ދުނިޔޭގެ އެކި ކަންކޮޅުތަކުގެ ގާނޫނު ތަންފީޒުކުރާ އިދާރާތަކުން ވަނީ 5.9 ބިލިއަން ޑޮލަރު ވަގަށް ނަގާފައިވާ އަދި އެހެން ކުށްތަކާ ގުޅުން ހުރި ގްލޯބަލް މެލްވޭއާ ނެޓްވޯކެއް ބަންދުކޮށްފައި ކަމަށް އެމެރިކާގެ ޑިޕާޓްމަންޓް އޮފް ޖަސްޓިސް (ޑީއޯޖޭ) އިން ބުނެފިއެވެ.

"މިހާތަނަށް ދުނިޔޭގައި އުފެދުނު އެންމެ ބޮޑު ބޮޓްނެޓް ކަމަށް ބެލެވޭ" މި ބޮޓްނެޓް ޑައުން ކުރުމަށް ޑީއޯޖޭ އިން ވަނީ އެފްބީއައި އާއި ބައިނަލްއަގްވާމީ އެހެން އިދާރާތަކާ ގުޅިގެން މަސައްކަތް ކޮށްފައެވެ.

ސެއިންޓް ކިޓްސް އެންޑް ނެވިސްގެ ރައްޔިތެއް ކަމަށްވާ، އަދި ޗައިނާގެ ރައްޔިތެއް ކަމަށްވާ ޔުންހޭ ވަންގްގެ މައްޗަށް ވަނީ އެ ނެޓްވޯކް އުފެއްދުމާއި ހިންގުމުގެ ދައުވާ އުފުލާފައެވެ.

ބޮޓްނެޓަކީ މެލްވޭއާ ޖެހި، ނުރައްކާތެރި ފަރާތަކުން ކޮންޓްރޯލް ކުރަމުންދާ ކޮމްޕިއުޓަރުތަކުގެ ނެޓްވޯކެކެވެ.

ވަންގްގެ މައްޗަށް އުފުލާފައިވަނީ ކޮމްޕިއުޓަރ ފްރޯޑް ހިންގަން ރޭވުމާއި، މަކަރާއި ހީލަތާއި، ވަޔަރ ފްރޯޑް ކުރަން ރޭވުމާއި، މަނީ ލޯންޑަރިންގ އަށް ރޭވުމުގެ ދައުވާއެވެ.

ހުރިހާ ދައުވާއެއް ސާބިތުވެއްޖެނަމަ އެންމެ ބޮޑު އަދަބަކީ 65 އަހަރުގެ ޖަލު ހުކުމެކެވެ.

ދައުވާގައިވާ ގޮތުން 2014 އިން 2022 އާ ދެމެދު ވަންގް އާއި އެހެން ބަޔަކު ވަނީ ދުނިޔޭގެ ގާތްގަނޑަކަށް 150 ސާވަރ އިން 911 އެސް5 ގެ ނަމުގައި ބޮޓްނެޓް އުފައްދައި އޮޕަރޭޓްކޮށްފައެވެ.

އެ ބޮޓްނެޓުން ގާތްގަނޑަކަށް 200 ގައުމެއްގެ 19 މިލިއަނަށް ވުރެ ގިނަ އިންޓަނެޓް ޕްރޮޓޮކޯލް (އައިޕީ) އެޑްރެސް ހެކްކޮށްފައިވާ ކަމަށް ޑީއޯޖޭ އިން ބުނެއެވެ.

އައިޕީ އެޑްރެހަކީ އިންޓަނެޓް ނުވަތަ ނެޓްވޯކްގައި ހުންނަ ޑިވައިސްއެއް ދެނެގަންނަ ޔުނިކް ކޯޑެކެވެ.

މި ބޮޓްނެޓް ބޭނުންކުރީ ސައިބަރ ހަމަލާތަކާއިބޮޑެތި މަކަރާއި ހީލަތްތަކާއި ކުޑަކުދިން ނަހަމަ ގޮތުގައި ބޭނުންކުރުމާއި ބޮމުގެ އިންޒާރު ދިނުމަށް ކަމަށް ޑީއޯޖޭއިން ބުނެއެވެ.

އެމެރިކާއިން ލަފާކުރާ ގޮތުގައި ބައި މިލިއަނަށް ވުރެ ގިނަ، އޮޅުވާލައިގެން ވަޒީފާ ނެތް މީހުންގެ އިންޝުއަރެންސް ކްލޭމްތައް ކޮށްފައި ވަނީ ކޮމްޕްރޮމައިޒް ވެފައިވާ އައިޕީ އެޑްރެސްތަކުން ކަމަށާއި އޭގެ ސަބަބުން 5.9 ބިލިއަން ޑޮލަރަށް ވުރެ ގިނަ ޑޮލަރުގެ ގެއްލުމެއް ލިބިފައިވާ ކަމަށެވެ.

އަދި ސައިބަރ ކްރިމިނަލްސް އަށް ވަގަށް ނަގާފައިވާ ކްރެޑިޓް ކާޑުން މުދާ ގަތުމަށް ނުވަތަ ފައިސާ ދޮވުމުގެ ފުރުސަތު ވެސް އެ ނެޓްވޯކުގެ ސަބަބުން ލިބުނު ކަމަށް ޑީއޯޖޭ އިން ބުނެއެވެ.

ވަންގްއަށް ވަނީ އައިޕީ އެޑްރެސްތަކަށް އެކްސެސް ވިއްކައިގެން ގާތްގަނޑަކަށް 99 މިލިއަން ޑޮލަރު ލިބިފައިވާ ކަމަށް ޑީއޯޖޭ އިން ބުނެއެވެ.

އެމެރިކާ، ސެއިންޓް ކިޓްސް އެންޑް ނެވިސް، ޗައިނާ، ސިންގަޕޫރު، ތައިލެންޑް އަދި ޔުނައިޓެޑް އަރަބް އެމިރޭޓްސް އިން ޕްރޮޕަޓީ ގަނެފައިވާ ކަމަށް ތުހުމަތު ކުރެވެއެވެ.

ޖުމްލަ 60 މިލިއަން ޑޮލަރުގެ އެސެޓްތައް އަތުލައިގަނެ ނުވަތަ އަތުލުމަށް ދެނެގަނެފައިވާ ކަމަށާއި އޭގެ ތެރޭގައި ފެރާރީއަކާއި ރޯލްސްރޮއިސްއަކާއި ގަޑިތަކެއް ހިމެނޭ ކަމަށް ޑީއޯޖޭ އިން ބުނެއެވެ.

މި ތަހުގީގަށް އެހީތެރިވި އިދާރާތަކުގެ ތެރޭގައި ސިންގަޕޫރާއި ތައިލެންޑްގެ ގާނޫނު ތަންފީޒުކުރާ އިދާރާތަކުގެ އިތުރުން ޓެކްނޮލޮޖީގެ ޖަޔަންޓް މައިކްރޮސޮފްޓް ވެސް ހިމެނެއެވެ.