މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ ތެރެއިން ހިންގަމުން އަންނަ ކަމަށް އެކްސްގައި ރިޕޯޓުކުރަމުން ގެންދާ ބައެއް ކަންކަމާ ގުޅިގެން ކުރީގެ ނައިބު ރައީސް ޑރ މުހައްމަދު ޖަމީލު އަހުމަދުގެ ސުވާލެއް އަމާޒުކުރައްވައިފިއެވެ.

މި ސަރުކާރުގެ އިސް ވަޒީރު އަދި މަޖިލިސް ރައީސް އަބްދުއްރަހީމު އަބްދުﷲ (އަދުރޭ)ގެ ދަރިކަނބަލުންގެ ފިރިމީހާގެ ބައްޕަ، އެމްޕީއެލްގެ ސީއީއޯގެ މަގާމުގައި ހުންނަވައިގެން ކޮރަޕްޝަންގެ ގިނަ ކަންތައްތަކެއް ހިންގަމުންދާ ކަމުގެ އަޑުތައް ގަދަވެ އަދި އެކަންކަމާ ގުޅުން ހުރި އެކި މައުލޫމާތު ހަސަން ކުރުސީގެ ނަމުގައި އެކްސްގައި ހިންގަމުން އަންނަ ހެންޑްލްއިން އާންމުކުރަމުންދާއިރު އޭގެ ތެރޭގައި ބޮޑެތި ތުހުމަތުތައް އެބަ ހުއްޓެވެ.

އެގޮތުން ދައުލަތުގެ ފައިސާއަށް ބޮޑެތި އަދަދުތަކުން ޚިޔާނާތްތެރިވަމުންދާ ކަމަށާ އެކަމުގެ ތެރޭގައި އެމްޕިއެލްގެ ގިނަ މުވައްޒަފުން ހިމެނޭ ކަމަށްވެއެވެ.

މިކަމަށް އިޝާރާތްކުރައްވާ ޑރ. ޖަމީލު އެކްސްގައި ކުރެއްވި ޕޯސްޓެއްގައި ވިދާޅުވީ، ރައީސް މުއިއްޒުގެ ވެރިކަމަށް ވީތީ ކޮރަޕްޝަނާ ވައްކަން ހުއްދަވީތޯއާ އިސްލާމީ ޝަރީޢަތަ އެއްގޮތަށް އަދަބު ދީ އަތް ކަނޑާނަމަ މަންޒަރު ކިހިނެތް ފެންނާނެބާއޭ އެމަނިކުފާނުގެ ހިތްޕުޅަށް އަރާވަޑައިގަންނަވާ ކަމަށެވެ.

މީގެ އިތުރުން އެންޓި ކޮރަޕްޝަން ކޮމިޝަން (އޭސީސީ) އަދި ޕްރޮސެކިއުޓަރ ޖެނެރަލް (ޕީޖީ)ވެސް މަގާމު ދިފާޢު ކުރުން ނޫންކަމެއްވެސް ކުރަންވީ ނޫންތޯ ވިދާޅުވެ ޑރ. ޖަމީލުވަނީ ތަންފީޒީ އިދާރާތަކަށް މެސެޖެއް ދެއްވާފައެވެ.