ފާއިތުވި ދެތިން ހަފްތާގެ ތެރޭގައި އުތުރު ކޮރެއާ އިން ކުނި އަޅާފައިވާ 1،000 އަށް ވުރެ ގިނަ ފުއްޕާހަން ފޮނުވުމުން ބަދަލު ހިފުމުގެ ގޮތުން ދެކުނު ކޮރެއާ އިން އާދީއްތަ ދުވަހު ވަނީ ބޯޑަރު ސަރަހައްދުތަކުގައި އުތުރު ކޮރެއާއާ ދެކޮޅު ޕްރޮޕެގެންޑާ ލައުޑްސްޕީކަރ ބްރޯޑްކާސްޓްތައް އަލުން ފަށާފައެވެ.

ދެކުނު ކޮރެއާގެ ޖޮއިންޓް ޗީފް އޮފް ސްޓާފުން ކަށަވަރުކޮށްދީފައިވާ ގޮތުގައި އަސްކަރިއްޔާއިން ވަނީ ހުކުރު ދުވަހުގެ މެންދުރު ފަހު ލައުޑްސްޕީކަރ ބްރޯޑްކާސްޓެއް ކުރިއަށް ގެންގޮސްފައެވެ.

"އަޅުގަނޑުމެންގެ އަސްކަރިއްޔާއިން އިތުރު ލައުޑްސްޕީކަރ ބްރޯޑްކާސްޓެއް ކުރިއަށް ގެންދިއުން ބިނާވެފައިވަނީ އުތުރު ކޮރެއާގެ ސުލޫކުގެ މައްޗަށް" ޖޮއިންޓް ޗީފް އޮފް ސްޓާފްގެ ބަޔާނުގައިވެއެވެ.

އޭގެ ގަޑިތަކެއް ކުރިން ދެކުނު ކޮރެއާގެ ގައުމީ ސަލާމަތީ ޑިރެކްޓަރު ޗަންގް ހޯ ޖިން ރިޔާސަތު ބަލަހައްޓަވައިގެން ބޭއްވި ކުއްލި ބައްދަލުވުމެއްގައި އޮފިޝަލުން ވަނީ ލައުޑްސްޕީކަރު އިންސްޓޯލްކޮށް ބްރޯޑްކާސްޓްތައް ފެށުމަށް ނިންމާފައެވެ. ސޯލްގެ ކުރީގެ ލިބަރަލް ސަރުކާރުގެ ދަށުން އުތުރާއެކު ކުރު މުއްދަތެއްގެ ތެރޭގައި ބޯޑަރު ސަރަހައްދުތަކުން މިފަދަ ސާމާނުތައް އަނބުރާ ގެންދިޔައީ 2018 ވަނަ އަހަރުއެވެ.

ޗަންގް އާއި ދެކުނު ކޮރެއާގެ ސަލާމަތީ އެހެން އޮފިޝަލުން ވަނީ އެ ފުއްޕާހަންތަކާއެކު ދެކުނު ކޮރެއާގައި "ކަންބޮޑުވުމާއި ހަލަބޮލިކަން" އުފައްދަން މަސައްކަތް ކުރާ ކަމަށް ބުނެ ޕިޔޮންގްޔާންއަށް ވަރަށް ބޮޑަށް ފާޑު ވިދާޅުވެ، މުސްތަގުބަލުގައި ނުތަނަވަސްކަން އުފެދިއްޖެ ނަމަ އެކަމުގެ ޒިންމާ އުފުލަން ޖެހޭނީ އުތުރު ކޮރެއާ ކަމަށް ވިދާޅުވެފައެވެ.

އުތުރުން ބުނީ ބެލޫން ކެމްޕޭން ކުރިއަށް ގެންދިޔައީ ދެކުނު ކޮރެއާގެ އެކްޓިވިސްޓުން އުތުރު ކޮރެއާއާ ދެކޮޅު ލީފްލެޓްތަކުން ފުރިފައިވާ ފުއްޕާހަންތަކާއި ދެކުނު ކޮރެއާގެ މަޝްހޫރު ލަވަތަކާއި ޑްރާމާތަކުން ފުރިފައިވާ ޔޫއެސްބީ ސްޓިކްތައް ފޮނުވުމުން ކަމަށެވެ. މިފަދަ ކަންތަކަށް އުތުރު ކޮރެއާ އަކީ އިންތިހާއަށް ނާޒުކު ގައުމެއް ކަމަށާއި، އެކަމުގެ ސަބަބުން ފްރަންޓްލައިން ސިފައިންނާއި ރައްޔިތުންގެ ހިތްވަރު ގެއްލި، އެންމެ ފަހުން ލީޑަރު ކިމް ޖޮންގް އުންގެ ބާރު ބަލިކަށިވެދާނެ ކަމުގެ ބިރު އޮތް ކަމަށް މަޝްރަހު ދިރާސާ ކުރާ ފަރާތްތަކުން ބުނެއެވެ.

ދެކުނު ކޮރެއާއިން މީގެ ކުރިން ލައުޑްސްޕީކަރުތައް ބޭނުންކޮށްގެން ޕިއޮންގްޔަންގްއާ ދެކޮޅު ބްރޯޑްކާސްޓްތަކާއި ކޭ ޕޮޕް ލަވަތަކާއި ބައިނަލްއަގްވާމީ ޚަބަރުތައް ޖަހާފައިވެއެވެ.

2015 ވަނަ އަހަރު ދެކުނު ކޮރެއާއިން 11 އަހަރަށް ފަހު ފުރަތަމަ ފަހަރަށް ލައުޑްސްޕީކަރ ބްރޯޑްކާސްޓްތައް އަލުން ފެށުމުން އުތުރު ކޮރެއާއިން ބޯޑަރު ހުރަސްކޮށް އާޓިލަރީ ބަޑި ޖަހައި ރައްދުގައި ދެކުނު ކޮރެއާ އިން އަނބުރާ ބަޑިޖަހާފައިވާ ކަމަށް ދެކުނު ކޮރެއާގެ އޮފިޝަލުން ބުނެއެވެ. އެ ހަމަލާ ބަދަލުކުރުންތަކުގައި އެއްވެސް މީހަކަށް ގެއްލުމެއް ލިބިފައެއް ނުވެއެވެ.

މިދިޔަ ހަފްތާގައި ކުނި އުފުލާ ފުއްޕާހަންތަކާ ގުޅިގެން ޓެންޝަންތައް ބޮޑުވުމުން ދެކުނު ކޮރެއާ އިން ވެސް ވަނީ ބޯޑަރުގައި ހިންގާ ޢަދާވާތްތެރި އަމަލުތައް މަދުކުރުމަށް 2018 ވަނަ އަހަރު ވެވުނު އެއްބަސްވުން ސަސްޕެންޑްކޮށް، ޕްރޮޕެގެންޑާ ކެމްޕޭންތައް އަލުން ފެށުމާއި ބޯޑަރު ސަރަހައްދުތަކުގައި ލައިވް ފަަޔާ އަސްކަރީ ތަމްރީނުތައް އަލުން ފެށުމުގެ ފުރުސަތު ދީފަ އެވެ.

ދެކުނު ކޮރެއާގެ ޑިފެންސް މިނިސްޓްރީން ނެރުނު ބަޔާނެއްގައި ބުނެފައި ވަނީ ދެކުނު ކޮރެއާގެ ޑިފެންސް މިނިސްޓަރު ޝިން ވޮން ސިކް ވަނީ އަސްކަރީ މަތީ ކޮމާންޑަރުންނާ ބައްދަލުކުރައްވައި، ލައުޑްސްޕީކަރުން ބްރޯޑްކާސްޓް ކުރުމުން އުތުރުން ދީފާނެ ރައްދަު ހަމަލާއަކަށް އަސްކަރީ ފިޔަވަޅު އަޅަން ތައްޔާރުވެ ތިބުމަށް އަންގާފައެވެ.

އުތުރު ކޮރެއާއިން ހަފްތާ ބަންދުގައި ދެކުނު ކޮރެއާއަށް އެތައް ސަތޭކަ ފުއްޕާހަން ފޮނުވަމުން ދިޔަ ކަމަށާއި މިއީ މެއި މަހުގެ ފަހުކޮޅު ކުރިއަށް ގެންދިޔަ މިފަދަ ތިންވަނަ ކެމްޕޭނު ކަމަށް ދެކުނު ކޮރެއާގެ އަސްކަރިއްޔާއިން ބުނެއެވެ.

ދެކުނު ކޮރެއާގެ ޖޮއިންޓް ޗީފްސް އޮފް ސްޓާފުން ބުނީ ހޮނިހިރު ދުވަހުގެ ރޭން ފެށިގެން އުތުރުން ދެކުނަށް 330 ވަރަކަށް ފުއްޕާހަން ފޮނުވާލާފައިވާ ކަމަށެވެ. އަދި ހުކުރު ދުވަހުގެ ހެނދުނުގެ ނިޔަލަށް ދެކުނު ކޮރެއާގެ ބިމުން ގާތްގަނޑަކަށް 80 ފުއްޕާހަން ފެނިފައިވާ ކަމަށެވެ. އަސްކަރިއްޔާއިން ބުނީ ހޮނިހިރު ދުވަހުގެ ރޭ އިރުމައްޗަށް ވައިޖެހުމުގެ ސަބަބުން ދެކުނު ކޮރެއާގެ އެތެރެއަށް ގިނަ ފުއްޕާހަން އުދުހިގެން ދިއުން އެކަށީގެންވާ ކަމަށެވެ.

ދެކުނުގެ އަސްކަރިއްޔާއިން ބުނީ ބިންމައްޗަށް ވެއްޓުނު ފުއްޕާހަންތަކުން ކުނި އެޅުނު ކަމަށާއި އޭގެ ތެރޭގައި ޕްލާސްޓިކާއި ކަރުދާސް ކުނި ހިމެނޭ ކަމަށެވެ .ނަމަވެސް ނުރައްކާތެރި އެއްވެސް އެއްޗެއް ފެނިފައި ނުވާކަމަށެވެ.

އުތުރު ކޮރެއާގެ ފުއްޕާހަންތައް ހޯދުމަށް ކެމިކަލް ރެޕިޑް ރެސްޕޮންސް އަދި އެކްސްޕްލޮސިވް ކްލިއަރެންސް ޔުނިޓްތައް ތައްޔާރީ ހާލަތަކަށް ގެނެސްފައިވެއެވެ. އަސްކަރިއްޔާއިން ވަނީ ވެއްޓޭ ތަކެތިން ސަމާލުވެ، ބިމުން ފެންނަ ފުއްޕާހަންތަކުގައި އަތް ނުލައި ފުލުހުންނަށް ނުވަތަ އަސްކަރީ ކަމާބެހޭ ފަރާތްތަކަށް ރިޕޯޓް ކުރުމަށް އާންމުންނަށް އަންގާފައެވެ.