ހައްދުފަހަނައަޅާފައިވާ އިސްރާއީލުގެ އަސްކަރިއްޔާއިން ވަނީ ވައިގެ މަގުންނާއި ބިމާއި ކަނޑުން ޣައްޒާއަށް ވަރުގަދަ ހަމަލާތަކެއް ދީ، 200 އަށް ވުރެ ގިނަ މީހުން ޝަހީދުކޮށްލައިފިއެވެ..

ހޮނިހިރު ދުވަހުގެ ހަމަލާތައް އަމާޒުކޮށްފައިވަނީ ޣައްޒާގެ މެދުތެރޭގެ ދެއިރް އަލް ބަލާހް އާއި ނުސައިރާތު، ދެކުނުގެ ރަފާ ސިޓީގެ ހުޅަނގުން މީހުން ދިރިއުޅޭ ގެތަކާއި އުތުރުން ޣައްޒާ ސިޓީގެ އެތައް ސަރަހައްދަކަށެވެ.

ޣައްޒާގެ ހެލްތު މިނިސްޓްރީން ބުނީ ގިނަ އަދަދެއްގެ އާންމުން މަރުވެ ޒަޚަމްވި މީހުން އަލްއަގްސާ ޝަހީދުންގެ ހޮސްޕިޓަލަށް އަންނަމުންދާ ކަމަށާއި އޭގެ ތެރެއިން ގިނައީ ކުޑަކުދިންނާއި އަންހެނުން ކަމަށެވެ.

"ޒަހަމްވި އެތައް ބަޔަކު ބިންމަތީގައި އެބަތިބި، މެޑިކަލް ޓީމުތަކުން މަސައްކަތް ކުރަމުން ދަނީ އެމީހުންނަށް ލިބެން ހުރި އަސާސީ ސިއްހީ ގާބިލުކަމާ އެކު އެ މީހުން ސަލާމަތް ކުރަން،" ޣައްޒާގެ ހެލްތު މިނިސްޓްރީން ބުނެފައިވެއެވެ. އަދި ބޭހާއި ކާބޯތަކެތީގެ ދަތިކަން އެބަހުރި ކަމަށާއި ތެޔޮ ނުލިބުމުގެ ސަބަބުން އެ ތަނުގެ މައި ޖަނަރޭޓަރުގެ މަސައްކަތް ހުއްޓިފައިވާ ކަމަށްވެސް ހެލްތު މިނިސްޓްރީން ބުންޏެވެ.

ޣައްޒާ ސަރުކާރުގެ މީޑިއާ އޮފީހުން ނެރުނު ބަޔާނެއްގައި ބުނެފައިވަނީ އިސްރާއީލުން ނުސައިރާތާއި ޣައްޒާގެ އެހެން ހިސާބުތަކަށް ދިން ހަމަލާތަކުގައި 210 މީހުން ޝަހީދުވެފައިވާ ކަމަށެވެ.

ހެލްތު މިނިސްޓްރީގެ ތަރުޖަމާނު ވިދާޅުވީ މަގުމަތީގައި އަދިވެސް "ވަރަށް ގިނަ" ހަށިތަކާއި ޒަހަމްވި މީހުން ތިބި ކަމަށެވެ.

ބޮމުގެ ހަމަލާތަކުގެ ސަބަބުން މުވާސަލާތީ ކަންކަމަށް ބުރޫ އަރާފައިވީ ނަމަވެސް ފުރިފައިވާ ހޮސްޕިޓަލުގެ އެތެރޭން ފޯނު ކޯލެއް މެދުވެރިކޮށް ރިޕޯޓް ކުރަމުން އަންނަ އަލްޖަޒީރާގެ ނޫސްވެރިޔާ ހިންދު ޚައުދަރީ ބުނީ ހާލަތު ވަރަށް ނުތަނަވަސް އަދި ގޯސްވެފައިވާ ކަމަށާއި މަގުމަތީގައި ބިރުވެރިކަމެއްގެ ތެރޭގައި ތިބި މީހުންނަށް އެނބުރި ދާނެ ތަނެއް ނޭނގޭ ކަމަށެވެ.

“ކޮންމެ މިނެޓަކު ގޮވުންތައް ހިނގަމުން އެބަދޭ. އެމްބިއުލާންސްތަކުން ޒަޚަމްވެފައިވާ މީހުން ތޮއްޖެހިފައިވާ ހޮސްޕިޓަލަށް ބަދަލުކުރަމުން އެބަދޭ. ހޮސްޕިޓަލް ވަނީ ހަލަބޮލިވެފައި. ޒަހަމްވި މީހުންގެ ތެރޭގައި ކުޑަކުދިން ވެސް އެބަތިބި" ނޫސްވެރިޔާ އިތުރަށް ބުންޏެވެ.

ޑޮކްޓަރސް ވިތައުޓް ބޯޑާސް (އެމްއެސްއެފް) ގެ ކުޑަކުދިންގެ އިންޓެންސިވް ކެއާ ޑޮކްޓަރު ޑރ ތާނިޔާ ހާޖް-ހަސަން އަލް އަގްސާ ހޮސްޕިޓަލަކީ "ފުރިހަމަ ލޭއޮހޮރުވުމެއް" ކަމަށް ސިފަކޮށް، އެއީ "ނައަމް ސޫފި ގުރުބާން ކުރާ" ތަނެއް ކަމަށް ސިފަކުރިއެވެ.

"އަހަންނަށް ލިބިފައިވާ ފޮޓޯތަކާއި ވީޑިއޯތަކުން ފެންނަނީ ބަލިމީހުން ހުރިހާ ތަނެއްގައި ލޭގެ ޕޫލްތަކެއްގެ ތެރޭގައި އޮށޯވެގެން ތިބިތަން... އެމީހުންގެ ގުނަވަންތައް ވަނީ ބުރަވެފައި،" އަލްޖަޒީރާއަށް ދިން އިންޓަވިއުއެއްގައި އޭނާ ބުންޏެވެ.

އަދި ޣައްޒާގެ މެދުތެރޭގައި ވެސް ހެނދުނު ބުރެއިޖް ރެފިއުޖީ ކޭމްޕްގައި ހުރި ގެއަކަށް ބަޑިޖަހައި އިސްރާއީލުގެ ސިފައިން އެއް އާއިލާގެ މަދުވެގެން ހަ މީހުން ވަނީ ޝަހީދުކޮށްލާފައެވެ.

ޣައްޒާ ސިޓީގެ ދެކުނު ސަރަހައްދުތަކަށް އަމާޒުކޮށްގެން އެތައް ޑަޒަން ވައިގެ ހަމަލާތައް ދީފައިވާއިރު، މަންޒަރު ދުށް މީހުން ރިޕޯޓްކޮށްފައިވާ ގޮތުގައި މުޅި ރެސިޑެންޝަލް ބްލޮކްތައް ވަނީ އެއްކޮށް ސުންނާފަތިކޮށްލާފައެވެ. އަދި ކަނޑުގެ މަނަވަރު ތަކުން ވަނީ އެ ސަރަހައްދުގެ މަސްވެރި ބަނދަރު ކައިރީގައި ހުރި ސަރަހައްދަށް ބޮމުގެ ހަމަލާދީފައެވެ.

ފަލަސްތީނުގެ ރައީސް މަހްމޫދު އައްބާސް ވަނީ ހޮނިހިރު ދުވަހުގެ ހަމަލާތަކަށް ރައްދު ދެއްވައި، "އިސްރާއީލުން ހިންގީ ގަތުލުއާންމެއް" ކަމަށް ވިދާޅުވެ އދ.ގެ ސަލާމަތީ މަޖިލީހުގެ ކުއްލި ޖަލްސާއެއް ބޭއްވުމަށް ގޮވާލައްވާފައެވެ.