20 ވަނަ ރައްޔިތުންގެ މަޖިލީހުގެ ޕީއެންސީ ޕީޖީ ލީޑާރ އަދި އިނގުރައިދޫ ދާއިރާގެ މެމްބަރު އިބްރާހިމް ފަލާހް ނިމިދިޔަ ފަސް އަހަރު ހުންނެވީ ކޮންތަނެއްގަތޯ އައްސަވާ ކުރީގެ ނައިބު ރައީސް ޑރ މުހައްމަދު ޖަމީލް އަހުމަދު ވަރުގަދަ ސުވާލެއް އަމާޒުކުރައްވައިފިއެވެ.

ޑރ ޖަމީލް މިފަދައިން ވިދާޅުވީ ޗެނަލް 13 ގެ "ވީކެންޑް ވިދް ޑރ ޖަމީލް" ޕްރޮގްރާމްގައި ވާހަކަދައްކަވަމުންނެވެ.

އެގޮތުން ޑރ ޖަމީލް ވިދާޅުވީ މިއަދު މިއޮތް ވެރިކަން ގެނައުމުގައި ފަލާހް އެއްވެސް ދައުރެއް އަދާކޮށްފައިވާ ނުވާނެކަމަށެވެ.

ނިމިދިޔަ ފަސް އަހަރު ރައީސް އަބްދުﷲ ޔާމީން އަބްދުލްގައްޔޫމް މިނިވަން ކުރުމަށްޓަކައި ގޮވާލާ މަގުމަތީ ކުރިޔަށް ގެންދިޔަ އިހުތިޖާޖްތަކުގައި ވެސް ޕީޕީއެމްގެ އާންމު މެމްބަރުން އުޅުއްވި އިރު ފަލާހް އުޅުއްވީ ދޯނި ބަންނަންކަމަށް ވިދާޅުވެ ޑރ ޖަމީލް ވަނީ ފަލާހަށް ވަރަށް ބޮޑަށް ފާޑުކިޔުން އަމާޒުކުރައްވާފައެވެ.

އެގޮތުން ޑރ ޖަމީލް ވަނީ ފަލާހް ފަލަސްތީނުގައި އިޒްރޭލުން ހިންގަމުންދާ ގަތުލް އާންމަކީ ދެ ގައުމެއްގެ ދޭތެރެޭ ހިނގާ ކަމެއް ކަމަށް ވިދާޅުވުމުން އެއީ ޕީޕީއެމްގެ ފިކުރު ނޫންކަމަށް ވިދާޅުވެފައެވެ.

ފަލާހް ޕީޕީއެެމް އަށް ކޮށްދިން އެއްވެސް މަސައްކަތެއް ނެތްއިރުވެސް "ޕީޖީ" ލީޑަރު ފަދަ ބޮޑު މަގާމެއް އޭނަ އަށްް ރައީސް މުއިއްޒު ދެއްވީ އަދުރޭގެ އެދުމުގެ މަތިން ކަމަށް ވެސް ޑރ ޖަމީލް ވަނީ ވީދާޅުވެފައެވެ.

ފަލަސްތީނުގެ ތާރީހު މިއަދު ދުނިޔޭގެ އެންމެ ތުއްތު ކުއްޖާއަށް ވެސް އެނގޭނެކަމަށާއި އެކަން ފަލާހަށް ނޭނގުމަކީ ހިތާމަހުރި ކަމެއް ކަމަށް ޑރ ޖަމީލް ވަނީ ވިދާޅުވެފައެވެ.