ސަރުކާރުގެ ހުރިހާ ސްކޫލެއްގެ ކްލާސްރޫމްތަކުގައި އޭސީ ހަރުކުރުމުގެ މަޝްރޫއު "ކޫލް ސްކޫލް" އިފްތިތާޙް ކުރައްވާ ވާހަކަ ދައްކަވަމުން މި މަޝްރޫއުގެ ދަށުން ދަރިވަރުންގެ އުޅުމަށް ބަދަލު އައިސް، ގޯސް އާދަތަކުން ކުދިން ދުރުވެގެންދާނެ ކަމަށް އެޑިއުކޭޝަން މިނިސްޓަރު ވިދާޅުވުމާއެކު ގިނަ ބަޔެއްގެ ފާޑ ކިޔުން އަމާޒުވެއްޖެއެވެ.

މިގޮތުން ކުރީގެ ނައިބު ރައީސް ޑރ މުހައްމަދު ޖަމީލް ކޮށްފައިވާ ޓްވީޓްއެއްގައި މިނިސްޓަރު ދައްކަވާފައިވާ ވާހަކައަކީ ކިހާ ވަރެއްގެ އިލްމީ ހަގީގަތެއްގެ މައްޗަށް ބިނާކޮށް ދައްކާފައިވާ ވާހަކައެއްތޯ ވަނީ ސުވާލު އުފައްދަވާފައެވެ. މިވީހާ ތަނަކަށް، ފިނިވެގެން ނުވަތަ ފިނި މޫސުންތަކުގައި ދަރިވަރުންގެ އުޅުން އިސްލާޙްވެ، އެކުދިންގެ ނުރަނގަޅު އާދަތައް ރަނގަޅުވެގެންދާނެކަމުގެ އެއްވެސް އިލްމީ ލިޔެކިޔުމެއް ނުވަތަ ދިރާސާއެއް ހަދާފައިވާކަމަށް ފާހަގަކުރެވިފައިނުވެއެވެ.

ޖަމީލް އިތުރަށް ވިދާޅުފައިވަނީ ދުނިޔޭގެ ފިނި މޫސުން އޮންނަ ގައުމުތަކުގައި ބުލީފަދަ ކަންކަން ސްކޫލްތަކުގައި ނޯންނާނެ ކަމަށް ރާއްޖޭގެ އެޑިއުކޭޝަން މިނިސްޓަރު ކަމާއި ހަވާލުވެގެން ހުންނެވި ބޭފުޅާގެ އިލްމީ މައުލޫމާތު ހީނަރުކަމުގެ ހެއްކެއްކަމަށެވެ. އަދި ކިތަންމެ މަތީ ސަނަދެއް އޮތަސް މިފަދަ ދެއުޅިއެއް ނުވާ ވާހަކަ ދެއްކުމަކީ އަމިއްލަފުޅަށް އަމިއްލަ ނާގާބިލު ކަމާއި އެއްވެސް ތަޖުރިބާއެއް ނެތްކަން ހާމަވާ ކަމެއް ކަމުގައެވެ.

ހުރިހާ ސްކޫލެއް އޭސީ ކުރުމުގެ މަޝްރޫއަކީ ކްލާސްރޫމްތައް ހޫނުވެ ބެލެނިވެރިން އަމިއްލައަށް ފަންކާ ހަރުކުރުމަށް ބޮޑެތި ޚަރަދުތަކެއް ކުރަން ޖެހި، ގިނަ ބެލެނިވެރިންގެ ޝަކުވާ އާއި ޕްރެޝަރު ބޮޑުވެގެން ނިންމެވި ނިންމެވުމެކެވެ. މިއީ ހުރިހާ ކަމަށްވެސް ޕްރެޝަރ ކޮށްގެން އެކްޓިވްވާ ސަރުކާރެކެވެ. މީގެ އިތުރުން، މިނިސްޓަރު ޝަފީޢު މިހެން ވިދާޅުވުމާއި އެކު، ސޯޝަލް މީޑިއާގައި މިނިސްޓަރަށް އަމާޒުކޮށް އާންމުންގެ ގިނަ ފަރާތްތަކުން އަންނަނީ ނުރުހުން ފާޅުކުރަމުންނެވެ.