އެމެރިކާގެ ރައީސް ޖޯ ބައިޑަން ހުކުރު ދުވަހު ހާމަކުރެއްވި ޣައްޒާގެ ހަނގުރާމަ ހުއްޓާލުމުގެ ހުށަހެޅުމަކަށް ބޮޑުވަޒީރު ބެންޖަމިން ނަތަންޔާހޫ އެއްބަސްވެވަޑައިގެންފިނަމަ އިސްރާއީލުގެ ކަނާތުފިޔައިގެ ދެ ވަޒީރަކު ސަރުކާރު ކޯލިޝަންނުން ވަކިވެ ރޫޅާލާނެ ކަމުގެ އިންޒާރު ދީފިއެވެ.

ފިނޭންސް މިނިސްޓަރު ބެޒާލެލް ސްމޮޓްރިޗް އާއި ހައްދުފަހަނައަޅާފައިވާ ނޭޝަނަލް ސެކިއުރިޓީ މިނިސްޓަރު އިޓަމާ ބެން ގްވީރު ބުނީ ހަމާސް ނައްތާލުމުގެ ކުރިން އެއްވެސް އެއްބަސްވުމެއް ހަދަން ދެކޮޅު ހަދާ ކަމަށެވެ.

އިދިކޮޅު ލީޑަރު ޔާއިރް ލަޕިޑް ވަނީ ނަތަންޔާހޫ އެ ޕްލޭނަށް ތާއީދު ކުރައްވާނަމަ ސަރުކާރަށް ތާއީދު ކުރައްވާނެ ކަމަށް ވައުދުވެފައެވެ.

ހަމާސްގެ އަސްކަރީ އަދި ވެރިކަން ކުރުމުގެ ގާބިލްކަން ނައްތާލައި، ރަހީނުކޮށްފައިވާ ހުރިހާ މީހުން ދޫކޮށްނުލާހާ ހިނދަކު ދާއިމީ ހަނގުރާމަ ހުއްޓާނުލާނެ ކަމަށް ޚުދު ބޮޑުވަޒީރު ވެސް ބުނަމުން ދިޔައެވެ.

އެކަމަކު ނަތަންޔާހޫގެ މުޝީރުންގެ ތެރެއިން އެކަކު ފަހުން އެ ޕްލޭނަކީ "އަހަރެމެން އެއްބަސްވި" ކަމެއްގެ ގޮތުގައި ސިފަކޮށް، އިސްރާއީލުން އެއީ "ރަނގަޅު އެއްބަސްވުމެއް" ކަމަށް ނުދެކި ނަމަވެސް އެކަމާ ދެކޮޅު ނުހަދާ ކަމަށް ފާހަގަކުރިއެވެ.

ބައިޑަންގެ ތިން ބައިގެ ހުށަހެޅުން ފަށާނީ ހަ ހަފްތާގެ ހަނގުރާމަ ހުއްޓާލުމަކުން ކަމަށާއި އެ ހަނގުރާމައިގައި އިސްރާއީލުގެ ދިފާއީ ބާރުތައް (އައިޑީއެފް) ޣައްޒާގެ އާބާދީ ބޮޑު ސަރަހައްދުތަކުން ފައިބާނެ ކަމަށް ވެއެވެ. މި އެއްބަސްވުމުގެ ސަބަބުން އެންމެ ފަހުން ރަހީނުކޮށްފައިވާ ހުރިހާ މީހުން ދޫކޮށްލުމާއި، ދާއިމީ ގޮތެއްގައި "ހަމަލާތައް ހުއްޓާލުމާއި" ޣައްޒާ އަލުން ބިނާކުރުމުގެ ބޮޑު ޕްލޭނެއް އެކުލަވާލެވޭނެއެވެ.

އެކަމަކު ހޮނިހިރު ދުވަހު ސޯޝަލް މީޑިއާގައި ކުރި ޕޯސްޓެއްގައި ސްމޮޓްރިޗް ބުނެފައިވަނީ ނަތަންޔާހޫއަށް "ހުށަހަޅާފައިވާ އުސޫލަށް އެއްބަސްވެ ހަމާސް ނައްތާލައި ހުރިހާ ރަހީނުން އަނބުރާ ގެނައުމެއް ނެތި ހަނގުރާމަ ނިންމާލާ ސަރުކާރެއްގައި ބައިވެރި ނުވާނެ" ކަމަށެވެ.

އޭނާގެ ބަސްތައް ތަކުރާރު ކުރަމުން ފާޅުގައި މުސްލިމުންނާއި ޢަދާވާތްތެރި ބެން ގްވީރު ބުނެފައިވަނީ "މި ޑީލް.. މާނައަކީ ހަނގުރާމަ ނިމުމަކަށް އައުމާއި ހަމާސް ނައްތާލުމުގެ އަމާޒު ދޫކޮށްލުން. މިއީ ފަރުވާކުޑަ އެއްބަސްވުމެއް ކަމަށާއި، މިއީ ޓެރަރިޒަމްގެ ކާމިޔާބީއެއް ކަމަށާއި ދައުލަތަށް ސަލާމަތީ ނުރައްކަލެއް" ކަމަށެވެ.

އޭނާ ވަނީ އެ ހުށަހެޅުމަށް އެއްބަސްވުމަށް ވުރެ "ސަރުކާރު އުވާލުމަށް" ވައުދުވެފައެވެ.

ނަތަންޔާހޫގެ ކަނާތު ފިޔައިގެ ކޯލިޝަނަށް ޕާލަމެންޓުގެ ކުޑަ އަޣުލަބިއްޔަތެއް ލިބިފައިވާއިރު، ވެރިކަން ދެމެހެއްޓުމަށް ޓަކައި ބެން-ގްވީރުގެ އޮޓްޒްމާ ޔެހުދިތު (ޔަހޫދީ ޕަވާ) ޕާޓީ އާއި ހަތް ގޮނޑި އޮންނަ ސްމޮޓްރިޗްގެ ރިލިޖަސް ޒަޔަނިޒަމް ޕާޓީ ސަރުކާރުގައި ހިމެނެއެވެ.

އެކަމަކު އިސްރާއީލުގެ އެންމެ ނުފޫޒުގަދަ އެއް އިދިކޮޅު ސިޔާސީ ބޭފުޅާ ޔާއިރް ލަޕިޑް އަވަސްވެގަތީ ނަތަންޔާހޫއަށް ތާއީދު ކުރުމަށެވެ. އޭނާގެ ޔެޝް އާތިދު ޕާޓީއަށް 24 ގޮނޑި ލިބިފައިވެއެވެ.

އޭނާ ބުނެފައިވަނީ ބޮޑުވަޒީރުގެ އަތުގައި "ބެން ގްވީރް އާއި ސްމޮޓްރިޗް ސަރުކާރު ދޫކޮށްލައިފިނަމަ ރަހީނުން މިނިވަން ކުރުމަށްޓަކައި އެއްބަސްވުމަކަށް އައުމަށް ސަލާމަތީ ދާގަނޑު އެބައޮތް" ކަމަށެވެ.

ނަތަންޔާހޫގެ ސަރުކާރުގެ ބައިވެރިންގެ ނުފޫޒު ފޯރުވުމުގެ ކުރިން ޚާރިޖީ ސިޔާސަތުގެ އިސް އެޑްވައިޒަރަކު ބުނީ އެ ޕްލޭންގެ ގިނަ ތަފްސީލުތަކެއް އެކުލަވާލަން ޖެހޭ ކަމަށާއި "އަޅުގަނޑުމެންގެ ހުރިހާ މަގްސަދުތަކެއް ހާސިލްވަންދެން" ދާއިމީ ގޮތެއްގައި ހަނގުރާމަ ހުއްޓާނުލާނެ ކަމަށެވެ.

ސަންޑޭ ޓައިމްސް ނޫހަށް ދިން އިންޓަވިއުއެއްގައި އޮފިރް ފޯކް ބުނެފައިވަނީ ބައިޑަންގެ ޕްލޭނަކީ "އަހަރެމެން އެއްބަސްވި ޑީލެއް - އެއީ ރަނގަޅު ޑީލެއް ނޫން ނަމަވެސް އަހަރެމެން ވަރަށް ބޭނުން ރަހީނުކުރި މީހުން ދޫކޮށްލަން، އެ ހުރިހާ އެންމެން ވެސް".

މި ޕްލޭނަށް އެއްބަސް ވުމަށް އިސްރާއީލުގެ އެތައް ހާސް ބަޔަކު ވަނީ މުޒާހަރާކޮށްފައެވެ.