ޣައްޒާގައި ހަނގުރާމަ ހުއްޓާލުމަށް އެމެރިކާއިން ތާއީދުކުރާ ޕްލޭނަށް ރައްދު ހުށަހަޅާފައިވާ ކަމަށް ހަމާސްއިން ބުނެފިއެވެ. އެ ޖަމާއަތުގެ އިސް އޮފިޝަލަކު ބީބީސީއަށް ވިދާޅުވީ ދާއިމީ ހަނގުރާމަ ހުއްޓާލުމަށް އިޒްރޭލުން އަދިވެސް ވައުދުވާން ޖެހޭ ކަމަށެވެ.

އެ ޖަމާއަތާއި ފަލަސްތީނު އިސްލާމިކް ޖިހާދު (ޕީއައިޖޭ) ގެ ބައިވެރިން ނެރުނު ބަޔާނެއްގައި ވަނީ އެއްބަސްވުމަކަށް އައުމަށް "ޕޮޒިޓިވް" ކޮށް ތައްޔާރަށް އޮތް ކަމަށް ބުނެފަ އެވެ.

އދ.ގެ ސަލާމަތީ މަޖިލީހުން ހޯމަ ދުވަހުގެ ރޭ ފާސްކުރި ހަނގުރާމަ ހުއްޓާލުމުގެ ޕްލޭނުގައި ވަނީ ހަ ހަފުތާގެ މުއްދަތަކަށް ހަނގުރާމަ ހުއްޓާލުމަށް ގޮވާލާފައެވެ.

އިސްރާއީލާއި ހަމާސްއާ ދެމެދު އެމެރިކާއާ އެކު ކުރިއަށް ގެންދިޔަ މަޝްވަރާތަކުގެ މެދުވެރިއަކަށް ވެފައިވާ ގަތަރާއި މިސްރުން ވަނީ ފަލަސްތީނުގެ ޖަމާއަތުން ޖަވާބު ހުށަހަޅާފައިވާކަން ކަށަވަރުކޮށްދީފައެވެ.

އަންގާރަ ދުވަހުގެ ހަވީރު ހަމާސްއިން ނެރުނު ބަޔާނުގައި ވަނީ ޣައްޒާގައި ހިނގަމުންދާ ހަނގުރާމަތައް "މުޅިން ހުއްޓުމަށް" ގޮވާލާފައެވެ.

"މި ރައްދުގައި އަޅުގަނޑުމެން ވާނީ ފަލަސްތީނުގެ ރައްޔިތުންގެ މަސްލަހަތަށް އިސްކަންދީ، ޣައްޒާގައި މިހާރު ހިނގަމުންދާ އަނިޔާވެރިކަން މުޅިން ހުއްޓުވުމުގެ މުހިންމުކަމަށް އަލިއަޅުވާލާފައި،" ހަމާސް އާއި ޕީއައިޖޭން ބުނެފައިވެއެވެ.

އެ ޖަމާއަތްތަކުން އިތުރަށް ބުނީ "މި ހަނގުރާމަ ނިންމާލާ އެއްބަސްވުމަކަށް އައުމަށް ޕޮޒިޓިވް ގޮތެއްގައި ގުޅިގެން މަސައްކަތް ކުރަން" ތައްޔާރަށް ތިބި ކަމަށެވެ.

ވައިޓް ހައުސްގެ ގައުމީ ސަލާމަތާ ބެހޭ ތަރުޖަމާނު ޖޯން ކިރްބީ ވިދާޅުވީ ހަމާސްއިން ޖަވާބެއް ހުށަހެޅުމަކީ "ލިބުނު އެހީތެރި ކަމެއް" ކަމަށާއި އެމެރިކާގެ އޮފިޝަލުން އެ ޖަމާއަތުގެ އެދުންތައް "އިވެލުއޭޓް" ކުރަމުންދާ ކަމަށެވެ.

މީގެ ކުރިން އަންގާރަ ދުވަހު އެމެރިކާގެ ޚާރިޖީ ވަޒީރު އެންޓޯނީ ބްލިންކެން ވިދާޅުވީ ޣައްޒާގެ ހަނގުރާމަ ހުއްޓާލުމުގެ ޕްލޭނަށް އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ "ވައުދުވުން އަލުން ކަށަވަރުކޮށްދެއްވާފައިވާ" ކަމަށާއި ދުނިޔެ އިންތިޒާރު ކުރަމުންދަނީ ހަމާސްގެ ޖަވާބަކަށް ކަމަށެވެ.

މިދިޔަ މަހު ރައީސް ބައިޑަން ހުށަހެޅުއްވި ހުށަހެޅުމުގައި ހިމެނެނީ ފުރަތަމަ ހަ ހަފްތާގެ ހަނގުރާމަ ހުއްޓާލުމެވެ.

ދެވަނަ ފިޔަވަހީގައި ބާކީ ތިބި ރަހީނުން ހަމާސްއިން ދޫކޮށްލައި، "ދާއިމީ" ހަނގުރާމަ ހުއްޓާލުމުގެ ތެރެއިން އިސްރާއީލުގެ ސިފައިން ޣައްޒާއިން މުޅިން ފައިބަން ޖެހެއެވެ. ނަމަވެސް، ފަހުގެ މައްސަލަތައް އަދިވެސް މަޝްވަރާތައް ކުރެވޭނެ އެވެ.

އިސްރާއީލުގެ ހަގީގީ ހުށަހެޅުން ރިޕޯޓްތައް ބުނާ ގޮތުގައި ބައިޑަން ހުށަހެޅުއްވި ޚުލާސާއަށް ވުރެ ދިގު ހުށަހެޅުން އާންމުކޮށްފައެއް ނުވެއެވެ.  އެއީ ބައިޑަންގެ ތަގުރީރުގެ ދުވަސްތަކެއް ކުރިން ހަމާސްއަށް ހުށަހެޅި އެއްޗެކެވެ.

ނަތަންޔާހޫ ވަނީ އޭނާގެ ހަނގުރާމައިގެ ކެބިނެޓުން އެ ޕްލޭނަށް ހުއްދަ ދީފައިވާކަން ހާމަކޮށްފައެވެ. ނަމަވެސް އެކަމަށް ފުރިހަމައަށް ތާއީދު ކުރައްވާ ކަމަށް ބުނެފައެއް ނުވެއެވެ.  އޭނާގެ ކެބިނެޓްގެ ކަނާތު ފިޔާގެ ހައްދުފަހަނައަޅާފައިވާ މެންބަރުން ވަނީ އެއީ ހަމާސްއަށް އަމާންދިނުން ކަމަށް ދެކި، އެއްބަސްވުން ކުރިއަށް ގެންދެވިއްޖެ ނަމަ އޭނާގެ ކޯލިޝަނުން ވަކިވެ، ކޯލިޝަން ފުނޑުފުނޑު ކޮށްލާނެ ކަމުގެ އިންޒާރު ދީފައެވެ.