އީލޮން މަސްކްގެ ސޯޝަލް މީޑިއާ ޕްލެޓްފޯމް އެކްސް (ޓްވިޓަރ) އިން ސިޑްނީގެ ޗާޗެއްގައި ވަޅިން ހަމަލާދީ މަރާލި ފޫޓޭޖްތައް ނައްތާލުމަށް އެ ކުންފުންޏާ ދެކޮޅަށް އޮސްޓްރޭލިއާ އިން ކުރިއަށް ގެންދިޔަ ގާނޫނީ 'ހަނގުރާމަ' ދޫކޮށްލައިފިއެވެ.

ފުލުހުން ޓެރަރިސްޓް ހާދިސާއެއް ކަމަށް އިއުލާންކުރި، އޭޕްރީލް މަހު ފާދިރީ މާ މާރީ އެމަނުއެލްއަށް ދިން ހަމަލާ އޮންލައިންކޮށް ލައިވްސްޓްރީމްކޮށްފައިވެއެވެ. މި ހަމަލާއާ ގުޅިގެން ވޭކްލީގެ ކްރައިސްޓް ދަ ގުޑް ޝެފަރޑް ޗާޗުގެ ބޭރުގައި ހަމަނުޖެހުންތައް ހިންގިއެވެ.

މިނިވަން ރެގިއުލޭޓަރެއް ކަމަށްވާ އޮސްޓްރޭލިއާގެ އީސޭފްޓީ ކޮމިޝަނަރު ވަނީ ވަޅިން ހަމަލާދިން ވީޑިއޯތައް ޑިލީޓް ނުކޮށްފިނަމަ ބޮޑު ޖޫރިމަނާއެއް ކުރާނެ ކަމަށް ބުނެ އެކްސް އާއި އެހެން ސޯޝަލް މީޑިއާ ކުންފުނިތަކަށް އިންޒާރު ދީފައެވެ.

މި މައްސަލައަކީ އޮސްޓްރޭލިއާގެ އޮންލައިން ސޭފްޓީ ގަވާއިދުތައް ސޯޝަލް މީޑިއާ ބޮޑުންނަށް ތަންފީޒު ކުރުމުގެ ގާބިލްކަން ހުރި މިންވަރު ބެލުމުގެ އިމްތިހާނެއްގެ ގޮތުގައި ދެކެވުނެވެ.

ފެޑެރަލް ކޯޓުން ވަގުތީ ގޮތުން އެކްސް އަށް އެ ވީޑިއޯތައް ފޮރުވުމަށް އަމުރުކޮށްފައި އޮތް ނަމަވެސް އެ އަމުރަކީ ސައްހަ އަމުރެއް ނޫން ކަމަށް ބުނެ އެއަށް އަމަލު ކުރަން ދެކޮޅު ހެދިއެވެ.

ކުރިން ޓްވިޓާގެ ނަމުން ނަންދެވިފައިވާ އެކްސް އިން އެންމެ ފަހުން އޮސްޓްރޭލިއާގައި ވީޑިއޯ ބްލޮކް ކުރިއެވެ.

އެކަމަކު ކޮމިޝަނަރު ޖޫލީ އިންމަން-ގްރާންޓް ވަނީ އެ ވީޑިއޯ ދުނިޔޭގެ ހުރިހާ ހިސާބަކަށް ނުބެލޭނެގޮތް ހެދުމަށް އެދިފައެވެ. ނަމަވެސް އީލޮން މަސްކު ވަނީ އެކަމަށް ދެކޮޅުހަދާ، އޭނާއަށް ފާޑު ކިޔާފައެވެ.

އޮސްޓްރޭލިއާގެ ބޮޑުވަޒީރު އެންތޮނީ އަލްބަނީޒް ރައްދު ދެއްވީ މަސްކް އަކީ "ކިބުރުވެރި ބިލިއަނަރެއް" ކަމަށް ވިދާޅުވެއެވެ.

އިންމަން-ގްރާންޓް މިއަދު ނެރުއްވި ބަޔާނެއްގައި ވިދާޅުވެފައިވަނީ ގިނަ ވިސްނުންތަކަކަށްފަހު މި މައްސަލަ ދޫކޮށްލުމަކީ އޮސްޓްރޭލިއާގެ ހުރިހާ ރައްޔިތުންގެ، ހާއްސަކޮށް ކުޑަކުދިންގެ އޮންލައިން ސަލާމަތަށް އެންމެ ރަނގަޅު ނަތީޖާއެއް ލިބުމުގެ ފުރުސަތު އޮތް ކަމެއް ކަމަށެވެ.