ޔަމަނުގެ އައްސޭރިފަށުގައި ހިޖުރަވެރިން އުފުލާ ބޯޓެއް އަޑިއަށް ގޮސް 49 މީހުން މަރުވެ އިތުރު 140 މީހުން ގެއްލިފައިވާ ކަމަށް އދ.ގެ އޭޖެންސީ އަކުން ބުނެފިއެވެ.

އިންޓަނޭޝަނަލް އޮގަނައިޒޭޝަން ފޯ މައިގްރޭޝަނުން ނެރުނު ބަޔާނެއްގައި ބުނެފައި ވަނީ ގަލްފް އޮފް އޭޑެން ހުރަސްކޮށް 320 ކިލޯމީޓަރު (200 މޭލު) ދިގު ދަތުރުގައި ސޯމާލިއާގެ އުތުރު އައްސޭރިފަށުން ގާތްގަނޑަކަށް 260 ސޯމާލިއާ އާއި އިތިއޮޕިއާ މީހުން ގޮވައިގެން ބޯޓު ދިޔަ ކަމަށެވެ.

71 މީހުން މިހާތަނަށް ސަލާމަތްކޮށް، މީހުން ސަލާމަތް ކުރުމުގެ މަސައްކަތް ކުރިއަށްދާކަމަށް އެ ގްރޫޕުން ބުނެފައިވެއެވެ. މަރުވި މީހުންގެ ތެރޭގައި 31 އަންހެނުންނާއި ހަ ކުޑަކުދިން ހިމެނެއެވެ.

ޔަމަނަކީ އިރުމަތީ އެފްރިކާ އާއި ހޯން އޮފް އެފްރިކާ އިން ގަލްފް ގައުމުތަކަށް މަސައްކަތަށް ވާސިލްވާން މަސައްކަތް ކުރާ ހިޖުރަވެރިންނަށް ބޮޑު މަގެވެ. ގާތްގަނޑަކަށް ދިހަ އަހަރު ދުވަހުގެ ދާޚިލީ ހަނގުރާމައެއް ޔަމަނުގައި ހިނގި ނަމަވެސް، ފާއިތުވި އަހަރުތަކުގައި އެގައުމަށް އަންނަ ހިޖުރަވެރިންގެ އަދަދު ތިންގުނައަށް އިތުރުވެފައިވާއިރު، 2021 ވަނަ އަހަރު ގާތްގަނޑަކަށް 27،000 އިން މިދިޔަ އަހަރު 90،000 އަށް ވުރެ މައްޗަށް އަރާފައިވާ ކަމަށް އައިއޯއެމް އިން މިދިޔަ މަހު ބުނެފައިވެ އެވެ. ގާތްގަނޑަކަށް 380،000 އެއްހާ ހިޖުރަވެރިން މިހާރު ޔަމަނުގައި އެބަތިބި ކަމަށް އެ އިދާރާއިން ބުނެއެވެ.

ޔަމަނަށް ދިއުމަށްޓަކައި ހިޖުރަވެރިން ގެންދަނީ ގިނަ ފަހަރަށް ނުރައްކާތެރި، ތޮއްޖެހިފައިވާ ބޯޓުފަހަރުގައި ސްމަގްލަރުން ރަތް ކަނޑު ނުވަތަ ގަލްފް އޮފް އޭޑެން ހުރަސްކޮށްގެންނެވެ. އޭޕްރީލް މަހު ޖިބޫޓީގެ އައްސޭރިފަށުގައި ދެ ބޯޓު ފަރަށް އަރައި، ޔަމަނަށް ދިއުމަށް މަސައްކަތް ކުރަމުން ދަނިކޮށް މަދުވެގެން 62 މީހުން ވަނީ މަރުވެފަ އެވެ. އައިއޯއެމް އިން ބުނީ އެ މަގުން 1860 މީހުން މަރުވެ ނުވަތަ ގެއްލިފައިވާ ކަމަށާއި އޭގެ ތެރޭގައި ގެނބިގެން މަރުވި 480 މީހުން ހިމެނޭ ކަމަށެވެ.