"ށ" އިން ފެށޭ ބަސްތަކެއް އުފައްދަން ސަރުކާރުން ނޫޅޭ ކަމަށް ދިވެހިބަހާއި ސަގާފަތާއި ތަރިކައާ ބެހޭ ވަޒީރު، އާދަމް ނަސީރު ވިދާޅުވެއްޖެއެވެ.
އެ ވުޒާރާގެ މަސައްކަތަކާ ހާސިލްކުރެވުނު މިންވަރާ ކުރިއަށް ހުރި ކަންކަން ހާމަކުރުމަށް ދިވެހިބަހާއި ސަގާފަތާއި ތަރިކައާ ބެހޭ ވުޒާރާއިން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ވަޒީރު ވިދާޅުވީ، ދޮގު ހަބަރު ފަތުރާ ބްލޮގްތަކެއްގެ ގޮތުގައި މީސް މީޑިޔާގައި އޮޕަރޭޓުކުރަމުން ގެންދާ ބައެއް ސައިޓުތަކުގައި ޝާއިއު ކުރާ ޚަބަރުތަކުގެ ސަބަބުން ރައްޔިތުންނަށް އޮޅުން އަރާ ކަމަށާ ފާއިތުވި ހަފްތާގައި އެފަދަ ދެކަމެއް ހިނގާފައިވާ ކަމަށެވެ.
އެގޮތުން އެއް ކަމަކީ އެ ވުޒާރާގެ ކްލިނިކެއް އައިޖިއެމްއެޗުގައި ގާއިމުކުރަން އުޅޭ ކަމަށް ބުނެ ފެތުރި ޚަބަރަކާ "ށ" އިން ފެށޭ ބަސްތަކެއް އުފައްދަން ސަރުކާރުން މަސައްކަތްކުރާ ކަމަށް ބުނެ ފެތުރި ޚަބަރު ކަމަށެވެ.
ކްލިނިކު އުފައްދާ ކަމަށް ބުނެ ފެތުރީ ދޮގެއް. އަނެއް ދޮގު ޚަބަރަކީ ށ އިން ފެށޭ ބަސް އުފައްދަން އުޅޭ ކަމަށް ބުނެ ފެތުރި ޚަބަރު. އެއީ އަޅުގަޑު ނުދައްކާ ވާހަަކތަކެއް. އެހެންކަމުން އާމްދަނީ ހޯދަން ދޮގު ފަތުރާ ސައިޓުތަކާ މެދު ސަމާލުވާން ޖެހޭނެ
އާދަމް ނަސީރު
ވަޒީރު އިތުރަށް ވިދާޅުވީ، އެމަނިކުފާޏު ތަނެއްގައި ރަސްމީކޮށް އެއްޗެއް ވިދާޅުވެއްޖެ ނަމަ އެ ވާހަކައެއް ވުޒާރާގެ ރަސްމީ ވެބްސައިޓުގައި އޮންނާނެ ކަމަށެވެ.
