ރައްޔިތުންގެ މަޖިލީހުގެ އިންތިހާބުގައި ވާދަކުރައްވާ ކެންޑިޑޭޓުންގެ ކުށުގެ ރެކޯޑު ސާފުކޮށްދިނުމަށް ޕްރޮސެކިއުޓާ ޖެނެރަލް (ޕީޖީ) އޮފީހުން ތައްޔާރުވެފައިވާކަން ހާމަވެއްޖެއެވެ.

ޕީޖީ އޮފީހުން މައުލޫމާތުދީފައި ވާ ގޮތުގައި ކުށުގެ ރެކޯޑް ސާފް ކުރުމަށް ޕީޖީއަށް ހުށަހެޅުމާއެކު ކުށުގެ ރެކޯޑެއް ނެތް މީހަކުނަމަ، އެމީހަކު ރެކޯޑަށް އެދޭތާ ފަސް މިނިޓު ތެރޭގައި ރެކޯޑު ސާފުކޮށްދޭނެއެވެ.

ނަމަވެސް ރެކޯޑެއް އޮތްނަމަ، އެއް ދުވަހުގެ ތެރޭގައި އެ ކެންޑިޑޭޓެއްގެ ކުށުގެ ރެކޯޑު ސާފުކޮށްދޭނެ ކަމަށްވެސް ޕީޖީ އޮފީހުން ވަނީ މައުލޫމާތު ދީފައެވެ.

އިލެކްޝަން ކޮމިޝަން (އީސީ)ން ރޭ ވިދާޅުވީ، މަޖިލީސް އިންތިހާބަށް ކުރިމަތިލުމަށް އެދޭ ފަރާތްތަކުން އިންތިހާބަށް ކުރިމަތިލުމަށް އެދި ހުށަހަޅަންޖެހޭ ތަކެތީގެ ތެރޭގައި ހިމެނޭ ކުށާއި ދަރަނީގެ ރެކޯޑު ފޯމާއި، އިންތިހާބަށް ހާއްސަކޮށްގެން ހުޅުވާ ބޭންކް އެކައުންޓް ހުޅުވުމުގެ ފުރުސަތު، ކެންޑިޑޭޓުންނަށް ފަސޭހަކުރުމުގެ ގޮތުން، ދުރާލާ ދިނުމަށް ކޮމިޝަނުން ބޭނުންވާ ކަމަށެވެ.

ރައްޔިތުންގެ މަޖިލީސް އިންތިހާބަށް ކުރިމަތިލުމުގެ ފުރުސަތު ޖަނަވަރީ 31 ވާ ބުދަ ދުވަހުން ފެށިގެން ފެބުރުވަރީ 14 ގެ ނިޔަލަށް އޮންނާނެއެވެ.