ޗައިނާއިން ޓައިވާން ވަށައިގެން ކުރަމުންދާ އަސްކަރީ ޑްރިލްތަކަކީ "ވަކިވުމުގެ އަމަލުތައް" ހިންގުމުން ދޭ "ހަރުކަށި އަދަބެއް" ކަމަށް ބުނެފިއެވެ.

އަމިއްލައަށް ވެރިކަން ކުރާ ޖަޒީރާގެ އާ ރައީސްގެ މަގާމަށް ވިލިއަމް ލައި ހުވާ ކުރެއްވިތާ އެންމެ ތިން ދުވަސް ފަހުން ޗައިނާއިން ޓައިވާން ވަށައިގެން އަސްކަރީ ތަމްރީނުތައް ވަނީ ފަށާފައެވެ.

ޗައިނާގެ ޕީޕަލްސް ލިބަރޭޝަން އާމީގެ ތަރުޖަމާނު ލީ ޝީ ވަނީ މި ޑްރިލްތަކަކީ "ވަކިވުމުގެ އަމަލުތަކަށް" ދޭ "ވަރުގަދަ އަދަބެއް" ކަމަށް ވިދާޅުވެފައެވެ.

ބުރާސްފަތި ދުވަހުގެ ވަގުތެއްގައި ފެށި މި ޑްރިލްތައް ހިނގަމުންދަނީ މައި ޖަޒީރާގެ ހުރިހާ ހިސާބެއްގައި، އޭގެ ހުޅަނގުން ޓައިވާން ސްޓްރެއިޓް ހިމެނޭ ގޮތަށް، އަދި ޓައިޕޭގެ ކޮންޓްރޯލް އޮންނަ ކިންމެން، މަޓްސޫ، ވޫކިއު އަދި ޑޮންގްއިން ޖަޒީރާތަކުގެ ވަށައިގެންނެވެ.

ޓައިވާންގެ ޑިފެންސް މިނިސްޓްރީން ވަނީ ބެއިޖިންގެ އަމަލުތައް ކުށްވެރިކޮށް، އެއީ "ބުއްދިވެރި ނޫން ޕްރޮވޮކޭޝަންތަކެއް" ކަމަށް ބުނެފައެވެ.

ޓައިޕޭ އިން ވަނީ "[ޖަޒީރާގެ] އިސްތިގުލާލު ދިފާއު ކުރުމަށް" ކަނޑުގެ ސިފައިންނާއި ވައިގެ ސިފައިންނާއި ބިމުގެ ސިފައިން ނެރެފައެވެ.

ޗައިނާގެ އަސްކަރިއްޔާއިން ބުނީ ޗައިނާގެ ޑްރިލްތަކުގައި ޖޮއިންޓް ސީ އެއާ ކޮމްބަޓް ރެޑިނެސް ޕެޓްރޯލްތަކާއި މުހިއްމު އަމާޒުތަކަށް ޕްރެސިޝަން ސްޓްރައިކްތަކާއި ޖަޒީރާގެ އެތެރެއާއި ބޭރުގައި އިންޓަގްރޭޓެޑް އޮޕަރޭޝަންތައް ހިންގާނެ ކަމަށެވެ.

"މިއީ ވެސް ޓައިވާންގެ ވަކިވެގަތުމުގެ އަމަލުތަކަށް ދޭ ހަރުކަށި އަދަބެއް ކަމަށާއި ބޭރުގެ ބާރުތަކުގެ ތަދައްޚުލުވުމާއި ޕްރޮވޮކޭޝަނަށް ދޭ ހަރުކަށި އިންޒާރެއް،" ކަމަށް ޗައިނާއިން ބުނެފައިވެއެވެ.

ޗައިނާއިން ޒަމާނުއްސުރެ އަމިއްލައަށް ވެރިކަންކުރާ ޓައިވާނަކީ އެގައުމުގެ ސަރަހައްދުގެ ބައެއްގެ ގޮތުގައި ދައުވާ ކުރަމުން އަންނަ ނަމަވެސް - އެ ޖަޒީރާއިން ދެކެނީ އަމިއްލައަށް ވަކި ތަނެއްގެ ގޮތުގައެވެ.

މީގެ ކުރިން ޓައިވާންގެ މިނިވަންކަމަށް ތާއީދުކޮށް ދެއްކެވި ވާހަކަތަކާ ގުޅިގެން ބެއިޖިން އިން ވަނީ ލައި އަކީ "ވަކިވެގަންނަ" އަދި "މައްސަލަ އުފައްދާ މީހެއް" ކަމަށް ބުނެފައެވެ.

މިދިޔަ ހޯމަ ދުވަހު ދެއްވި އިފްތިތާހީ ޚިޠާބުގައި ލައި ވަނީ ޗައިނާއަށް "ޓައިވާނަށް އިންޒާރު ދިނުން ހުއްޓާލުމަށް" ގޮވާލައްވާފައެވެ.

ބެއިޖިން އިން ވަނީ އެ ތަގުރީރު ކުށްވެރިކޮށް، ފޮރިން މިނިސްޓަރު ވަންގް ޔީ ވަނީ ލައި އަކީ "ހަޔާތްކުޑަ" މީހެއްގެ ގޮތުގައި ސިފަ ކުރައްވާފައެވެ.

މިދިޔަ ޖެނުއަރީ މަހު ލައި އިންތިހާބު ކާމިޔާބު ކުރެއްވުމަށް ފަހު ބެއިޖިން އިން ވަނީ "ޓައިވާނަކީ ޗައިނާގެ ބައެއް" ކަމަށް ބުނެ ބަޔާނެއް ނެރެފައެވެ. އަދި މަޝްވަރާ ކުރުމަށް ލައި ހުށަހެޅުއްވި ހުށަހެޅުންތަކަށް ވެސް ތަކުރާރުކޮށް ދެކޮޅު ހަދާފައެވެ.

ފާއިތުވި އަހަރު ތެރޭގައި ޗައިނާއިން ވަނީ ޖެޓްތަކާއި ކަނޑުގެ ސިފައިންގެ ބޯޓުތަކުން ޓައިވާން ވަށާލުމަށް ތަކުރާރުކޮށް ރިހާސްކޮށްފައެވެ. މިސްޓަރ ލައިގެ މަގާމަށް ވަޑައިގަތުމުގެ ކުރިން ހަފްތާތަކުގައި ޓައިވާނުން ވަނީ ޗައިނާގެ އަސްކަރީ ވަދެގަތުންތައް އިތުރުވެފައިވާ ކަމަށް ރިޕޯޓްކޮށްފައެވެ.