މިދިޔަ ހަފްތާގައި ޕަޕުއާ ނިއު ގިނީގައި ހިނގި ބިންގަނޑު ކަނޑައިގެން ދިޔުމުގެ ހާދިސާގައި 2،000 މީހުން ވަޅުލެވިފައިވާނެ ކަމުގެ ބިރު އޮތް ކަމަށް އެގައުމުގެ ނޭޝަނަލް ޑިޒާސްޓާ ސެންޓަރުން ބުނެފިއެވެ.

ޕަޕުއާ ނިއު ގިނީގެ އުތުރުގެ ފަރުބަދަމަތީ އެންގާ ސަރަހައްދުގައި ހުކުރު ދުވަހު ބިންގަނޑު ކަނޑައިގެން ގޮސްފައިވާއިރު އެންމެ ފަހުން ގެއްލިފައިވާ އަދަދަކީ ކުރިން ލަފާކުރި އަދަދަށް ވުރެ ބޮޑު އަދަދެކެވެ.

ނިދާފައި ވަނިކޮށް އެތައް ޓަނެއްގެ ހިލައާއި ވެލި ގެއަށް ވަދެ ގެންދިއުމުގެ ސަބަބުން އާންމުން ވަނީ ހާލުގައި ޖެހިފައެވެ. އޭޝިއާގެ އެންމެ ފަގީރު ގައުމުތަކުގެ ތެރޭގައި މިހާރުވެސް ހިމެނޭ އެ ގައުމުގެ މިހާ ދުރު ހިސާބަކަށް ދިއުމަށް ސަލާމަތްކުރާ ފަރާތްތަކުން މަސައްކަތް ކުރަމުން އަންނައިރު، އެމީހުންގެ އަތުގައި ހުރި ވަސީލަތްތައް ފިޔަވާ ކޮންނަން އިތުރު ވަސީލަތެއް ނެތެވެ.

އެވިޓް ކަމްބޫ ހިއްސާކުރި ގޮތުގައި އެ ކާރިސާގައި އާއިލާގެ އެތައް މެމްބަރުން ގެއްލިފައިވާ ކަމަށެވެ.

ރޮއިޓާސް ނިއުސް އެޖެންސީއަށް ދިން އިންޓަވިއުއެއްގައި އޭނާ ބުނީ  ކުނިތަކާއި ފަސްގަނޑުގެ ދަށުގައި އާއިލާގެ 18 މީހުން ވަޅުލާފައިވާ ކަމަށެވެ.