އިޒްރޭލުން ފަލަސްތީނުގެ ރައްޔިތުންނާ ދެކޮޅަށް ހިންގަމުންދާ ލާއިންސާނީ ގަތުލުއާންމަކީ "ދެ ގައުމެއްގެ ދޭތެރޭ ހިނގާ މައްސަލައެއް ކަމަށް" ވެރިކަންކުރާ ޕީއެންސީއިން ވަނީ ހާމަކޮށްފައެވެ. އެހާ ހިސާބުން ދެން އުފެދޭ ސުވާލަކީ ހަގީގަތުގައިވެސް ޕީއެންސީގެ ސަރުކާރުން އިސްލާމްދީނަށް ނަސްރު ދޭން ބޭނުންނުވަނީބާއެވެ؟

ފަލަސްތީނަށް އިޒްރޭލުން ދެމުން ގެންދާ ނިރުބަވެރި ހަމަލާތަކަކީ ހަމާސް ނައްތާލަން ދޭ ހަމަލާތަކެއް ކަމަށް އެ ނިރުބަވެރި ޒަޔަނިސްޓުން ބުނި ނަމަވެސް އެމީހުން ހަމަލާތައް އާންމުންނަށް އަމާޒުކުރަމުން ދެއެވެ. އަދި އާންމުން ދިރިއުޅޭ ތަންތަނަށް ހަމަލާ ދިނުމަށް ބޭނުންކުރާ ބަހަނާއަކީ އެތަންތަނުގައި ހަމާސްގެ ވެރިން ފިލާ ތިބޭ ކަމަށެވެ.

މިހާރުވެސް ރަފާހަށް އެތައް ހަމަލާއެއްދީ މުޅި ރަފާހު ދަނީ އަނދަމުންނެވެ. އެތައް ބަޔަކު ޝަހީދުވެ ޒަޚަމްވަމުންދާއިރުވެސް އިޒްރޭލުގެ ހަމަލާތަކަށް ހުއްޓުމެއް ނާދެއެވެ.

އިސްރާއީލުން ރަފަހް ސިޓީއަށް ހަމަލާދިނުން ވަގުތުން ހުއްޓައިލުމަށް އިންޓަނޭޝަނަލް ކޯޓު އޮފް ޖަސްޓިސް (އައިސީޖޭ)އިން މިދިޔަ ހުކުރު ދުވަހު އަމުރުކުރި ނަމަވެސް، އެ އަމުރަށް ބެލުމެއްނެތި، އިސްރާއީލުން ވަނީ ރަފަހަށް ދޭ ހަމަލާތައް އިތުރަށް ވަރުގަދަކޮށްފައެވެ.

ރަފާހުގެ ހުޅަނގުގައި ގެދޮރުގެއްލިފައިވާ މީހުން ބޯހިޔާވަހިކަން ހޯދަމުން ދިޔަ ޓަލް އައްސުލްތާނުގައި ހުންނަ ބްރިކްސް ކޭމްޕަށް އަށެއް ނުވަތަ 10 ވަރަކަށް ގޮވާ ޒާތުގެ ތަކެތި ބޭނުން ކޮށްގެންހަމަލާ ދިނުމާ އެކު އެ ތަނުގައި އަލިފާން ރޯވެ، އަލިފާންގަނޑު ފެތުރުނެވެ. އަދި، އެ ތަނުގައި ނިދާފައި ތިބި އެތައް ބައެއްގެ ގައިގައި ރޯވިއިރު، އެ މީހުން ވަނީ މި ދުނިޔެ ދޫކޮށްފައެވެ.

މިހާ ހިސާބަށް ކަންކަން ގޮސްފައިވާއިރު، މަޖިލިސް ހުވާ ކުރުމަށްފަހު 75 މެމްބަރުން ހިމެނޭ ޕީއެންސީގެ ބިޔަ ޕީޖީ ގްރޫޕުން ބޭއްވި ނޫސްވެރިންގެ ބައްދަލުވުމުގައި، ރާއްޖެއަށް އިޒްރޭލުގެ ފަތުރުވެރިން އައުން މަނާކުރުމާ މެދު އާ މަޖިލީހުން ގެންގުޅޭނެ ސިޔާސަތާމެދު ނޫސްވެރިން ވަނީ ސުވާލުކޮށްފައެވެ.

ސުވާލަށް ޖަވާބު ދެމުން އިނގުރައިދޫ ދާއިރާގެ މެމްބަރު އަދި ޕީއެންސީގެ ޕީޖީ ލިޑަރު އިބްރާހިމު ފަލާހު ވިދާޅުވީ، ވަރަށް ބޮޑު ފޮރިން ދެ ގައުމެއްގެ ދޭތެރޭ ހިނގާ، މައްސަލަތަކެއް، އެ ކަންކަމުގެ ސަރުކާރުން އެންމެ ވިސްނާފަ ފޮނުވާ ގޮތަކަށް، އެންމެ ރައްޔިތުންނަށް ގައުމަށް ފައިދާ ހުރި ގޮތަކަށް އިރާދަކުރެއްވިއްޔާ ނިންމަން ޖެހޭ ކަންކަން ނިންމާނެ ކަމަށެވެ.

ފަލާހުގެ މި ޖަވާބާ އެކު ނުރުހުމާ ފާޑުކިޔުން މީސް މީޑިޔާގައި ވަނީ އަމާޒުވާން ފަށާފައެވެ. އެގޮތުން ސިޔާސީ މަސްރަހުގައި މަސައްކަތްކުރައްވާ ފަރާތްތަކާ ޝަރުއީ ދާއިރާގައި މަސައްކަތްކުރާ ފަރާތްތަކުގެ އިތުރުން އާންމު ފަރުދުންވެސް ވަނީ މިކަމާ ގުޅިގެން ޕީއެންސީއަށް ފާޑުކިޔާފައެވެ.

އެގޮތުން އެސްޓީއޯގެ ކުރީގެ އެމްޑީ ހުސެއިން އަމްރު ރަޝާދު އޭނާގެ އެކްސް އެކައުންޓުގައި ޕޯސްޓުކޮށް ވިދާޅުވެފައިވަނީ، އިޒްރޭލުން ފަލަސްތީނުގަ ބޮޑު ގަތުލު އާންމެއް ހިންގަމުން ދާއިރު އެއީ ދެ ޤައުމެއް ދޭތެރޭ ހިނގާ މައްސަލައެއް ނޫންކަމަށާ އެއީ މުޅި އިންސާނިއްޔަތާ ދެކޮޅަށް ހިންގާ ޖަރީމާއެއް ކަމަށެވެ.

ކުރީގެ ރައީސް މައުމޫނު އަބްދުލްގައްޔޫމުގެ ދޮށީ ދަރިކަލުން އަދި އަދުގެ ދިފާއީ ވަޒީރުގެ ބޭބޭފުޅު ފާރިސް މައުމޫނުވެސް ވަނީ މިކަމާ ގުޅިގެން ފާޑުވިދާޅުވެފައެވެ.

ފާރިސް ވިދާޅުވެފައިވާ ގޮތުގައި، ފަލަސްތީނަށް އިޒްރާއީލުން ދެމުންދާ ހަމަލާއަކީ ދެ ގައުމެއް ދޭތެރޭގައި ހިންގާ ކަމެއް ނުން ކަމަށާ އެއީ އިސްތިއުމާރީ ބާރަކުން މައުސޫމު ނިކަމެތި ބަޔަކު އެމީހުން ނިސްބަތްވާ އަމިއްލަ ގައުމުން ނެތިކޮށްލުމަށް ހިންގާ ގަތުލު އާންމެއް ކަމަށެވެ. އަދި އެއީ ދެ ގައުމެއްގެ ދެމެދުގައި ހިނގާ ހަނގުރާމައެއްގެ ގޮތުގައި ސިފަކުރަނީ ހަމައެކަނި ޒަޔަނިސްޓުން ކަމަށްވެސް ފާރިސް ވިދާޅުވެފައިވެއެވެ.

މީގެ އިތުރުން ޝަރުއީ ދާއިރާގައި މަސައްކަތްކުރާ ފަރާތެއް ކަމަށްވާ އަމީން ފައިސަލް ވިދާޅުވީ، މިއީ ފަލަސްތީނު މައްސަލައިގައި ދެ ގައުމެއް އެކުނުލެވޭ ކަމަށާ އެންމެ ފުރަތަމަ ހަނދާން ކުރަންވާ ކަމަކީ އިޒްރޭލަކީ ގައުމެއް ނޫން ކަން ކަމަށެވެ.

އަމީން އެހެން ވިދާޅުވެފައި އެވަނީ ބެލެވޭ ގޮތުގައި އިޒްރޭލުން ފަލަސްތީނުގެ ބިން ފޭރިގަނެގެން ވަޒަންވެރިގަނެގެން އުޅޭ އުޅުމަށެވެ.

މީގެ އިތުރުން އާންމު ރައްޔިތުންވެސް ވަނީ މިކަމާ ވަރަށް ބޮޑަށް ނުރުހުން ފާޅުކޮށް އެކަން ކުށްވެރިވެސް ކޮށްފައެވެ.

އެގޮތުން އަމިއްލަ ބައެއް ފަރާތްތަކުން ކޮށްފައިވާ ރިޕްލައިތަކުގައި ބުނެފައިވާ ގޮތުގައި، އެއީ ދެ ގައުމެއްގެ ދެމެދުގައި ހިންގާ ހަނގުރާމައެއް ކަމަސް ބުނާ ބުނުން ހަރުކަށި އިބާރާތުން ކޫށްވެރިކުރާ ކަމަށެވެ. އަދި ސަރުކާރު ހިންގާ ޕާޓީގެ ޕީޖީ ލީޑަރު މި ވިދާޅުވި ވިދާޅުވުމަކީ ސަރުކާރުގެ ސްޓެންޑްތޯ ރައްޔިތުންނަށް ސާފުކޮށްދޭން ސަރުކާރުން ޖެހޭ ކަމަށްވެސް އެމީހާ ވަނީ ބުނެފައެވެ.

މީގެ އިތުރުން ވެސް އެތައް އާންމުންނާ މި ކަމާ ގުޅިގެން ނުރުހުން ފާޅުކޮށްފައިވެއެވެ. އެގޮތުން މީހަކު ބުނެފައިވަނީ ތަންދޮރު އޮޅުން ނުފިލާ މީހަކު ޕީޖީ ކަމަށް އައްޔަން ކުރުމުން ވާނެ ހައެތި ވަނީ ކަމަށާ މަޖިލީހުގައި ކަންކަން ހިނގާނެ ގޮތުގެ މިސާލު މިހާރު ވެސް ފެންނަން ފަށައިފި ކަމަށެވެ.

ފަލަސްތީނުގައި ޔަހޫދީން ހިންގަމުން ގެންދާ ގަތުލުއާންމަކީ “ދެގައުމެއްގެ” ދާހިލީ ކަމެއްކަމަށް ބުނެފައިވާ ބުނުމާ ގުޅިގެން އިތުރު މީހަކު ބުނެފައިވަނީ އެއީ ފަލަސްތީނުގެ ރައްޔިތުންގެ މޫނުމަތީ ޖެހި ތަފާއްޔެއް ކަމަށެވެ.

ސަރުކާރު ހިންގާ ޕާޓީއިން މި ޖެހި ސަކާރތުގައި ސަރުކާރަށް ތާއީދު ކުރާ ބައެއް ފަރާތްތަކުގެ ނުރުހުްނ ވެސް އަމާޒުވެފައިވެއެވެ.

އެގޮތުން ސަރުކާރުގެ ޑައި ޙާޓު ފޭނަކު ފޭސްބުކްގައި ކޮށްފައިވާ ޕޯސްޓެއްގައި ބުނެފައިވަނީ، ފަލަސްތީނު މައްސަލައަކީ ދެ ގައުމެއްގެ ދެމެދުގައި އޮތްކަމެއް ނޫން ކަމަށާ އެއީ އީމާންތެރިކަމާ ކުފުރާ ދެމެދު އޮތް ކަމެއް ކަމަށެވެ.

މިކަންކަން މިހެން ހިނގާފައިވާއިރު، ފަަލަސްތީނުން އިޒްރޭލުގައި ހިންގަމުންދާ ގަތުލު އާންމާ ގުޅިގެން އިޒްރޭލު ޕާސްޕޯޓު މަނާ ކުރުމަށް ރައީސަށް ފޮނުވި ގަރާރުވެސް އަދިވެސް އޮތީ މޭޒުކޮޅު މަތީގައި ކަން ފާހަގަކޮށްލެވެއެވެ. އަދި ރައީސް މުހައްމަދު މުއިއްޒުގެ ސަރުކާރުން ވަނީ އިޒްރޭލުން ހިންގާ ލާއިންސާނީ އަމަލަށް ގަތުލުއާންމު ނުވަތަ އެއީ ޖެނަސައިޑެއް ކަމަށް ބުނުން ވަނީ ހުއްޓާލާފައެވެ.

މިކަމުންވެސް ދޭހަވެގެން ދަނީ ސަރުކާރު މިކަމުގައި ވަރަށް ބޮޑަށް ފިތިފައިވާކަންކަމަސް ގިނަ ބަޔަކު ބުނަމުން ދެއެވެ.

ބުނެވޭ ގޮތުގައި ދިވެހި ސަރުކާރަށް ޕްރޝަރ ކުރަމުން ދަނީ އެމެރިކާއިންނެވެ. ނަމަވެސް މުސްލިމުންނަކީ އަބަދުވެސް އެއް ބަޔަކު އަނެއް ބަޔަކަށް ވާގިވެރިވާން ޖެހޭ ބަޔަަކަށްވާއިރު މިއީ ބަަލއިގަނެވޭނެ ކަމެއް ނޫން ކަމަށް ގިނަ ބަޔަކު ގެންދަނީ ބުނަމުންނެވެ.

އެންމެ ފުރަތަމަ ދީން އިސްކުރަން އައި ސަރުކާރަކުން މި ފަދަ ކަންކަން ފެނިގެން ދިއުމަކީ ދެރަ ވަރުގެ ދެރަ ކަންކަމުގެ ގޮތުގައި ގިނަ ބަޔަކު ސިފަކުރެއެވެ.