ރައީސް ޑރ މުހައްމަދު މުއިއްޒުގެ ސަރުކާރަށް 6 މަސްވެގެންދިޔައިރު ބޮޑަށް ދުއްވާލާފައިވަނީ ގައުމު ތަރައްގީ ކުރުމުގެ ބަދަލުގައި ބައްދަލުވުންތަކަށް ކަމަށް ޕީއެންއެފްގެ ސެކެޓްރީ ޖެނެރަލް މުހައްމަދު މަލީހް ޖަމާލް ވިދާޅުވެއްޖެއެވެ.

މަލީހް މިފަދައިން ވިދާޅުވެފައިވަނީ އެކްސްގައި ކުރެެއްވި ޕޯސްޓެއްގައެވެ.

އެގޮތުން އެ ޕޯސްޓަގައި ވާގޮތުން މި ސަރުކާރުގެ ވުޒާރާތަކުގެ ވަޒީރުންނާއި ކުންފުނިތަކުގެ އެމްޑީން ވަީ އަބަދުވެސް ކޮންމެވެސް ފަރާތަކާ ބައްދަލުކުރައްވާފައެވެ.

ވެރިކަމަށް ހަ މަސްވެގެންދިޔަ އިރު ނެރެވުނު ނަތީޖާއެއް ނެތްކަމަށް ވިދާޅުވެ މަލީހް ވަނީ ވަރަށް ބޮޑަށް ފާޑުވެސް ވިދާޅުވެފައެވެ.

މަލީހްގެ ޕޯސްޓްގައި މި ސަރުކާރުން މެގަ ޕްރޮޖެކްޓްތައް ހިންގާ މަންޒަރު ނުފެންނަކަމަށް ފާހަގަކޮށްފައިވާއިރު މި އަހަރުގެ ފުރަތަމަ 5 މަސް ދުވަހު މި ސަރުކާރުން ތަރައްގީއަށް ކުރި ހޭދަވަނީ ދަށަށްވެއްޓިފައެވެ.

އަދި އޭގެ ބަދަލުގައި މުސާރަ ދިނުމަށް 600 މިލިއަން ވަނީ އިތުރުވެފައެވެ.

ސަރުކާރުގެ ފުރަތަމަ 6 މަސް ނިމިގެންދިޔަ އިރުވެސް ކަމެއް ކުރެވިފައި ނެތުމުން ގިނަ ބައެއްގެ ފާޑުކިޔުން ވަނީ ސަރުކާރަށް އަމާޒުވެފައެވެ.