ކެޕްސައިސިންގެ މިންވަރު ހުރުމުން ބޭނުންކުރާ ފަރާތްތައް ވިހަވެދާނެ ކަމަށް ބުނެ ދެކުނު ކޮރެއާގެ ކުންފުނި ސަމިޔަންގްގެ ބައެއް ސްޕައިސީ ރާމެން ނޫޑްލްސް އުފެއްދުންތައް ޑެންމާކުން ފިހާރަތަކުން އަނބުރާ ގެންގޮސްފިއެވެ.

ސަމްޔަންގް އިންސްޓޭންޓް ރާމެން ލައިންގެ ތިން ވައްތަރު ނޫޑްލްސް އަނބުރާ ގެންގޮސްފައިވެއެވެ . އެއީ ބުލްޑަކް 3x ސްޕައިސީ އެންޑް ހޮޓް ޗިކަން، 2x ސްޕައިސީ އެންޑް ހޮޓް ޗިކަން އަދި ހޮޓް ޗިކަން ސްޓޫ އެވެ.

ޑެންމާކުގެ ކާބޯތަކެތީގެ އެޖެންސީން ވަނީ އަންގާރަ ދުވަހު ރިކޯލް އާއި އިންޒާރު ނެރެ، ކޮންސިއުމަރުންނަށް އެ އުފެއްދުން ދޫކޮށްލުމަށް އިލްތިމާސްކޮށްފައެވެ.

ވަކި ހާދިސާތަކެއް ހިނގައިގެން ޑެންމާކުގެ ކަމާބެހޭ ފަރާތްތަކުން ފިޔަވަޅު އަޅަން ޖެހިފައިވާ ކަމެއް ނޭނގެ އެވެ.

ޑެންމާކުގެ ވެޓެރިނަރީ އެންޑް ފުޑް އެޑްމިނިސްޓްރޭޝަނުން ބުނީ އެއް ޕެކެޓެއްގައި ކެޕްސައިސިންގެ މިންވަރު "ކޮންސިއުމަރުންނަށް ސީރިއަސް ވިހަވުމުގެ ނުރައްކާ ބޮޑުވާ ވަރަށް މަތި" ކަމަށް ވަޒަންކޮށްފައިވާ ކަމަށެވެ.

"އެ އުފެއްދުންތައް ހުރިނަމަ އެ އުފެއްދުންތައް އުކާލަން ނުވަތަ ގަތް ފިހާރައަށް އަނބުރާ ގެންދަން ޖެހޭނެ،" އެ އިދާރާއިން ނެރުނު ބަޔާނުގައިވެ އެވެ.

މި ނޯޓިސްއާ ގުޅިގެން ސޯޝަލް މީޑިއާގައި ހޫނު މަޝްވަރާތަކެއް އުފެދިފައިވާއިރު، ރަހަ މީރު ކާނާއަށް ލޯބިކުރާ މީހުންގެ ފަރާތުން ވަނީ މަޖާ ގިނަ ރިއެކްޝަންތަކެއް ލިބިފައެވެ. ގިނަ ބަޔަކު ވަނީ ޑެންމާކުގެ މީހުން ރަހައަށް ތަޙައްމަލު ކުރާ މިންވަރު ދަށް ކަމުގެ ވާހަކަތައް ދައްކާފައެވެ.

"އަހަރެންގެ ޑެންމާކުގެ ރައްޓެއްސަކު ހީކުރީ ރަހަ ނެތް ބްރޭޑްޑް ޝްރިމްޕް އާއި އެކު ކުޑަކޮށް ގްރައުންޑް ޕެޕަރ މާ ސްޕައިސީ ކަމަށް. އެހެންކަމުން ހައިރާން ނުވޭ އެމީހުން މި ރާމެން އަކީ ވިހައެއް ކަމަށް ބުނުމުން،" ރެޑިޓް ރާމެން ފޯރަމެއްގައި ޓޮޕް ލައިކް ކޮމެންޓެއްގައި ވެއެވެ.

މީގެ ކުރިން އެހެން އެއްވެސް ގައުމެއްގައި މި ނޫޑްލްސް ރިކޯލް ކޮށްފައިވާ ކަމެއް ސާފެއް ނުވެ އެވެ. އަދި ދުނިޔޭގެ ފެންވަރުގައި ސަލާމަތީ ގޮތުން އިތުރު އިންޒާރުތަކެއް ނެރެފައި ނުވާ ކަމަށް ފެނެ އެވެ.

ކެޕްސައިސިން އަކީ މިރުހުގައި ހިމެނޭ ކެމިކަލް ކޮމްޕައުންޑެކެވެ. އެ ކެއުމުން އަންދާ އިހުސާސް އުފެދެއެވެ.

އިންސާނުން މިރުސް ކެއުމުން ކެޕްސައިސިން ލޭހޮޅިތަކަށް ދޫވެ އަނގައިގައި ހުންނަ ރިސެޕްޓަރުތަކާ ގުޅެއެވެ.

ސަމްޔަންގް އަކީ ދެކުނު ކޮރެއާގެ ކާބޯތަކެތި އުފައްދާ ބޮޑު ކުންފުންޏެކެވެ. އެ ކުންފުންޏަކީ 1960 ގެ އަހަރުތަކުގައި އިންސްޓޭންޓް ނޫޑްލްސް އުފެއްދި އެގައުމުގައި ފުރަތަމަ ކުންފުންޏެއްގެ ގޮތުގައި ބްރޭންޑް ކުރާ ކުންފުންޏެކެވެ.