ވެސް ހީވީ އެއީ ގަސްތުގައި ބަދަލު ހިފުމުގެ އަމަލެއް ކަމަށް ހީވާ ކަމަށެވެ.

މި ތުހުމަތުތަކަށް ރައްދުދީ ސިފައިން ބުނީ ބަންދުގައި ތިބި މީހުންނަށް އަނިޔާކުރުމަކީ "މުޅިން މަނާ" ކަމެއް ކަމަށާއި، އެމީހުންގެ ކިބައިން ލާޒިމުކުރާ އަމަލުތަކާ ބެހޭ މައުލޫމާތު ގަވާއިދުން ސިފައިންނަށް ދޭ ކަމަށެވެ. އަނިޔާވެރިކަމުގެ ނުވަތަ ނިކަމެތިކަމުގެ އެއްވެސް ކޮންކްރީޓް ތަފްސީލެއް ބަލާނެ ކަމަށް އިސްރާއީލުން ބުންޏެވެ.

ދެވަނަ ވިސްލް ބްލޯވަރަކު ބުނީ ސްޑޭ ޓެއިމަންގެ ހާލަތަކީ ޕަބްލިކް ހޮސްޕިޓަލްތަކަށް ވެސް ފެތުރިފައިވާ މައްސަލައިގެ ބައެއް ކަމަށެވެ. ބީބީސީން އޭނާގެ ވަނަވަރު ރައްކާތެރި ކުރަން 'ޔޯނީ' ގެ ނަން ބޭނުން ކުރިއެވެ.

7 އޮކްޓޯބަރުގައި ދިން ހަމަލާތަކަށް ފަހު އައި ދުވަސްތަކުގައި އިސްރާއީލުގެ ދެކުނުގެ ހޮސްޕިޓަލްތަކަށް ކުރިމަތިވި ގޮންޖެހުމަކީ ޒަޚަމްވި ހަނގުރާމަވެރިންނާއި ޒަޚަމްވި އިސްރާއީލުގެ މީހުންނަށް ވެސް ފަރުވާ ދިނުމުގެ ގޮންޖެހުން ކަމަށާއި ގިނަ ފަހަރަށް އެއް އެމަޖެންސީ ޑިޕާޓްމަންޓްތަކެއްގައި ދެބައިމީހުންނަށް ފަރުވާ ދޭން ޖެހުނެވެ.

"އިންތިހާއަށް ޖަޒުބާތީ މާހައުލެއް އޮތީ،" ޔޯނީ ބުންޏެވެ. “ހޮސްޕިޓަލްތައް މުޅިން ފުރިގެން ދިޔައީ ނަފްސާނީ ގޮތުން ވެސް އަދި ކެޕޭސިޓީގެ ގޮތުން ވެސް.”

“ޣައްޒާއިން ބަންދުކޮށްފައި ތިބި މީހުންނަށް ތަދުކެނޑޭ ބޭސް ދޭންވީތޯ ސްޓާފުން މަޝްވަރާ ކުރި ހާދިސާތަކެއް އަޅުގަނޑު އަޑުއެހި. ނުވަތަ ފަރުވާ އަދަބަކަށް ބަދަލުކޮށްލެވޭނެ ވަކި ޕްރޮސީޖަރސްތަކެއް ކުރިއަށް ގެންދެވޭނެ ގޮތްތައް.”

މިފަދަ ވާހަކަތަކަކީ އާންމުކޮށް އަޑު އިވޭ ވާހަކަތަކެއް ކަމަށާއި ހަގީގީ ހާދިސާތައް ވަރަށް މަދު ކަމަށް އޭނާ ބުންޏެވެ.

"އަޅުގަނޑަށް އެނގޭ އެއް ކޭސްއެއްގައި ތަދުކެނޑޭ ބޭސްތައް ޚިޔާރުކޮށްގެން، ވަރަށް ލިމިޓެޑް ގޮތެއްގައި، ޕްރޮސީޖަރެއްގެ ތެރޭގައި ބޭނުންކުރި،" ބީބީސީއަށް ވިދާޅުވި އެވެ.

“ބަލިމީހާއަށް ވެގެން އުޅޭ ގޮތުގެ އެއްވެސް ބަޔާނެއް ނުލިބުނު. އެހެންވީމާ، އެއްކޮށް [އެއީ] މީހަކު އިންވޭސިވް ޕްރޮސީޖަރެއް ކުރިއަށް ގެންދާނަމަ، އިންސިޝަން ވެސް ހިމެނޭ ގޮތަށް، އަދި އެކަން ނޭނގި، ކަނު ބަނދެފައި ހުރިނަމަ، ދެން ފަރުވާއާއި ހަމަލާއާ ދެމެދުގައިވާ ރޮނގު ތުނިވެގެން ދާނެ.”

އަދި ސްޑޭ ޓެއިމަން ފީލްޑް ހޮސްޕިޓަލަކީ ބޮޑެތި އަނިޔާތަކެއް ލިބިފައިވާ ބަލިމީހުންނަށް ފަރުވާ ދިނުމަށް ވަސީލަތްތައް ނެތް ހޮސްޕިޓަލެއް ކަމަށާއި ނަމަވެސް ހަނގުރާމައިގެ ކުރީކޮޅު އެތަނުގައި ބަންދުކުރި ބައެއް މީހުންގެ މޭމައްޗާއި ބަނޑުގައި ތާޒާ ބަޑިޖެހި ޒަހަމްތަކެއް ހުރި ކަމަށް ވެސް ޔޯނީ ވިދާޅުވި އެވެ.

އޭނާ ވިދާޅުވީ ސީރިއަސް ބަލި މީހަކު އެތަނުގައި ބަހައްޓާފައި ވަނީ އޭނާ ފަރުވާއަށް ބަލައިގަންނަން ސަރުކާރު ހޮސްޕިޓަލްތަކުން ދެކޮޅު ހެދުމުގެ ސަބަބުން ކަމަށާއި ބޭސްގައި ތިބި ޑޮކްޓަރުން ތިބީ އެހާލަތުން "މާޔޫސްވެފައި" ކަމަށެވެ.

ޚާން ޔޫސްގެ އުމުރުން 43 އަހަރުގެ ޓެކްސީ ޑްރައިވަރެއް ކަމަށްވާ ސޫފިއަން އަބޫ ސަލާހަކީ އިސްރާއީލުގެ ސިފައިން ހިންގި ރޭޑްތަކުގައި ހިފަހައްޓައި ސުވާލު ކުރުމަށް އަސްކަރީ މަރުކަޒަކަށް ގެންދިޔަ މީހުންގެ ތެރެއިން އެކަކެވެ.

އޭނާ ވިދާޅުވީ ދަތުރުގެ ތެރޭގައި އަދި އެ ބޭސްއަށް ދިޔުމުން ވެސް ސިފައިން ބޮޑެތި އަނިޔާ ކޮށްފައިވާ ކަމަށާއި އެތަނުން އޭނާގެ ފައިގައި ކުޑަ ޒަހަމަކަށް ފަރުވާ ދިނުމަށް އިންކާރުކޮށްފައިވާ ކަމަށާއި އޭގެ ފަހުން ބަލި ޖެހުނު ކަމަށެވެ.

"އަހަރެންގެ ފައި އިންފެކްޓްވެ ނޫ ވެގެން ދިޔައީ، އަދި ސްޕޮންޖެއް ފަދައިން މަޑުވި،" ބީބީސީއަށް ދިން އިންޓަވިއުއެއްގައި އޭނާ ބުންޏެވެ.

ހަފްތާއެއްހާ ދުވަސް ފަހުން ގާޑުން އޭނާ ހޮސްޕިޓަލަށް ގެންގޮސް، މަގުމަތީގައި އަނިޔާވި ފައިގައި ތަޅައިގަތެވެ. އޭނާގެ ޒަޚަމް ސާފުކުރުމަށް ކުރި ދެ އޮޕަރޭޝަނެއް ވެސް ކާމިޔާބެއް ނުވި ކަމަށް އޭނާ ބީބީސީއަށް ކިޔައިދިނެވެ.

“އޭގެ ފަހުން އެމީހުން އަހަރެން ގެންދިޔައީ ޕަބްލިކް ހޮސްޕިޓަލަކަށް، ޑޮކްޓަރު އަހަންނަށް ދެ ގޮތެއް ދިނީ އަހަރެންގެ ފައި ނުވަތަ އަހަރެންގެ ފުރާނަ.”

އޭނާ ދިރިއުޅުން އިޚްތިޔާރުކުރިއެވެ. އެމީހުން އޭނާގެ ފައި ކަނޑާލުމަށްފަހު، އޭނާ އަނބުރާ އަސްކަރީ މަރުކަޒަށް ފޮނުވާލުމަށްފަހު، ފަހުން އަނބުރާ ޣައްޒާއަށް ދޫކޮށްލިއެވެ.

"މި ދުވަސްވަރަކީ ނަފްސާނީ އަދި ޖިސްމާނީ އަނިޔާއެއް،" އޭނާ ބުންޏެވެ.

އޮކްޓޯބަރު މަހުގެ 7 ވަނަ ދުވަހު ދިން ހަމަލާއަށް ފަހު އިސްރާއީލުގެ ސިއްހަތާ ބެހޭ ވުޒާރާއިން ވަނީ ޣައްޒާގެ ހުރިހާ ގައިދީންނަށް އަސްކަރީ ނުވަތަ ޖަލު ހޮސްޕިޓަލްތަކުގައި ފަރުވާ ދިނުމަށް އަންގާފައެވެ.

މި ނިންމުމަށް އިސްރާއީލުގެ މެޑިކަލް އެސްޓޭބްލިޝްމަންޓްގެ ގިނަ ބައެއްގެ ތާއީދު ލިބުނުއިރު، ޔޯސީ ވަލްފިޝް ވަނީ އެއީ އާންމު ސިއްހަތުގެ ނިޒާމުން "ހަމާސްގެ ޓެރަރިސްޓުންނަށް" ފަރުވާ ދިނުމުގެ ޒިންމާ ނައްތާލާނެ "އަޚްލާގީ މައްސަލައަކަށް" ހައްލެއް ކަމަށް ބުނެ ތައުރީފުކޮށްފައެވެ.

އަނެއް ބަޔަކު ވަނީ ސްޑޭ ޓެއިމަން ބަންދުކުރުމަށް ގޮވާލާ، އެތަނުގެ ހާލަތަކީ "މެޑިކަލް ޕްރޮފެޝަނަށް، އަދި މެޑިކަލް އެތިކްސްއަށް މީގެ ކުރިން ނުފެންނަ ދަށް ނިޝާނެއް" ކަމަށް ސިފަކޮށްފައެވެ.

"އަހަރެންގެ ބިރަކީ ސްޑޭ ޓެއިމަންގައި އަހަރެމެން މިކުރާ ކަންތައްތަކުގެ ސަބަބުން ކުރިން އޮތް ގޮތަށް އެނބުރި އައުމުގެ ފުރުސަތު ނުލިބޭނެ ކަމުގެ ބިރު،" ބީބީސީއަށް ދިން އިންޓަވިއުއެއްގައި އެއް ޑޮކްޓަރަކު ބުންޏެވެ. “އެހެނީ ކުރިން އަޅުގަނޑުމެންނަށް ބުއްދިވެރި ނޫން ގޮތަކަށް ފެނުނު ކަންތައްތައް، މި ކްރައިސިސް ނިމުމުން ބުއްދިވެރި ގޮތަކަށް ފެންނާނެ.”

އެނެސްތެސިއޮލޮޖިސްޓް ޔޯއެލް ޑޮންޗިން ބުނީ ފީލްޑް ހޮސްޕިޓަލުގެ މެޑިކަލް ސްޓާފުން ބައެއް ފަހަރު އެއްވެ އެތަނުގެ ހާލަތާ މެދު ރޮއިގަންނަ ކަމަށެވެ.

“ހޮސްޕިޓަލް ބަންދުވާ ހިސާބުން،” އޭނާ ބުންޏެވެ، “އަހަރެމެން އުފާފާޅުކުރާނަން.”